அத்வானியை கொல்ல முயன்ற சதிகாரர்கள் கேரளாவில் பதுங்கல்!

மதுரை: அத்வானியை வெடிகுண்டு வைத்து கொல்ல முயன்ற சதிகாரர்கள் கேரள
மாநிலத்துக்கு தப்பிச் சென்றுள்ளதாக திடுக்கிடும் தகவல் வெளியாகி உள்ளது.
ஊழல் மற்றும் கருப்பு பணத்துக்கு எதிராக பாஜ மூத்த தலைவர் அத்வானி நாடு
முழுவதும் ரத யாத்திரை மேற்கொண்டு வருகிறார். கடந்த 28ம் தேதி காலை
மதுரையில் இருந்து ரத யாத்திரையை தொடங்கினார். மதுரை - ராஜபாளையம்
சாலையில், திருமங்கலம் அடுத்த ஆலம்பட்டி வழியாக யாத்திரை செல்ல இருந்தது.
இந்நிலையில் ஆலம்பட்டி அருகே உள்ள தரைப்பாலத்தின் அடியில் பைப் வெடிகுண்டு
இருந்தது கண்டுபிடிக்கப்பட்டது.

அத்வானியின் வாகனம் பாலத்தில்
வரும் போது வெடிக்க செய்யும் வகையில் 96 மீட்டர் தூரத்திற்கு வயர் மூலம்
பேட்டரியுடன் இணைப்பு கொடுக்கப்பட்டிருந்தது. போலீசார் விரைந்து செயல்பட்டு
வெடிகுண்டை செயலிழக்க செய்தனர். மேலும் அத்வானியின் ரதயாத்திரையும் வேறு
பகுதி வழியாக திருப்பி விடப்பட்டது. இந்த சதிச்செயல் தொடர்பாக சிறப்பு
புலனாய்வு போலீசார் தீவிர விசாரணை மேற்கொண்டு வருகின்றனர். இந்நிலையில்,
இதுதொடர்பாக பல திடுக்கிடும் தகவல்கள் வெளியாகி உள்ளன. அத்வானி வருவதற்கு 5
நாட்களுக்கு முன்னரே சதிகாரர்கள் ஆலம்பட்டி பாலத்தை நோட்டமிட்டுள்ளனர்.
கார் டிரைவரை சேர்த்து அந்த கும்பலில் 5 பேர் இருந்துள்ளனர்.

அத்வானி
வரும் நாளன்று ஆலம்பட்டி அருகே உள்ள காட்ராம்பட்டியில் அவர்கள் பதுங்கி
இருந்துள்ளனர். வெடிகுண்டு கண்டுபிடிக்கப்பட்டு செயலிழக்கச்
செய்யப்பட்டதால், அவர்கள் உடனே காரில் ஏறி தப்பிச் சென்றுள்ளனர்.
ராஜபாளையம் வழியாக விருதுநகர் நான்கு வழிச்சாலையை அவர்களின் கார்
அடைந்துள்ளது. அதன்பின்னர் அவர்கள் நாகர்கோவில் வழியாக கேரள மாநிலம் தப்பி
சென்றுள்ளனர். இதுகுறித்து போலீஸ் உயரதிகாரி ஒருவர் கூறுகையில், ‘’பைப்
வெடிகுண்டு வைக்கப்பட்ட சம்பவத்தில் குற்றவாளிகளை நெருங்கி விட்டோம்.
இரண்டொரு நாளில் அவர்கள் பிடிபடுவர். அதன் பின்னர் முழுவிவரங்கள்
தெரிவிக்கப்படும்’’ என்றார்.