இன்று பஸ்கள் ஓடும்: அரசு

சென்னை, பிப். 28: பல்வேறு தொழிற்சங்கங்கள் செவ்வாய்க்கிழமை அழைப்பு
விடுத்துள்ள பொது வேலை நிறுத்தத்தால் அரசு பஸ்களின் சேவை பாதிக்கப்படாமல் இருக்க
நடவடிக்கை எடுக்கப்பட்டுள்ளதாக போக்குவரத்துத் துறை அதிகாரிகள் தெரிவித்துள்ளனர்.
மாநிலம் முழுவதும் உள்ள 275 பணிமனைகளுக்கும் திங்கள்கிழமை இரவு முதல் போலீஸ்
பாதுகாப்பு போடப்பட்டுள்ளது.
மத்திய அரசின் புதிய பொருளாதாரக் கொள்கை மற்றும் தொழிலாளர் விரோதப் போக்கைக்
கண்டித்து நாடு முழுவதும் செவ்வாய்க்கிழமை பொது வேலை நிறுத்தம் செய்ய தொழிலாளர்
சங்கங்கள் அழைப்பு விடுத்துள்ளன. இந்தப் பொது வேலை நிறுத்தம் காரணமாக மாநிலத்தில்
ஆட்டோக்கள், பஸ்கள் ஓடுமா என்ற கேள்வி எழுந்துள்ளது.
இதுகுறித்து, போக்குவரத்துத் துறை அதிகாரிகள் கூறியது:
தமிழகத்தில் மொத்தம் எட்டு போக்குவரத்துக் கழகங்கள் செயல்பட்டு வருகின்றன.
விரைவு பஸ்கள் உள்பட மொத்தம் 19 ஆயிரத்து 207 பஸ்கள் இயக்கப்பட்டு வருகின்றன.
அனைத்துப் போக்குவரத்துக் கழகங்களிலும் 88 ஆயிரத்துக்கும் மேற்பட்டோர் பணியாற்றி
வருகிறார்கள். சென்னை மாநகர போக்குவரத்துக் கழகத்தில் மட்டும் 22 ஆயிரத்து 360
ஊழியர்கள் பணியாற்றுகின்றனர்.
மாநிலம் முழுவதும் 20 முதல் 25 சதவீத அளவுக்கு ஊழியர்கள் வேலை நிறுத்தத்தில்
ஈடுபடக் கூடும் என போக்குவரத்துத் துறைக்கு தகவல் வந்துள்ளது. சென்னை மாநகரில்
ஆயிரத்து 640 பணியாளர்கள் வேலை நிறுத்தத்தில் ஈடுபடுவர் என எதிர்பார்க்கப்படுகிறது.
9 ஆயிரம் உபரி பணியாளர்கள்: போக்குவரத்துத் துறையின் ஓட்டுநர்கள் மற்றும்
நடத்துநர்கள் பெருமளவில் வேலை நிறுத்தத்தில் ஈடுபட்டால், உபரிப் பணியாளர்களைக்
கொண்டு பஸ்களை இயக்க நடவடிக்கை எடுக்கப்பட்டுள்ளது. மாநிலத்தில் 4 ஆயிரத்து 616
ஓட்டுநர்களும், 4 ஆயிரத்து 575 நடத்துநர்களும் உபரிப் பணியாளர்களாக உள்ளனர்.
அவர்களுக்கு நாளொன்றுக்கு ரூ.250 மதிப்பூதியமாக வழங்கப்படுகிறது. அவர்களைக் கொண்டு
பஸ்கள் இயக்கப்படும். வேலை நிறுத்த நாளில் பணியாற்றும் போது அவர்களுக்கு இரட்டிப்பு
ஊதியம் வழங்கப்படும். அரசின் இந்த நடவடிக்கைகளால் பஸ் சேவைகள் பாதிக்கப்படாது
என்றனர்.
அரசு போக்குவரத்து சேவைகள் குறித்து புகார் அளிப்பதற்கும், பஸ்கள் இயக்கம்
குறித்த தகவல்களைப் பெறுவதற்கும் கட்டுப்பாட்டு அறை அமைக்கப்பட்டுள்ளது. மாநகர
போக்குவரத்துக் கழகத்துக்கும், விரைவுப் போக்குவரத்துக் கழகத்துக்கும் தனித்தனியே
கட்டுப்பாட்டு அறைகள் அமைக்கப்பட்டுள்ளன.
மாநகர போக்குவரத்துக் கழக கட்டுப்பாட்டு அறையின் செல்போன் எண்: 94450-30533,
விரைவுப் போக்குவரத்துக் கழகத்தின் தொலைபேசி எண்: 044-2479 4709.