துரோகிகளுக்கு மன்னிப்பே கிடையாது!

சென்னை,டிச.30:
"கட்சியிலிருந்து நீக்கப்பட்ட பின்பும், தலைமை மீது சந்தேகம் வரும்
அளவுக்குப் பேசும் துரோகிகளுக்கு மன்னிப்பே கிடையாது' என முதல்வரும் அதிமுக
பொதுச் செயலாளருமான ஜெயலலிதா எச்சரித்தார்.அதிமுக-வின்
பொதுக்குழுக் கூட்டம் சென்னை வானகரத்தில் உள்ள ஸ்ரீவாரு வெங்கடாசலபதி
திருமண மண்டபத்தில் வெள்ளிக்கிழமை (டிசம்பர் 30) நடைபெற்றது.இதில் ஜெயலலிதா பேசியது:"சட்டப்பேரவைத்
தேர்தலிலும், உள்ளாட்சித் தேர்தலிலும் கட்சியின் மாபெரும் வெற்றிக்கு
அயராது உழைத்த கட்சித் தொண்டர்களுக்கு நன்றியைத் தெரிவித்துக் கொள்கிறேன்.இந்தியாவில்
தமிழகத்தை முதன்மை மாநிலமாக மாற்றுவேன் என்னும் உறுதிமொழியை மக்கள் தங்கள்
ஆள்காட்டி விரல் மையால் வரவேற்று, ஆமோதித்து இருக்கிறார்கள். அந்த
நம்பிக்கையை நிறைவேற்ற வேண்டிய பொறுப்பு நமக்கு இருக்கிறது. இதற்கு கட்சித்
தொண்டர்களின் ஒத்துழைப்பு மிகவும் அவசியம்.பிரதமரைத்
தீர்மானிக்கும் சக்தி: தமிழக எல்லையைக் கடந்து, தேசிய அரசியலிலும் மிகப்
பெரும் சாதனைகளை அதிமுக நிகழ்த்தும் காலம் நம்மை நோக்கி விரைந்து வந்து
கொண்டிருக்கிறது."அனைத்திந்திய' என்று தொடங்கும் நமது கட்சியின்
பெயருக்கேற்ப, 1998-லேயே தேசிய அரசியலிலும் ஒரு பொற்காலத்தை நாம்
உருவாக்கினோம். அன்று வாஜ்பாயைப் பிரதமராக்கி, பாஜக-வுக்கு முதன் முதலாக
நாட்டை ஆளுகின்ற வாய்ப்பை ஏற்படுத்திக் கொடுத்ததில் அதிமுகவின் பங்கு
அளவற்றது.அதுபோல், இப்போதும் இந்திய ஆட்சி அதிகாரத்தில் அமரப்போகிற
பிரதமரைத் தீர்மானிக்கும் சக்தியாக நாம் திகழ்வதற்கான தருணம் கனிந்து
கொண்டிருக்கிறது. அடுத்து அமையப் போகும் மத்திய அரசில் நாம் இருப்போம்
என்பது உறுதி.எனவே, இரண்டு தேர்தல்களில் தொடர்ந்து வெற்றி
பெற்றுவிட்டோம் என்ற மகிழ்ச்சி நமக்கு சோர்வையோ, போதும் என்கிற ஓய்வு
மனப்பான்மையையோ தந்துவிடக் கூடாது. அடுத்த வெற்றிக்கு இப்போதே ஆயத்தமாக
வேண்டும்.இன்னும் பல அரசியல் பொற்காலங்களை உருவாக்குகிற பொறுப்பும் அதற்கான உழைப்பும் உங்களிடம் உள்ளது. அதைச்
செவ்வனே செய்து முடித்துவிட்டால், இன்றைக்கு தமிழகத்தின் உரிமைகளுக்காக,
நீர் ஆதார வளங்களைப் பாதுகாப்பதற்காக, தற்காப்பதற்காக கையேந்தி போராடுகிற
நிலை நமக்கு ஒருபோதும் வராது.தேவைகள் பூர்த்தி செய்யப்படும்:
அலைக்கற்றை போன்ற இமாலய ஊழலாலும், சேது சமுத்திரத் திட்டம் போன்ற
கணக்கெழுதும் திட்டங்களாலும் கொள்ளையடித்து கோடிக்கணக்கான பணத்தை
வைத்திருக்கும் தீய சக்திகளை எதிர்கொண்டு போராடும் கட்சி நிர்வாகிகள் எந்த
அளவுக்குப் பொருளாதார ரீதியாகப் பாதிக்கப்படுகின்றனர் என்பதைக் கட்சி
நிர்வாகம் நன்கு அறிந்துள்ளது.கடமையைச் செய்யுங்கள். உங்களின்
தேவைகள் அறிந்து பூர்த்தி செய்யப்படும். எனவே, தொண்டர்களிடம் நம்
அதிகாரத்தை மறந்து, தோழமை உணர்வோடு பழக வேண்டும்.மக்கள் நலத்
திட்டங்களைக் கடைக்கோடி மக்களிடம் சரியாக கொண்டு சேர்க்கின்ற கடமையை, அரசு
அலுவலர்களோடு சேர்ந்து கட்சி நிர்வாகிகளும் செய்திட வேண்டும்.துரோகிகளுக்கு
மன்னிப்பே கிடையாது: அரசியல்வாதிகளில் பலவிதம் உண்டு. கட்சிக்காரர்களிலும்
பலவிதம் உண்டு. இவர்களில் சிலர் தவறு செய்கின்றனர். அதனால் அவர்கள் மீது
ஒழுங்கு நடவடிக்கை எடுக்கப்பட்டு, கட்சியை விட்டு நீக்கப்படுகின்றனர்.அப்படி
நீக்கப்படும் ஒரு சிலர், இருப்பதை வைத்துக்கொண்டு அமைதியாக இருப்போம் என்ற
முடிவுடன் அரசியலிலிருந்து ஒதுங்கிவிடுவர். ஒரு சிலர் வேறு கட்சியில்
சேர்ந்துவிடலாம் என முடிவு எடுப்பர். தங்களது அரசியல் வாழ்க்கையைத் தொடர்வதற்காக இன்னொரு கட்சியில் சேர்வதில் நாம் தவறு காண முடியாது.ஆனால்,
இன்னும் சிலரோ கட்சியை விட்டு நீக்கப்பட்ட பின்பும், அந்தக் கட்சியைச்
சார்ந்தவர்களை விடாப்பிடியாகத் தொடர்புகொண்டு, ""நாங்கள் மீண்டும்
கட்சியில் இணைந்துவிடுவோம், எனவே எங்களைப் பகைத்துக்கொண்டால் நாங்கள்
மீண்டும் கட்சியில் இணையும்போது உங்களைப் பழிவாங்கிவிடுவோம்'' என்று
மிரட்டுபவர்களாக இருப்பார்கள். இவ்வாறு கட்சித் தலைமையின்
முடிவின்மீது சந்தேகம் ஏற்படுத்தும் விதத்தில் செயல்படும் துரோகிகளுக்கு
மன்னிப்பே கிடையாது. அத்தகையவர்களின் பேச்சை நம்பி, அதன்படி செயல்படுகின்ற
கட்சியினருக்கும் மன்னிப்பே கிடையாது' என்றார் ஜெயலலிதா.சென்னையில் நடைபெற்ற அதிமுக பொதுக்குழு- செயற்குழுக் கூட்டத்தில் பேசுகிறார் கட்சியின் பொதுச் செயலாளரும், முதல்வருமான ஜெயலலிதா.