புலிகள் தலைவர் கொல்லப்பட்டது எப்படி? புதிய தகவல்கள் நாளை அம்பலம்

கொழும்பு: இலங்கை ராணுவத்தின் போர்க் குற்றங்கள் குறித்து
சேனல் 4 செய்தி நிறுவனம் புதிய வீடியோ தொகுப்பை வெளியிட உள்ள நிலையில்,
பிரபாகரன் எவ்வாறு கொல்லப்பட்டார் என்பது குறித்த ஆவணப் படத்தைத் தயாரிக்க
துவங்கியுள்ளதாக இலங்கை தெரிவித்துள்ளது. அதேநேரம் பிரபாகரன், இலங்கை
ராணுவத்தால் சித்திரவதை செய்து கொல்லப்பட்டதாக தகவல்கள் தெரிவிக்கின்றன.

இந்தியா ஆதரவில்லை: சுவிட்சர்லாந்து நாட்டின் ஜெனீவா நகரில்
ஐ.நா., மனித உரிமைக் கவுன்சிலின் 19 வது கூட்டத் தொடர் நடந்து வருகிறது.
இதில் கடந்த 7ம் தேதி, இலங்கை குறித்த தீர்மானம் ஒன்றை அமெரிக்கா கொண்டு
வந்தது. இதன் மீதான வாக்கெடுப்பு 23ம் தேதி நடக்கக் கூடும் என்ற நிலையில்,
இத்தீர்மானத்தை முறியடிக்க இலங்கை, அரசியல் ரீதியாக பல்வேறு முயற்சிகளை
மேற்கொண்டு வருகிறது.

புதிய வீடியோ தொகுப்பு: இந்நிலையில், பிரிட்டனில் இயங்கும் சேனல்
4 செய்தி நிறுவனம், இலங்கை ராணுவத்தின் போர்க் குற்றங்களை ஆதாரபூர்வமாக
காட்டும் புதிய வீடியோ தொகுப்பை பிரிட்டன் நேரப்படி இன்று இரவு 10.55
மணிக்கு (இந்திய நேரப்படி நாளை அதிகாலை 4.25 மணி) வெளியிடுகிறது.
பாதுகாப்பு வளையத்தில் இருந்த மருத்துவமனை ஒன்றின் மீது இலங்கை ராணுவம்
குண்டுகளை வீசியது, அந்த வளையத்தில் சிக்கிக் கொண்ட ஆயிரக்கணக்கான
மக்களுக்கு உணவு மற்றும் மருந்து வசதிகளைத் தர மறுத்து, மனிதாபிமான
உதவிகளுக்கான சட்டப்பூர்வ கோரிக்கைகளை நிராகரித்தது, மீட்பு நடவடிக்கையின்
போது கொத்துக் குண்டுகளை வீசி மக்களைக் கொன்றது, விடுதலைப் புலிகள் இயக்கத்
தலைவர் பிரபாகரனின் இளைய மகன் பாலச்சந்திரன் உட்பட, பிடிபட்ட விடுதலைப்
புலி வீரர்களை கொடூரமான முறையில் திட்டமிட்டுக் கொன்றது ஆகிய நான்கு
விஷயங்கள் குறித்து இந்த வீடியோ தொகுப்பில் காட்சிகள் இடம் பெற்றுள்ளதாக
சேனல் 4 செய்தி நிறுவனம் தெரிவித்துள்ளது.

இலங்கையின் ஆவணப்படம்: போர்க் குற்றங்கள் தொடர்பாக அதிகரித்து
வரும் நெருக்கடியைச் சமாளிக்கவும், சேனல் 4 செய்தி நிறுவனத்தின்
ஆதாரபூர்வமான குற்றச்சாட்டுகளுக்கு ஏதோ ஒருவகையில் பதிலளிக்கவும் இலங்கை
தன்னை முழுவீச்சில் தயார்படுத்தி வருகிறது. அதன் ஒரு கட்டமாக, பிரபாகரன்
இறுதிப் போரின் போது எவ்வாறு கொல்லப்பட்டார் என்பது குறித்து இலங்கை
ராணுவம் ஒரு ஆவணப் படத்தைத் தயாரித்து வருவதாக இலங்கை ராணுவத் தளபதி ஜெகத்
ஜெயசூர்யா தெரிவித்துள்ளார். இதில், நந்திக் கடல் பகுதியில் நடந்த போரை
நேரில் கண்டவர்களின் சாட்சியங்களின் அடிப்படையில் இந்த ஆவணப் படம்
தயாரிக்கப்படுவதாக அவர் கூறினார்.

