ரூ.1 கோடி கேட்டு மாணவனைக்கடத்தி மிரட்டிய 4 பேர் கைது நெருங்கிய நண்பர்களே காரணம்

by **logu** Fri Mar 02, 2012 9:22 am

சென்னை:ஒரு கோடி ரூபாய் கேட்டு கடத்தப்பட்ட மாணவனின்,
நண்பர்கள் உள்ளிட்ட நால்வரை, போலீசார் கைது செய்தனர். அவர்களிடமிருந்து,
நான்கு துப்பாக்கிகள் மற்றும் தோட்டாக்கள் பறிமுதல் செய்யப்பட்டன.சென்னை,
எம்.கே.பி., நகர், 12வது குறுக்குத் தெருவைச் சேர்ந்தவர் கிருஷ்ணன்;
பெருங்குடியில், இரும்புக் கழிவுகள் விற்பனை மையம் நடத்தி வருகிறார். இவரது
மகன் கண்ணன், 17 (பெயர் மாற்றப்பட்டுள்ளது). பாரிமுனை, தம்புச் செட்டித்
தெருவில் உள்ள முத்தையால் பேட்டை பள்ளியில், 10ம் வகுப்பு படித்து
வருகிறார்.
கடந்த 26ம் தேதி, வெளியில் சென்ற கண்ணன், மீண்டும்
வீடு திரும்பவில்லை. தெரிந்த இடங்களில் தேடிய அவனது பெற்றோர், எம்.கே.பி.,
நகர் போலீசில், 28ம் தேதி புகார் அளித்தனர். புகாரின்படி வழக்கு
பதியப்பட்டு, விசாரணை மேற்கொள்ளப்பட்டது.

ரூ.1 கோடி கேட்டு
மிரட்டல்: இந்நிலையில், நேற்று முன்தினம் மாலை, கண்ணனின் தந்தை
கிருஷ்ணனுக்கு போன் செய்த மர்ம நபர் ஒருவர், "மகனை விடுவிக்க, ஒரு கோடி
ரூபாய் வேண்டும்' என, மிரட்டல் விடுத்தார். இந்த தகவலை உடனடியாக,
எம்.கே.பி., நகர் போலீஸ் நிலையத்திற்கு, கிருஷ்ணன் தெரிவித்தார்.

இதையடுத்து,
புளியந்தோப்பு துணை கமிஷனர் மேற்பார்வையில், மூன்று உதவி கமிஷனர்கள்
தலைமையில், ஆறு தனிப்படைகள் அமைக்கப்பட்டன. சிறுவனின் நண்பர்கள் மற்றும்
அவன் செல்லும் இடங்கள் குறித்து, தனிப்படையினர் விசாரணை மேற்கொண்டனர்.

கண்ணன்
மீட்பு: விசாரணையில், சர்மா நகரைச் சேர்ந்த, பள்ளி மாணவன் சுமன், 16
(பெயர் மாற்றப்பட்டுள்ளது), கொடுங்கையூர், ராகவன் நகரைச் சேர்ந்த, தனியார்
பொறியியல் கல்லூரியில் முதலாம் ஆண்டு படித்து வரும், பாண்டியன் மகன் விஜய்,
18, ஆகிய, கண்ணனின் நெருங்கிய நண்பர்கள் தான், கடத்தலுக்கு காரணம் எனத்
தெரிய வந்தது.

விஜயின் வீட்டை சோதனையிட்ட போது, கண்ணனின் நண்பன்
விஜய் மற்றும் செங்குன்றத்தைச் சேர்ந்த இஸ்ரார் அகமதுகான் என்பவர் மகன்
அம்ஜத்கான், 16 (பெயர் மாற்றப்பட்டுள்ளது) ஆகியோர், கண்ணனை அங்கு சிறை
வைத்திருந்தது கண்டுபிடிக்கப்பட்டது. அம்ஜத்கான் கொடுத்த தகவலின்படி, அவனது
சகோதரன் ஹாசம், 22, என்பவனும் பிடிபட்டான்.

