பெங்களூர் நீதிமன்றத்தில் ஜெயலலிதாவிடம் ஐந்தரை மணி நேரம் விசாரணை; வெள்ளிக்கிழமையும் ஆஜராகிறார்!

by **அருள்** Fri Oct 21, 2011 7:35 am

சென்னை, அக்.20,2011

பெங்களூர் நீதிமன்றத்தில் ஜெயலலிதாவிடம் ஐந்தரை மணி நேரம் விசாரணை; வெள்ளிக்கிழமையும் ஆஜராகிறார்! Jaya1%2829%29

சொத்து குவிப்பு வழக்கில், தமிழக முதல்வர் ஜெயலலிதாவிடம் நாளையும் (வெள்ளிக்கிழமை) பெங்களூர் தனி நீதிமன்றம் விசாரணை நடத்துகிறது.

தனி நீதிமன்றத்தில் 14 ஆண்டு காலமாக நடந்து வந்த வழக்கில் முதல்வர் ஜெயலலிதா முதல் முறையாக வியாழக்கிழமை ஆஜரானார்.

பரப்பன அக்ரஹாரத்தில் உள்ள மத்திய சிறை வளாகத்தில் அமைக்கப்பட்டுள்ள தனி
நீதிமன்றத்தில் ஜெயலலிதா, சசிகலா உள்பட 4 பேரிடம் காலை 11 மணிக்கு விசாரணை
தொடங்கியது. பெங்களூர் தனி நீதிமன்ற நீதிபதி மல்லிகார்ஜுனையா இந்த
விசாரணையை மேற்கொண்டார். அப்போது, ஜெயலலிதாவிடம் சரமாரியாக கேள்விகள்
கேட்கப்பட்டதாக தெரிகிறது.

சுமார் ஐந்தரை மணி நேரம் ஜெயலலிதாவிடம் சொத்து குவிப்பு குற்றச்சாட்டுகள்
தொடர்பாக கேள்விகள் கேட்கப்பட்டன. அவர் தனது வாக்குமூலத்தை அளித்தார். இந்த
விசாரணை பிற்பகல் 4.30 மணிக்கு முடிந்தது.

300 கேள்விகள்...

ஜெயலலிதாவிடம் சுமார் 300 கேள்விகள் கேட்கப்பட்டதாகவும், அனைத்துக்
கேள்விகளுக்கும் எவ்விதத் தயக்கமோ சோர்வோ இல்லாமல் அவர் பதிலளித்ததாகவும்
ஜெயலலிதா தரப்பு வழக்கறிஞர் குமார் தெரிவித்தார்.

இந்த வழக்கில் ஜெயலலிதாவிடம் மேலும் 400-க்கும் மேற்பட்ட கேள்விகள் கேட்கப்படவுள்தாக நீதிமன்ற வட்டாரங்கள் தெரிவித்தனர்.

சென்னை திரும்பும் ஜெயலலிதா மீண்டும் வெள்ளிக்கிழமை காலை பெங்களூர் நீதிமன்றத்தில ஆஜாராவர் என அவரது வழக்கறிஞர் தெரிவித்தார்.

வரலாறு காணாத பாதுகாப்பு...

தனி நீதிமன்றத்தில் ஆஜராவதற்காக, தமிழக முதல்வர் ஜெயலலிதா இன்று காலை சென்னையில் இருந்து தனி விமானம் மூலம் பெங்களூர் சென்றார்.

ஜெயலலிதாவுடன் அவரது தோழி சசிகலா உள்ளிட்டோரும் பெங்களூர் தனி நீதிமன்றத்தில் காலை 10.30 மணியளவில் சென்றடைந்தனர்.

முன்னெச்சரிக்கை நடவடிக்கையாக, தனி நீதிமன்ற வளாகத்தில் 144 தடை உத்தரவு அமல்படுத்தப்பட்டது.

பெங்களூரில் ஜெயலலிதாவை வரவேற்பதற்கு அதிமுகவின் முக்கிய பிரமுகர்கள் பலரும் திரண்டிருந்தனர்.

முதல்வர் ஜெயலலிதா ஆஜரான பரப்பன அக்ரஹாரத்தில் உள்ள மத்திய சிறை வளாகத்தில்
அமைக்கப்பட்டுள்ள பெங்களூர் தனி நீதிமன்றத்தில் வரலாறு காணாத பாதுகாப்பு
போடப்பட்டது.

பெங்களூர் விமான நிலையத்தில் இருந்து தனி நீதிமன்றம் வரை போலீஸார்
குவிக்கப்பட்டுள்ளது. ஜெயலலிதாவுக்கு இஸட் பிரிவு பாதுகாப்பை கர்நாடக அரசு
அளித்துள்ளது.

வழக்கின் பிண்ணனி...

முன்னதாக, 1991-95-ம் ஆண்டு முதல்வராக இருந்த ஜெயலலிதா, வருமானத்துக்கு
அதிகமாக ரூ.66 கோடி சொத்து சேர்த்ததாக அவர் மீது வழக்கு தொடரப்பட்டது.
பிறகு அவரது தோழி சசிகலா, இளவரசி, சுதாகரன் ஆகியோரும் இந்த வழக்கில்
சேர்க்கப்பட்டனர். பின்னர், உச்ச நீதிமன்றத்தின் வழிகாட்டுதலின்படி,
சென்னையில் இருந்து பெங்களூருவுக்கு இந்த வழக்கு மாற்றப்பட்டது.

சொத்துக் குவிப்பு வழக்கின் விசாரணை இறுதிகட்டத்தை எட்டிய நிலையில்,
இவ்வழக்கில் குற்றம் சாட்டப்பட்ட சசிகலா, இளவரசி இருவரும் கடந்த ஜூலை 20-ம்
தேதி, பெங்களூரு நீதிமன்றத்தில் ஆஜரானார்கள். உடல் நலத்தைக் காரணம் காட்டி
சுதாகரன் வரவில்லை. பாதுகாப்புக் காரணங்களைக் காட்டி ஜெயலலிதாவும்
ஆஜராகவில்லை.

கடைசியில், அரசுத் தரப்பு அட்வகேட் ஜெனரல் ஆச்சார்யாவின் அதிரடி வாதங்களால்
வேறு வழி இல்லாமல், பெங்களூரு நீதிமன்றத்தில் ஜெயலலிதா ஆஜராகவேண்டிய நிலை
ஏற்பட்டது.

அக்டோபர் 20-ம் தேதி பெங்களூர் நீதிமன்றத்தில் ஆஜராக வேண்டும் என்று கடந்த மாதம் உச்ச நீதிமன்றம் உத்தரவிட்டிருந்தது.

இதன் தொடர்ச்சியாக, பாதுகாப்புக் காரணங்களைச் சுட்டிகாட்டி, பெங்களூர்
நீதிமன்றத்தில் ஆஜராவதற்கு 2 வார அவகாசம் அளிக்க வேண்டும் என்று உச்ச
நீதிமன்றத்தில் ஜெயலலிதா சார்பில் மனு தாக்கல் செய்யப்பட்டிருந்தது.

ஆனால், கர்நாடக காவல்துறை அளித்த உத்தரவாதத்தை ஏற்று, பெங்களூர் சிறப்பு
நீதிமன்றத்தில் குறிப்பிட்டபடி இன்று தமிழக முதல்வர் ஜெயலலிதா ஆஜராக
வேண்டும் என்று உச்ச நீதிமன்றம் புதன்கிழமை உத்தரவிட்டது
குறிப்பிடத்தக்கது.