உதயகுமாரின் அவதூறு வழக்கை எதிர்கொள்ள தயார்: பிரதமர் அலுவலகம் அறிவிப்பு

புதுடில்லி: ""சுவீடன் நாட்டின் நிதி உதவியுடன் செயல்படும் அரசு சாரா
அமைப்புடன் (என்.ஜி.ஓ.,) உங்களுக்கு என்ன தொடர்பு என்பது குறித்து விளக்கம்
அளிக்க வேண்டும்' என, மத்திய அமைச்சர் நாராயணசாமி, அணுசக்தி எதிர்ப்பாளர்
உதயகுமாருக்கு கேள்வி எழுப்பியுள்ளார்.

மேலும், உதயகுமார் அவதூறு வழக்கு தொடர்ந்தால், அதை எதிர்கொள்ள மத்திய
அரசு தயாராக உள்ளது என்றும் பிரதமர் அலுவலகம் கூறியுள்ளது. சமீபத்தில்,
"சயின்ஸ்' என்ற பத்திரிகைக்கு, பிரதமர் மன்மோகன் சிங் அளித்த பேட்டியில்,
அமெரிக்காவை மையமாகக் கொண்டு செயல்படும் சில அரசு சாரா அமைப்புகள்,
கூடங்குளம் அணு மின் நிலையம் செயல்படுவதற்கு இடையூறு ஏற்படுத்துகின்றன
என்றும், இந்தப் போராட்டத்துக்கு வெளிநாட்டு நிதி பயன்படுத்தப்படுவதாகவும்
கூறியிருந்தார். இது குறித்து மத்திய அமைச்சர் நாராயணசாமி கூறுகையில்,
"மூன்று அரசு சாரா அமைப்புகள், வெளிநாடுகளில் இருந்து வந்த நிதியை,
கூடங்குளம் அணு மின் திட்டத்துக்கு எதிரான போராட்டத்துக்குப்
பயன்படுத்தியது கண்டுபிடிக்கப்பட்டு, அவற்றின் உரிமங்கள் ரத்து
செய்யப்பட்டுள்ளன' என்றார்.

குற்றச்சாட்டு: இதற்கிடையே, நேற்று சென்னையில்
செய்தியாளர்களுக்கு பேட்டி அளித்த அணுசக்தி எதிர்ப்பாளர் உதயகுமார், "
கூடங்குளம் அணு மின் திட்டத்துக்கு எதிரான போராட்டம், வெளிநாட்டு நிதி
உதவியுடன் நடத்தப்படுவதாக பிரதமரும், பிரதமர் அலுவலக விவகாரங்களுக்கான இணை
அமைச்சர் நாராயணசாமியும் கூறியுள்ளனர். இதை எதிர்த்து, அவர்கள்
இருவருக்கும் எதிராக அவதூறு வழக்கு தொடரப்படும்' என்றார்.

அவமதிப்பு வழக்கு: இந்நிலையில், மத்திய அமைச்சர்
நாராயணசாமி,"சுவீடன் நாட்டின் நிதி உதவியுடன் செயல்படும் அரசு சாரா
அமைப்புடன், உங்களுக்கு என்ன தொடர்பு என்பதை விளக்க வேண்டும்' என,
உதயகுமாருக்கு கேள்வி எழுப்பியுள்ளார். மேலும், உதயகுமார் அவதூறு வழக்கு
தொடர்ந்தால், அதை எதிர்கொள்ள மத்திய அரசு தயாராக உள்ளது என்றும் பிரதமர்
அலுவலகம் கூறியுள்ளது.

ரஷ்யா வரவேற்பு: ரஷ்ய தூதர் அலெக்சாண்டர் எம்.கடாகின் நேற்று
கூறுகையில், "பிரதமர் கூறிய குற்றச்சாட்டைத் தான், நாங்களும் நீண்ட
காலமாகக் கூறி வருகிறோம். ஜப்பானின் புக்குஷிமா அணு உலையில் ஏற்பட்ட
பாதிப்புக்குப் பின், திடீரென ஆறு மாதங்கள் கழித்து, கூடங்குளம் அணு மின்
திட்டத்துக்கு எதிராக, சில அரசு சாரா அமைப்புகள் குரல் எழுப்பியது,
சந்தேகத்தை ஏற்படுத்தியது. கூடங்குளம் அணு மின் திட்டம், உலகிலேயே மிகவும்
பாதுகாப்பானது மட்டுமல்ல, மிகச் சிறந்த திட்டமும் கூட' என்றார்.
இதுகுறித்து அமெரிக்க தூதரக அதிகாரி பீட்டர் பர்லெக், கவுகாத்தியில் நேற்று
கூறுகையில், "இந்த விவகாரத்தில் பிரதமர் மன்மோகன் சிங் தெரிவித்த
கருத்துக்கு பதில் அளிப்பதற்கு முன், உண்மை என்ன என்பதை ஆய்வு செய்ய
வேண்டியுள்ளது' என்றார்.