போக்குவரத்து முற்றுகைப் போராட்டம்: முல்லை பெரியாறு விவகாரத்தில் வைகோ நெடுமாறன் கைது!

தமிழகத்தில் இருந்து கேரளா
செல்லும் 13 சாலைகளையும் மதிமுகவினர் மற்றும் விவசாய சங்கத்தினர் இன்று
முற்றுகையிட்டனர். இதனால், கேரளாவுக்கு போக்குவரத்து அடியோடு
நிறுத்தப்பட்டது.

முற்றுகை போராட்டத்தில் பங்கேற்ற வைகோ, நெடுமாறன் உள்பட
ஆயிரக்கணக்கானோரை போலீசார் கைது செய்தனர். முல்லை பெரியாறில் புதிய அணை
கட்ட முயற்சிக்கும் கேரள அரசையும் இதில் நடவடிக்கை எடுக்காத மத்திய
அரசையும் கண்டித்து தமிழகத்தின் பல பகுதிகளிலும் மக்கள் போராட்டங்களை
நடத்தி வருகின்றனர்.

கடந்த 16 நாட்களாக குமுளி வழியாக கேரளா - தமிழகம் இடையேயான போக்குவரத்து அடியோடு நிறுத்தி வைக்கப்பட்டுள்ளது.

கேரளாவில் தமிழர்களும் ஐயப்ப பக்தர்களும் தாக்கப்பட்டதால் தமிழகம்
முழுவதும் போராட்டம் பரவியது. ஆங்காங்கே பொதுமக்கள் ஆர்ப்பாட்டம்,
உண்ணாவிரதம், வேலைநிறுத்தம், கடையடைப்பு என தங்கள் எதிர்ப்பை தொடர்ந்து
வெளிப்படுத்தி வருகின்றனர்.

இந்நிலையில், கேரளா செல்லும் 13 சாலைகளையும் இன்று முற்றுகையிட்டு போராட்டம் நடத்தப் போவதாக மதிமுக அறிவித்திருந்தது.

தேனி மாவட்டம் கூடலூர் அருகே லோயர்கேம்ப்பில் நடக்கும் போராட்டத்தில் வைகோ பங்கேற்பார் என்றும் தெரிவிக்கப்பட்டது.

பதற்றம் அதிகரிக்கும் என்பதால் வைகோவை தேனியிலேயே தடுத்து நிறுத்த
போலீசார் முடிவு செய்தனர். தேனி அருகே பி.சி.பட்டியில் எஸ்.பி.
பிரவீன்குமார் அபினபு தலைமையில் 500-க்கும் அதிகமான போலீசார்
குவிக்கப்பட்டிருந்தனர்.

கூட்டத்தை கட்டுப்படுத்த ஆங்காங்கே தடுப்புகள் வைக்கப்பட்டிருந்தன.
அங்கு காலையில் இருந்தே மதிமுகவினரும் விவசாய சங்கத்தினரும் திரண்டனர்.

அவர்களின் வாகனங்கள் மட்டும் கம்பம் வரை செல்ல அனுமதிக்கப்பட்டன.
கம்பத்தில் முற்றுகை போராட்டத்தில் ஈடுபட்ட மதிமுக தொண்டர்கள், விவசாயிகள்
ஆயிரக்கணக்கானோர் கைது செய்யப்பட்டனர்.

போராட்டத்தில் பங்கேற்பதற்காக மதிமுக பொதுச் செயலாளர் வைகோ, கடந்த 3
நாட்களாக ரகசிய இடத்தில் தங்கியிருந்தார். அவர் இருக்கும் இடம் தெரியாமல்
போலீசாரும் உளவுத்துறையினரும் குழப்பமடைந்தனர்.

இன்று காலை கூடலூர் அருகே ஒரு கிராமத்தில் வைகோ இருப்பதாக தகவல்
பரவியது. லோயர்கேம்ப் குருவனூத்து பாலம் அருகே நடக்கும் போராட்டத்தில்
வைகோ பங்கேற்க உள்ளார் என்றும் கூறப்பட்டது.

தேனியில் உறவினர் வீட்டில்தான் இருக்கிறார், தேனியில் இருந்து
நடைபயணமாக செல்ல உள்ளார் என்றும் கூறப்பட்டது. இந்நிலையில் வைகோ தேனியில்
தங்கியிருப்பதை உறுதிப்படுத்திய போலீசார் அவரிடம் பேச்சுவார்த்தை
நடத்தினர்.

