கும்மிடிப்பூண்டியில் ரூ. 330 கோடியில் நீர்த்தேக்கம்: முதல்வர் ஜெயலலிதா உத்தரவு

by **ஜனனி** Wed Jan 25, 2012 6:43 am

சென்னை,
ஜன. 24: திருவள்ளூர் மாவட்டம், கும்மிடிப்பூண்டியில் ரூ. 330 கோடி செலவில்
நீர்த்தேக்கம் அமைக்க தமிழக முதல்வர் ஜெயலலிதா உத்தரவிட்டுள்ளார்.இதுகுறித்து, தமிழக அரசு செவ்வாய்க்கிழமை வெளியிட்ட அறிவிப்பு:சென்னை
மற்றும் அதன் சுற்றுப் பகுதிகளில் நாளுக்கு நாள் பெருகி வரும்
மக்கள்தொகைக்கு ஏற்ப குடிநீரின் தேவை அதிகரித்து வருகிறது. இதைக் கருத்தில்
கொண்டு பல்வேறு குடிநீர் வழங்கும் திட்டங்களைச் செயல்படுத்த முதல்வர்
ஜெயலலிதா உத்தரவிட்டுள்ளார்.அதன் அடிப்படையில், திருவள்ளூர்
மாவட்டம், கும்மிடிபூண்டி வட்டம் கண்ணன்கோட்டை மற்றும் தேர்வைகண்டிகையை
இணைத்து ரூ. 330 கோடி செலவில் நீர்த்தேக்கம் அமைக்க நிர்வாக ஒப்புதல்
அளித்து முதல்வர் ஜெயலலிதா உத்தரவிட்டுள்ளார்.இந்த
நீர்த்தேக்கத்தில் தண்ணீரை இருமுறை நிரப்புவதன் மூலம் ஓராயிரம் மில்லியன்
கனஅடி தண்ணீரைத் தேக்கி வைக்க இயலும். திருவள்ளூர் மாவட்டம் கும்மிடிபூண்டி
வட்டம் பாலவாக்கத்தில் இருந்து 5 கி.மீ. தூரத்திலும்,
ஊத்துக்கோட்டையிலிருந்து 14 கி.மீ. தூரத்திலும் உள்ள இடத்தில் இந்த
நீர்த்தேக்கத்தை அமைக்க திட்டமிடப்பட்டுள்ளது.1,252 ஏக்கர் நிலம்:
கண்டலேறு பூண்டி கால்வாய் நெடுகை பூஜ்யம் மீட்டரில் இருந்து 6,800 மீட்டர்
வரை ஒரு மண் அணை அமைக்கப்படும். மேலும், கண்டலேறு பூண்டி கால்வாய் நெடுகை
900 மீட்டரிலிருந்து 7,500 மீட்டர் நீளத்தில் கால்வாய் அமைக்கப்படும்.
இந்தக் கால்வாய் தாமரைக்குப்பம், செஞ்சி, அகரம், பள்ளிக்குப்பம் கிராமங்கள்
மற்றும் பள்ளிக்குப்பம் காப்பு வனத்தின் வழியாகச் செல்லும்.இந்தக்
கால்வாய் ஆந்திர மாநில நீர்ப்பிடிப்பு பகுதியிலிருந்து கிடைக்கப்பெறும்
நீரை எடுத்துச் செல்கின்ற வகையில் அமைக்கப்படும். மேலும், நெடுகை 4,125
மீட்டரில் உபரிநீர் வழிந்தோடியும், நீரின் போக்கை சீராக்க சமநிலைப்
பொறிகளும் அமைக்கப்படும். இந்தத் திட்டத்துக்காக 560.05 ஏக்கர் அரசு நிலம்
உள்ளிட்ட 1,252.47 ஏக்கர் நிலம் கையகப்படுத்தப்படும். இந்தத் திட்டம்
இரண்டு ஆண்டுகளில் முடிக்கப்படும்.நிலத்தடி நீர் செறிவூட்டல்:
நிலத்தடி நீரின் அளவை அதிகரிக்க செயற்கை முறையில் நிலத்தடி நீர்
செறிவூட்டும் திட்டம் தமிழகத்தில் செயல்படுத்தப்பட்டு வருகிறது. இந்தத்
திட்டத்தின்கீழ் தஞ்சாவூர் மாவட்டம், தஞ்சாவூர் மற்றும் பாபநாசம்
வட்டங்களில் செயற்கை முறையில் செறிவு நீர் துளைகள் அமைக்க ரூ.63.13
லட்சமும், திருவாரூர் மாவட்டம் வலங்கைமான் மற்றும் மன்னார்குடி வட்டங்களில்
துளைகள் அமைக்க ரூ.1.55 கோடியும், கிருஷ்ணகிரி வட்டத்தில் ரூ.3.15
லட்சமும், தருமபுரி மாவட்டம் அரூரில் செறிவு நீர் துளைகளுக்காக ரூ.4.20
லட்சமும் ஒதுக்கப்பட்டுள்ளது.மேலும், திருவண்ணாமலை மாவட்டம்
திருவண்ணாமலை, போளூர், செங்கம் ஆகிய பகுதிகளில் செய்யாற்றின் குறுக்கே
கீழ்மட்ட தடுப்புச் சுவர் அமைக்க ரூ.3.7 கோடி ஒதுக்கீடு செய்து முதல்வர்
ஜெயலலிதா உத்தரவிட்டுள்ளார்.வேலூர் மாவட்டம் காட்பாடி வட்டம்
கொல்லப்பள்ளி கிராமத்தில் பொன்னையாற்றின் குறுக்கே கீழ்மட்ட நிலத்தடி
தடுப்புச் சுவர் அமைக்க ரூ.1.90 கோடியும், திருவண்ணாமலை மாவட்டம்
கொருக்காத்தூர் கிராமத்தில் செய்யாற்றின் குறுக்கே கீழ்மட்ட நிலத்தடி
தடுப்புச் சுவர் அமைக்க ரூ.2.20 கோடியும், தஞ்சாவூர் மாவட்டம்
பட்டுக்கோட்டை வட்டத்தைச் சேர்ந்த 41 கிராமங்களில் உள்ள முறைசார்ந்த
ஏரிகளின் நீர்ப்பிடிப்புப் பகுதிகளில் செயற்கை முறையில் 100 செறிவுநீர்
துளைகள் அமைக்கும் திட்டத்துக்கு ரூ.2.5 கோடியை முதல்வர் ஜெயலலிதா
ஒதுக்கியுள்ளார்.நிலத்தடி நீர் செறிவூட்டும் திட்டப் பணிகளுக்காக
மொத்தம் ரூ.11.49 கோடி ஒதுக்கப்பட்டுள்ளது என்று தமிழக அரசின் அறிவிப்பில்
தெரிவிக்கப்பட்டுள்ளது.