தவறு செய்தவன் திருந்தப் பார்க்கணும்; தப்பு செய்தவன் வருந்தியாகணும்...

by **ஜனனி** Sun Dec 25, 2011 7:59 am

"யார் எனக்கு எதைச் செய்தாலும், நான் எல்லோருக்கும் நன்மையே செய்வேன்'
போயஸ் தோட்டத்து அதிகார மையங்களை அப்புறப்படுத்தியதற்கு அடுத்த நாள்,
சென்னையில் நடந்த கிறிஸ்துமஸ் விழாவில், முதல்வர் ஜெயலலிதா பேச்சில், இந்த
வாசகமும் அடக்கம்.

25 ஆண்டுகளாக தனக்கு தோழியாய் இருந்த சசிகலாவையும், அவரது கணவர் நடராஜன்
உள்ளிட்ட உறவு முறைகளையும், அ.தி.மு.க.,வில் இருந்து நீக்கி, அதிரடி
நடவடிக்கை எடுத்த நிலையில், இந்த வாசகங்கள் முதல்வரிடம் இருந்து வந்துள்ளன.
சசிகலா குடும்பத்தினர் அதிகார மையங்களாக மாறி நிர்வாகத்தை ஆட்டி வைத்தனர்;
பல்வேறு வகையிலும் முறைகேடாக வசூல் வேட்டை நடத்தினர் என்பதோடு, சொத்து
குவிப்பு வழக்கில் ஜெ., தண்டனை பெற்றால், அடுத்த முதல்வர் யார் என்பது வரை
ஆலோசனை நடத்தினர் என பரபரப்பான தகவல்கள் வெளியான பின்னணியில்தான்,
நீக்குதல் நடவடிக்கை நடந்துள்ளது.

அதிகார மையங்களுக்கு துணை போனவர்கள் பட்டியல் ஒருபுறம் தயாராகிறது;
அதிகாரிகள், அமைச்சர்கள், கட்சி நிர்வாகிகள், எம்.எல்.ஏ.,க்கள் என பட்டியல்
போடப்படுகிறது; அவர்களது நீக்கம் அல்லது மாற்றம் குறித்த அறிவிப்பு
வெளியிடப்படவுள்ளது என்ற நிலையில், கிறிஸ்துமஸ் விழாவில் முதல்வர் என்ன
பேசப்போகிறார் என்ற எதிர்பார்ப்பு அமைச்சர்கள், அதிகாரிகள் உள்ளிட்ட
அனைவரிடமும் அதிகரித்து இருந்தது. இந்த விழாவில் பங்கேற்பதன் மூலம்,
தாங்களது விசுவாசத்தை தெரியப்படுத்தலாம் என்ற நம்பிக்கையோடு, பதவியில்
இருப்போர், இல்லாதோர் என பெருங்கூட்டமே விழாவில் பங்கேற்றிருந்தது. சசிகலா
குடும்பத்தினரின் ஆதரவை பெற முடியாமல் அல்லது அவர்களின் வெறுப்புக்கு
ஆளானதால் பதவிகளை பறிகொடுத்த, "மாஜி'க்கள் கூடுதல் எதிர்பார்ப்போடு
விழாவில் கலந்து கொண்டனர்.

முதல்வரின் பேச்சு குறித்து பேசிய, முன்னாள் அமைச்சர் ஒருவர்
கூறியதாவது: அனைத்து தரப்பிலும் ஒரு பெரிய புயலை ஏற்படுத்தும் மாற்றத்தை
செய்துவிட்டு, அதன் பிறகு பங்கேற்கும் பொது நிகழ்ச்சியில், இப்படி ஒரு
சாந்தமான, அர்த்தம் பொதிந்த வார்த்தைகளை, "அம்மா' பேசியுள்ளார். கட்சியின்
துவக்க காலம் முதல், அவர் மிகவும் நம்பிய, மரியாதை கொடுத்த பலரும் துரோகம்
செய்து விட்டு போன நிலையிலும் கட்சியை காப்பாற்றினார். தற்போதும் ஒரு துரோக
கும்பல் வெளியேற்றப்பட்டுள்ளது. இந்த கும்பலுக்கு விசுவாசமாக
இருந்தவர்கள், அவர்களுக்கு பல்வேறு வகையிலும் உதவி புரிந்த பலர்
கட்சியிலும், அதிகாரிகள் மட்டத்திலும் இருக்கின்றனர். அவர்களில் சிலர் மீது
மட்டும் நடவடிக்கை எடுத்து, கட்சிக்கு விசுவாசமாக கடந்த காலங்களில்
இருந்து, காலச்சூழலால் மாறிப்போனவர்களை மன்னிக்க கூடிய பக்குவத்துடன்தான்,
"மன்னிக்கிறவர் மட்டுமல்ல, மன்னிக்கப்படுபவரும் உயர்கிறார்' என்று, "அம்மா'
குறிப்பிட்டதாகவே நினைக்கிறேன்.

போயஸ்கார்டனில் அதிகாரம் செலுத்தியவர்களுக்கு வேறு வழியில்லாமல்,
"சலாம்' போட்டவர்கள் இருக்கின்றனர்; ஈடுபாட்டோடு அவர்களின் உத்தரவுகளை
செயல்படுத்தியவர்களும் இருக்கின்றனர். இவர்களில் சிலர் அந்த கும்பலுக்கு
மட்டுமே விசுவாசமாக இருந்துள்ளனர். இதில், வேறு வழியில்லாமல் தவறு
செய்பவர்களை, "அம்மா' மன்னித்து விட வாய்ப்புள்ளது. அதே நேரத்தில், அந்த
கும்பலுக்கு மட்டுமே விசுவாசம் காட்டிய தப்பை செய்த அமைச்சர்கள்,
அதிகாரிகள், கட்சி நிர்வாகிகளுக்கு நிச்சயம் தண்டனை வழங்குவார். இவ்வாறு
அவர் தெரிவித்தார்.