அந்த வீட்டில்
இருந்து, ஐந்து நாட்டுத் துப்பாக்கிகள், 44 தோட்டாக்கள் கைப்பற்றப்பட்டன.
இவை அனைத்தும், அம்ஜத்கானின் தந்தை இஸ்ரார் அகமதுகானுக்கு சொந்தமானது
என்பது தெரிந்தது. இதையடுத்து, சுமன், விஜய், அம்ஜத்கான் மற்றும் ஹாசம்
ஆகிய நால்வரையும், போலீசார் கைது செய்தனர்.

கடத்தியது எப்படி? இதுகுறித்து, மேற்கு மண்டல இணை கமிஷனர் சங்கர்

கூறியதாவது:கண்ணன்,
சுமன், அம்ஜத்கான் மற்றும் விஜய் ஆகிய நால்வரும் சேர்ந்து ஊர் சுற்றுவது
வழக்கம். இதில் விஜய், கண்ணனை கடத்தி பணம் பறிக்க திட்டமிட்டு, மற்ற
நண்பர்களிடம் கூறியுள்ளான். அவர்களும் ஒப்புக் கொள்ள, திட்டப்படி, கடந்த
26ம் தேதி, வெளியில் சென்று வரலாம் எனக் கூறி, கண்ணனை அழைத்தனர்.

விஜய்,
கண்ணன் ஆகியோருடன் சுமன், அம்ஜத்கான், ஹாசம் ஆகியோர் சென்றுள்ளனர். வெள்ளை
நிற சைலோ காரை வாடகைக்கு எடுத்து, கிழக்கு கடற்கரை சாலையில் உள்ள
எம்.ஜி.எம்., மற்றும் மகாபலிபுரம் சென்றனர். அதன்பின், சுமன் அவனது
வீட்டிற்கும், விஜய், அம்ஜத்கான் மற்றும் கண்ணன் ஆகியோர், கொடுங்கையூரில்
உள்ள விஜய் வீட்டிற்கும் சென்றுள்ளனர்.

அங்கு கண்ணனை
சிறைபிடித்து வைத்த விஜய், கண்ணனின் தந்தையிடம், ஒரு கோடி ரூபாய் கேட்டு
மிரட்டி உள்ளான். கடத்தலில் ஈடுபட்ட, அம்ஜத்கான் மற்றும் ஹாசம்,
உத்தரபிரதேச மாநிலத்தைச் சேர்ந்தவர்கள்.

இவர்களது தந்தை இஸ்ரார்
அகமதுகான், கடந்த 15 ஆண்டுகளாக சென்னையில், பிளாஸ்டிக் கழிவுகளை மீண்டும்
பயன்படுத்தும் தொழிலை செய்து வந்தார். உத்தரபிரதேசத்தில் இவர் மீது
அதிகளவில் வழக்குகள் உள்ளதால், தற்போது உத்தரபிரதேச சிறையில்
அடைக்கப்பட்டுள்ளார்.இவ்வாறு அவர் கூறினார்.

செல்லமே காரணம்:
தந்தை கிருஷ்ணன் இதுகுறித்து கூறும்போது, ""எங்கு சென்றாலும், வீட்டிற்கு
வந்து விடும் பழக்கம் உள்ள மகன் வராதது குறித்தும், 1 கோடி கேட்டது
குறித்தும் புகார் அளித்த, 4 மணி நேரத்தில், மகனை மீட்டுள்ள போலீசாருக்கு
நன்றி. அவனுக்கு அதிகளவில் செல்லம் கொடுத்ததன் விளைவு தான் இது,'' என்றார்.

"ஒருபோதும்
அனுமதிக்க மாட்டோம்':பீகாரைப் போன்று, தமிழகத்திலும் ஆயுத கலாசாரம் பரவி
வருகிறதா என்ற கேள்விக்கு பதில் அளித்த இணை கமிஷனர் சங்கர், ""ஆயுதங்கள்
வைத்துள்ளனரா என்று, வீடு வீடாக சோதனை நடத்துவது கடினம். இருப்பினும்,
சந்தேகப்படும் இடங்களில், சோதனையிட்டு வருகிறோம். பீகார் சூழல் உருவாக,
தமிழக போலீசார் ஒருபோதும் அனுமதிக்க மாட்டோம்,'' என்றார்.