ரூ.2160 கோடியில் 12,000 குடியிருப்புகள் : திருமழிசையில் சாட்டிலைட் டவுன்ஷிப்!

var section=3385;var width=300;var height=250;var enc=1;var clicktag="";var pop=0;

சென்னை: சென்னையை அடுத்த திருமழிசையில் ரூ.2,160 கோடி மதிப்பீட்டில்
அனைத்து வசதிகளுடன் கூடிய துணைக்கோள் நகரம் (சாட்டிலைட் டவுன்ஷிப்)
அமைக்கப்படும். நலிந்த பிரிவினர் மற்றும் குறைந்த வருவாய் உள்ளவர்கள்
வாங்கும் வகையில் அங்கு 12 ஆயிரம் குடியிருப்புகள் கட்டப்படும் என்று
சட்டசபையில் முதல்வர் ஜெயலலிதா அறிவித்தார். சட்டசபையில் பேரவை விதி 110-ன்
கீழ் முதல்வர் ஜெயலலிதா இன்று ஒரு அறிக்கை தாக்கல் செய்து கூறியதாவது:

சென்னை
மாநகரம் வெகு வேகமாக விரிவடைந்து வருகிறது. வீட்டு மனை மற்றும்
அடுக்குமாடி குடியிருப்புகளின் விலை பெருமளவு உயர்ந்துள்ளது. ஏழை, எளிய,
நடுத்தர மக்கள் சொந்தமாக வீடு வாங்குவது கடினமாக உள்ளது. இந்த நிலையை
கருத்தில் கொண்டு எல்லா தரப்பு மக்களுக்கும் வீடுகள் கிடைக்கும் வகையில்
பல்வேறு வீட்டு வசதி திட்டங்களை அரசு செயல்படுத்த உள்ளது. சென்னை -
பெங்களூர் நெடுஞ்சாலையில் திருமழிசை அருகே தமிழ்நாடு வீட்டு வசதி
வாரியத்திடம் 311 ஏக்கர் நிலம் உள்ளது.

இந்த நிலத்தில் 2,160 கோடி
ரூபாய் செலவில், செம்பரம்பாக்கம், குத்தாம்பாக்கம், பர்வதராஜபுரம்,
நரசிங்கபுரம் மற்றும் வெள்ளவேடு கிராமங்களை உள்ளடக்கிய ‘திருமழிசை
துணைக்கோள் நகரம்’ (சாட்டிலைட் டவுன்ஷிப்) அமைக்கப்படும். இந்த துணைக்கோள்
நகரம் குடிநீர் வசதி, கழிவுநீர் அகற்றும் வசதி, சாலைகள், மழைநீர் வடிகால்,
தெருவிளக்குகள், சமுதாய கூடம், பள்ளி, மருத்துவமனை, பஸ் நிலையம், பூங்கா,
விளையாட்டு திடல் போன்ற அடிப்படை வசதிகளுடன் அமைக்கப்படும்.

மேலும்
இந்த நகரத்தில் 12 ஆயிரம் அடுக்குமாடி குடியிருப்புகள் கட்டப்பட்டு,
பொருளாதாரத்தில் நலிந்த பிரிவினர், குறைந்த மற்றும் நடுத்தர வருவாய்
பிரிவினர் ஆகியோர் எளிதில் வாங்கக்கூடிய விலையில் வழங்கப்படும். சென்னை
அசோக்பில்லர் அருகில் தமிழ்நாடு வீட்டு வசதி வாரியத்துக்கு சொந்தமான 3.73
ஏக்கர் நிலப்பரப்பில் மர உற்பத்தி தொழிற்சாலை இருந்தது. இது, கடந்த 15
ஆண்டுகளாக பயன்படாமல் இருந்தது. இந்த இடத்தில் 100 கோடி ரூபாய்
மதிப்பீட்டில் 554 குடியிருப்புகள் கொண்ட அடுக்குமாடி குடியிருப்புகள்
கட்டப்படும்.

கோயம்பேடு தெற்காசிய விளையாட்டு கூட்டமைப்பு
கிராமத்தில் 5.6 ஏக்கர் காலி நிலம் வீட்டு வசதி வாரியத்திடம் உள்ளது. இந்த
இடம், சென்னை புறநகர் பஸ் நிலையத்தை ஒட்டியும், உள்வட்டச் சாலை முகப்பிலும்
உள்ளது. இந்த காலி இடத்தில் 116 கோடி ரூபாய் மதிப்பீட்டில் 4.66 லட்சம்
சதுர அடி பரப்பளவில் பல அடுக்கு வணிக வளாகம் கட்டப்படும். மேலும் 33 கோடி
ரூபாய் மதிப்பீட்டில் 1.44 லட்சம் சதுர அடி பரப்பளவில் 120 குடியிருப்புகள்
கட்டப்படும்.
2011-ம் ஆண்டு, தமிழ்நாடு வீட்டு வசதி வாரியத்தின்
பொன்விழா ஆண்டு ஆகும்.

இதை முன்னிட்டு வாரியத்தின் திட்டங்கள்,
மனை, வீடு, அடுக்குமாடி குடியிருப்பு ஒதுக்கீட்டில் மாற்று திறனாளிகளுக்கு
வழங்கப்படும் 1 சதவீத இட ஒதுக்கீட்டை 3 சதவீதமாக உயர்த்தி வழங்க அரசு
முடிவெடுத்துள்ளது. தமிழ்நாடு குடிசைப் பகுதி மாற்று வாரியத்திடம்,
நந்தனத்தில் 15.78 மனை நிலம் உள்ளது.

இந்த இடத்தில் 100 கோடி
ரூபாய் செலவில் பசுமை திட்ட அம்சங்களுடன் 2 லட்சம் சதுர அடி பரப்பளவில் 17
மாடிகள் கொண்ட அலுவலக வளாகம் கட்டப்படும். இந்தக் கட்டிடத்தை அலுவலக
பயன்பாட்டுக்கு வாடகைக்கு விடுவதன் மூலம் கிடைக்கும் வருவாயை கொண்டு,
தமிழ்நாடு குடிசை மாற்று வாரியத்தால் கட்டப்பட்ட குடியிருப்புகளில்
பராமரிப்பு பணிகள் மேற்கொள்ளப்படும். இவ்வாறு முதல்வர் ஜெயலலிதா கூறினார்.