உயர் பாதுகாப்பு எண் பலகை டெண்டர் தள்ளிப் போவதன் பின்னணி என்ன?

மத்திய சாலை போக்குவரத்து அமைச்சக உத்தரவின்படி, வாகனங்களில், உயர்
பாதுகாப்பு பதிவு எண் பலகை பொருத்த, தமிழக போக்குவரத்துத் துறை ஒப்பந்தம்
வழங்குவதில், இழுபறி தொடர்கிறது.டில்லி, சண்டிகர், மகாராஷ்டிரா உள்ளிட்ட
மாநிலங்களில், உயர் பாதுகாப்பு எண் பலகைகள், படிப்படியாக
அமல்படுத்தப்பட்டுள்ளது.

தகுதிச் சான்று:உயர் பாதுகாப்பு எண் பலகைகளை வடிவமைக்கும்
நிறுவனங்கள், மத்திய சாலை ஆராய்ச்சி மையம் (சி.ஆர்.ஆர்.ஐ.,), "ஆட்டோமொடிவ்
ரிசர்ச் அசோசியேஷன் ஆப் இந்தியா' (ஏ.ஆர்.ஏ.ஐ.,), வாகன ஆய்வு மற்றும்
வளர்ச்சி நிறுவனம் (வி.ஆர்.டி.இ., ), மத்திய இயந்திர பயிற்சி மற்றும் சோதனை
மையம் (சி.எப்.எம்.டி.டி.ஐ.,) ஆகிய நான்கு நிறுவனங்களில், ஏதாவது ஒரு
நிறுவனத்தின் தகுதிச் சான்று பெற்றிருக்க வேண்டும்.நாடு முழுவதும் 18
நிறுவனங்கள் மட்டுமே, இந்த தகுதிப் பட்டியலில் இடம் பெற்றுள்ளன. அதில்,
சென்னை நந்தனத்தில் உள்ள, "சைன்ஸ் இண்டியா லிமிடெட்' என்ற நிறுவனமும்
ஒன்று. தமிழகத்தை பொறுத்தவரை, இந்த ஒரு நிறுவனம் மட்டுமே, இதுவரை தகுதிப்
பட்டியலில் இடம் பெற்றுள்ளது.

தள்ளிப் போன டெண்டர்:"உயர் பாதுகாப்பு எண் பலகைகள் பொருத்தும்
பணிக்காக, அக்., 21ம் தேதி ஒப்பந்த விண்ணப்பம் அளிக்கலாம். அன்று மாலையே
விண்ணப்பங்கள் பரிசீலிக்கப்பட்டு, தகுதி வாய்ந்தவர்களுக்கு உத்தரவு
வழங்கப்படும்' என, முன்பு தெரிவிக்கப்பட்டது.அதன்பின், சில மாற்றங்களை
குறிப்பிட்டு, நவ., 15ம் தேதிக்குள், டெண்டர் விண்ணப்பங்களை அளிக்க
வேண்டும் என, அறிவிக்கப்பட்டது. அந்த தேதியும் மாற்றப்பட்டு, நவ., 21ம்
தேதியை கடைசி நாளாக குறிப்பிட்டு, டெண்டர் விண்ணப்பங்கள்
பெறப்பட்டுள்ளன.ஆனால், எத்தனை விண்ணப்பங்கள் இதுவரை பெறப்பட்டன; அவற்றில்
தகுதியான நிறுவனம் எது என்பதை, போக்குவரத்துத் துறை அறிவிக்கவில்லை.

பின்னணி என்ன?இதுகுறித்து, போக்குவரத்துத் துறை உயர் அதிகாரிகளை தொடர்பு கொண்டபோது, கருத்து தெரிவிக்க மறுத்துவிட்டனர்.

பெயர் வெளியிட விரும்பாத அலுவலர் ஒருவர் கூறியதாவது:தமிழகம்
முழுவதும், அக்டோபர் மாத நிலவரப்படி, ஒரு கோடியே, 46 லட்சத்து, 40
ஆயிரத்து, 734 வாகனங்கள் உள்ளன. இவற்றுக்கெல்லாம் ஒரே சமயத்தில் பதிவு எண்
பலகைகளை பொருத்துவதற்கு எளிதாக, ஆறு மண்டலங்களாக
பிரிக்கப்பட்டுள்ளன.ஒவ்வொரு மண்டலத்திலும், 15 முதல், 20 வட்டார
போக்குவரத்து அலுவலகங்கள் சேர்க்கப்பட உள்ளன. பின்னர், மண்டல வாரியாக உள்ள
வாகனங்களின் எண் பலகைகளை மாற்ற திட்டமிடப்பட்டது.அதிக வருமானம் கிடைக்கக்
கூடிய திட்டம் என்பதால், பல்வேறு தரப்பினரும் போட்டி போடுகின்றனர். ஆனால்,
இவர்களில் பலரிடம் தகுதிச் சான்று இல்லை. இவர்கள் தகுதிச் சான்று
பெறுவதற்கு வசதியாக, டெண்டர் தேதி தள்ளிப் போகிறதோ என்ற சந்தேகம்
எழுந்துள்ளது. அதற்கேற்ப, டெண்டர் ஷரத்துக்களிலும், பல மாற்றங்கள்
செய்யப்பட்டுள்ளன.இவ்வாறு, அவர் தெரிவித்தார்.

இருமுறை திருத்தம்:தமிழகத்தில், டெண்டர் கோரும்
நிறுவனங்களுக்கான விதிமுறைகள், இரு முறை மாற்றப்பட்டது. இது சில
நிறுவனங்களுக்கு ஆதாயம் தரும் வகையில் இருந்ததா என்ற, சந்தேகம்
எழுந்துள்ளது.
* டெண்டர் கோரும் நிறுவனம், ஆண்டுக்கு 40 கோடி ரூபாய்க்கு
வர்த்தகம் செய்திருக்க வேண்டும், என்ற விதி, 50 கோடியாக
உயர்த்தப்பட்டுள்ளது.
* இரண்டு நிறுவனங்கள் வரை கூட்டாக விண்ணப்பம் செய்யலாம், என்ற விதி, மூன்று நிறுவனங்கள் வரை கூட்டு வைப்பதற்கு மாற்றப்பட்டுள்ளது.
*
மாநிலம் முழுவதும், ஆறு டிவிஷன்களாக டெண்டர் வழங்கப்பட இருந்தது. தற்போது,
ஒரே நிறுவனம் தான் மாநிலம் முழுவதும் டெண்டர் பெற முடியும், என,
மாற்றப்பட்டுள்ளது.
இவை உள்ளிட்ட பல ஷரத்துக்கள் திருத்தம் செய்யப்பட்டுள்ளன.

- எஸ். கோவிந்தராஜ் -