சமச்சீர் பாட நூல்களில் கருணாநிதி கவிதை உள்பட 41 பகுதிகள் நீக்கம்

by **mmani** Thu Aug 11, 2011 8:18 am

சமச்சீர் பாட நூல்களில் கருணாநிதி கவிதை உள்பட 41 பகுதிகள் நீக்கம்

சென்னை,
ஆக.10-சமச்சீர் பாட நூல்களிலிருந்து, முன்னாள் முதல்வர் கருணாநிதி எழுதிய
கவிதைகள் உள்பட 41 பகுதிகள் நீக்கப்பட்டுள்ளன. அவை “ஸ்டிக்கர்” ஒட்டி
மறைக்கப்படுகின்றன.
அனைத்து பள்ளிகளுக்கும் சமச்சீர் பாடபுத்தகங்கள் வினியோகம் செய்யப்பட்டு வருகின்றன.
சமச்சீர்
பாடப்புத்தகத்தில் முன்னாள் முதல்-அமைச்சர் கருணாநிதி எழுதிய கவிதைகள்,
செம்மொழி வாழ்த்து, சென்னை சங்கமம், புதிய தலைமை செயலகம், உள்ளிட்ட பல
பாடங்கள் மற்றும் படங்கள் இடம் பெற்றுள்ளன. அவற்றை நீக்கி மாணவர்களுக்கு
வழங்க பள்ளி கல்வித்துறை முடிவு செய்துள்ளது.
புத்தகங்கள்
மாணவர்களுக்கு வழங்கப்படுவதற்கு முன் இவை நீக்கப்படுகின்றன. நீக்கப்பட உள்ள
41 பகுதிகளில் ஸ்டிக்கர் ஒட்டியும், கறுப்பு மையாலும் அழிக்கப்படுகின்றன.
தமிழ், ஆங்கிலம், சமூக அறிவியல் ஆகிய மூன்று பாட புத்தகங்களில் இந்த
மாற்றம் செய்யப்படுகிறது.
2-வது வகுப்பு தமிழ் பாடபுத்தகம் 5-ம்
பக்கத்தில் உள்ள முன்னாள் முதல்-அமைச்சர் கருணாநிதி எழுதிய செம்மொழி
வாழ்த்து, 73-ம் பக்கத்தில் உள்ள செம்மொழி மாநாட்டு காட்சிகள் தமிழாய்வு
மத்திய நிறுவனம் பகுதி ஆகியவை ஸ்டிக்கர் ஒட்டி மறைக்கப்படுகின்றன.
அது
போன்று அனைத்து வகுப்புகளிலும் உள்ள செம்மொழி வாழ்த்து பகுதி
நீக்கப்படுகிறது. 9-வது வகுப்பு தமிழ்ப் பாட புத்தகத்தில் தமிழ்
புத்தாண்டின் தொடர்கதை தொடரை நீக்க வேண்டும். 10-வது வகுப்பு தமிழ்
பாடத்தில் 89-ம் பக்கத்தில் உள்ள கருணாநிதி எழுதிய கவிதை பகுதி நீக்கப்பட
வேண்டும். 10-வது வகுப்பு தமிழ் புத்தகத்தில் 239-வது பக்கத்தில் உள்ள
செம்மொழி தமிழாய்வு நடுவர் நிறுவனத்தின் பாவேந்தர் செம்மொழி தமிழாய்வு
நூலகம், சென்னை புனித ஜார்ஜ் கோட்டையில் இயங்கி வருகிறது என்ற வாசகத்தை
கருப்பு மை கொண்டு அழிக்க வேண்டும்.
10-வது வகுப்பு தமிழ்
புத்தகத்தில் 100-வது பக்கத்தில் “கலைஞரின் இனிய நடை” என்ற பகுதி
மறைக்கப்பட வேண்டும். 4-வது வகுப்பு சமூக அறிவியல் புத்தகத்தில் 111-வது
பக்கத்தில் சென்னை சங்கமம் தொடர்பான தகவல்கள் நீக்கப்பட வேண்டும். 5-வது
வகுப்பு சமூக அறிவியல் 80-வது பக்கத்தில் உள்ள புதிய தலைமை செயலகம்
கட்டிடம் படம் மறைக்கப்பட வேண்டும்.
அதே புத்தகத்தில் 86-வது
பக்கத்தில் கலைஞர் காப்பீடு திட்டம் என்ற தொடரை அழிக்க வேண்டும். மேலும்,
அதே புத்தகத்தில் 114-வது பக்கத்தில் புதிய தலைமை செயலகம்-2010 மார்ச்
மாதம் 13-ந் தேதி முதல் ஓமந்தூரார் தோட்டத்தில் இயங்கி வருகிறது என்ற
பகுதியை அழிக்க வேண்டும். 10-வது வகுப்பு சமூக அறிவியல் புத்தகத்தில்
111-வது பக்கத்தில் தி.மு.க. அரசின் சாதனைகள் குறித்த பகுதியை நீக்க
வேண்டும். அதே புத்தகத்தில் 112-வது பக்கத்தில் திராவிட முன்னேற்ற கழகம்
என்ற சொல் நிரந்தர கருப்பு மையால் அழிக்கப்பட வேண்டும். அதே புத்தகத்தில்
277-வது பக்கத்தில் தமிழக அரசின் அவசர கால சேவை 108 என்ற பகுதியை மறைக்க
வேண்டும் என்று கூறப்பட்டுள்ளது. இவை உள்ளிட்ட 41 பகுதிகள் சமச்சீர் பாட
புத்தகத்தில் இருந்து நீக்கப்படுகின்றன.