ராணுவ அறிக்கை விரைவில்: சேனல் 4 செய்தி நிறுவனம் வெளியிட்ட
முதல் வீடியோ தொகுப்பை போலி என மறுத்த இலங்கை அரசு, தான் நியமித்த கற்றுக்
கொண்ட படிப்பினைகள் மற்றும் நல்லிணக்க ஆணைக் குழுவின் பரிந்துரைகள் மற்றும்
சேனல் 4 வீடியோ ஆகியவை சுட்டிக் காட்டிய ராணுவத்தின் போர்க் குற்றங்கள்
மற்றும் மனித உரிமை மீறல்களை விசாரிக்க, ஒரு ராணுவ விசாரணைக் குழுவை
அமைத்தது. இந்த விசாரணைக் குழுவின் அறிக்கை விரைவில் வெளியிடப்படும் என
ராணுவ செய்தித் தொடர்பாளர் நிஹால் ஹப்புவாராச்சி நேற்று முன்தினம்
தெரிவித்துள்ளார். இதற்கிடையில், பிரபாகரனின் இளையமகன் பாலச்சந்திரன்
கொல்லப்பட்டதைப் போன்றே பிரபாகரனும் அவரது குடும்பமும் பல்வேறு
சித்திரவதைகளுக்கு உட்படுத்தப்பட்டுப் பின்னர் கொல்லப்பட்டதாகத் தகவல்கள்
தெரிவிக்கின்றன.

பாலச்சந்திரன் மரணத்தின் பின்னணி: இதுகுறித்து நேற்று
பேட்டியளித்த சேனல் 4ன் புதிய வீடியோ தொகுப்பின் இயக்குனர் கல்லம் மாக்ரே
கூறியதாவது: பாலச்சந்திரன், ஐந்து பாதுகாப்பு வீரர்களுடன் சரண் அடையும் படி
அனுப்பப்பட்டார். அவரைப் பிடித்த ராணுவம், பிரபாகரன் எங்கிருக்கிறார் என
அவரிடம் கேட்டுள்ளது. அவரது தகவலின் படி தான் பிரபாகரனை ராணுவம்
பிடித்ததாக, ராணுவத்தின் மூத்த அதிகாரி ஒருவரிடம் இருந்து நாங்கள்
ஆதாரபூர்வமான தகவல் பெற்றுள்ளோம். பாலச்சந்திரன் கண் முன்பே, அவரது ஐந்து
காவலர்களும் கொல்லப்பட்டுள்ளனர் என்றால், அவர் சிக்கியிருந்த சூழலை நம்மால்
ஓரளவு கற்பனை செய்து பார்க்க முடியும். எனினும் அவரது உடலில்
சித்திரவதைக்கான அறிகுறிகள் எதுவும் இல்லை. பிரபாகரன் பற்றிய தகவலை பெற்ற
பின் பாலச்சந்திரனை கொன்றுள்ளனர். இவ்வாறு மாக்ரே தெரிவித்தார்.

பிரபாகரனின் மரணம் எப்படி? இந்நிலையில் பிரபாகரனின் மரணம்
குறித்து வேறு சில தகவல்களும் வெளியாகியுள்ளன. அவற்றின் படி,
இறுதிக்கட்டத்தில், சில மேற்குலக நாடுகள், ஐ.நா., மற்றும் இந்தியா
ஆகியவற்றின் ஆலோசனைப் படி பிரபாகரனும், விடுதலைப் புலிகளின் மூத்த
தலைவர்களும் குடும்பத்துடன் சரண் அடையும்படி அறிவுறுத்தப்பட்டுள்ளனர்.
பிரபாகரனும் அதற்கு ஒப்புக் கொண்டு, ஐ.நா., வின் மீட்பு வாகனம் ஒன்றிற்காக
காத்திருக்கிறார். ஆனால் நடந்தது வேறு. அதற்குப் பின் பிரபாகரன் அவரது
குடும்பத்துடன் இலங்கை ராணுவத்தின் பிடியில் சில நாட்கள்
இருந்திருக்கிறார். அதன் பின் இறுதியாக நந்திக் கடல் பகுதிக்குக் கொண்டு
செல்லப்பட்டு கொடூரமான முறையில் கொல்லப்பட்டுள்ளார் என அத்தகவல்கள்
தெரிவிக்கின்றன. அவரது மரணத்திற்கு முன்பே அவரது மூத்த மகன் சார்லஸ் ஆன்டனி
மற்றும் இளைய மகன் பாலச்சந்திரன் ஆகியோர் கொல்லப்பட்டிருக்க வேண்டும்
எனவும் அத்தகவல்கள் கூறுகின்றன. எனினும் இவை எதுவும் இன்னும் உறுதி
செய்யப்படவில்லை. பிரபாகரன் எவ்விதம் மரணம் அடைந்தார் என்பதற்கான விடையும்,
சேனல் 4 செய்தி நிறுவனம் வெளியிடும் புதிய வீடியோ தொகுப்பில் இருக்கும்
என்ற எதிர்பார்ப்பும் பெரிய அளவில் நிலவுகிறது.