முற்றுகை போராட்டத்தை நடத்துவதில் உறுதியாக இருந்த வைகோ, காலை 10.30 மணிக்கு திறந்த ஜீப்பில் கம்பம் நோக்கி புறப்பட்டார்.

அவரை சின்னமனூர் அருகே கீழபூலானந்தபுரம் என்ற இடத்தில் போலீசார்
தடுத்து நிறுத்தினர். வைகோவுடன் தமிழ் தேசிய இயக்க தலைவர் பழ.நெடுமாறன்
மற்றும் விவசாய சங்க நிர்வாகிகளும் வந்தனர்.

உத்தமபாளையத்துக்குள் செல்ல போலீசார் அனுமதிக்காததால் அந்த இடத்திலேயே வைகோ முழக்கங்களை எழுப்பி போராட்டத்தில் ஈடுபட்டார்.

இதையடுத்து வைகோ, நெடுமாறன் உள்ளிட்டவர்களை போலீசார் கைது செய்தனர்.
வைகோ போராட்டம் காரணமாக சின்னமனூர், பாளையம், கம்பம், கூடலூரில் கடைகள்
அடைக்கப்பட்டன.

பஸ்கள் இயக்கப்படவில்லை. சுமார் 30 கிமீ தொலைவுக்கு மக்கள் ஆங்காங்கே மறியலில் ஈடுபட்டு உம்மன்சாண்டி உருவபொம்மைகளை எரித்தனர்.

அனைத்து வழிகளும் முற்றுகை தமிழகத்தில் இருந்து கேரளா செல்லும் அனைத்து பாதைகளிலும் மதிமுகவினர் இன்று முற்றுகையிட்டனர்.

கோவை மாவட்டம் (தெற்கு) கந்தேகவுண்டன்சாவடியில் மதிமுக அவைத்தலைவர் துரைசாமி தலைமையில் முற்றுகை போராட்டம் நடந்தது.

கோவை மாவட்டம் (வடக்கு) ஆனைகட்டி சோதனை சாவடியில் பெரியார் திராவிட கழக
தலைவர் கொளத்தூர் மணி, பொள்ளாச்சி வளந்தாயமரம் சோதனை சாவடியில் தமிழ்
தேசிய விடுதலை இயக்க தலைவர் தியாகு, நடபுணி சோதனை சாவடியில் கணேசமூர்த்தி
எம்.பி., பொள்ளாச்சி கோபாலபுரம் சோதனை சாவடியில் தமிழ்நாடு கொங்கு இளைஞர்
பேரவை அமைப்பாளர் தனியரசு, கோவை மாவட்டம் (தெற்கு) வேலந்தாவளம் சோதனை
சாவடியில் இந்து மக்கள் கட்சி தலைவர் அர்ஜுன் சம்பத் தலைமையில் முற்றுகை
போராட்டம் நடந்தது. தேனி மாவட்டம் கம்பம் மெட்டில் மதிமுக துணை
பொதுச்செயலாளர் மல்லை சத்யா, கன்னியாகுமரி மாவட்டம் களியக்காவிளைவில்
மதிமுக துணை பொது செயலாளர் நாசரேத் துரை, நெல்லை மாவட்டம் செங்கோட்டை
எல்லையில் மதிமுக உயர்நிலைக்குழு உறுப்பினர் நாஞ்சில் சம்பத் தலைமையில்
போராட்டம் நடந்தது.

போராட்டத்தில் ஈடுபட்ட அனைவரும் கைது செய்யப்பட்டனர். கிருஷ்ணசாமி
ஆர்ப்பாட்டம் பெரியாறு அணை விவகாரத்தில் தொடர்ந்து பொய் பிரசாரம் செய்து
வரும் கேரள அரசை கண்டித்து தேனியில் புதிய தமிழகம் கட்சி சார்பில் இன்று
ஆர்ப்பாட்டம் நடந்தது.

கட்சி தலைவர் கிருஷ்ணசாமி தலைமை வகித்து பேசினார். ஏராளமானோர் கலந்து கொண்டனர். கேரள அரசுக்கு எதிராக கோஷங்கள் எழுப்பப்பட்டன.