ஏராளமான ஆவணங்கள் சிக்கியதால் மம்முட்டி, மோகன்லால் வீடுகளில் இன்று மீண்டும் அதிரடி சோதனை:17 இடங்களில் வருமானவரி துறையினர் வேட்டை

திருவனந்த1ரம், ஜூலை. 25-


மலையாள
திரையுலகின் முன்னணி நட்சத்திரங்கள் மோகன்லால், மம்முட்டி இருவரும்
வரிஏய்ப்பு செய்வதாக வருமானவரி துறையினருக்கு புகார்கள் சென்றன.

இதையடுத்து
சென்னை, கொச்சி, திருவனந்தபுரம், பெங்களூர் ஆகிய நகரங்களில் உள்ள
இவர்களின் வீடு மற்றும் அலுவலகங்களில் வருமான வரித்துறை அதிகாரிகள் கடந்த
22-ந்தேதி திடீர் சோதனை நடத்தினர். விடிய விடிய நடந்த இந்த சோதனையில்
மம்முட்டி வீட்டில் இருந்து ரூ.15 லட்சம் ரொக்கப்பணம் மற்றும் ஆவணங்கள்
கைப்பற்றப்பட்டது.

மோகன்லால் வீட்டில் இருந்து
யானை தந்தம், விலை மதிப்புள்ள கலைப் பொருட்கள் மற்றும் தஸ்தாவேஜூகள்
கைப்பற்றப்பட்டன. இவை அனைத்தையும் வருமான வரித்துறையினர் கொச்சியில் உள்ள
அலுவலகத்திற்கு கொண்டுச் சென்றனர். அவற்றை மதிப்பீடு செய்யும் பணி
நடந்தது.

அத்துடன் மம்முட்டியிடமும்
மோகன்லாலிடமும் விசாரணைகளும் நடைபெற்றன. மோகன்லால் ராமநாதபுரம் அருகே
படப்பிடிப்பில் இருந்தார். மதுரையில் இருந்து சென்ற வருமானவரித்துறை
அதிகாரிகள் மோகன்லால் இருந்த கேரவனுக்குள் புகுந்து விசாரித்தனர். அவர்
மேக்கப்பை கலைக்காமலேயே பதில் அளித்தார். மம்முட்டியிடம் கொச்சியில் 7 மணி
நேரம் விசாரித்தனர்.

மோகன்லாலை இன்று
கொச்சியில் உள்ள வருமான வரித்துறை அலுவலகத்திற்கு விசாரணைக்கு வருமாறு
அதிகாரிகள் கூறினர். அவரது வீட்டில் இருந்தும், அலுவலகத்தில் இருந்தும்
கைப்பற்றப்பட்ட ஆவணங்களை அதிகாரிகள் ஏற்கனவே பரிசோதித்து விட்டனர்.

இதன்
அடிப்படையில் அவர்கள் தயாரித்துள்ள கேள்விகளுக்கு பதில் பெறுவதற்காக
மோகன்லால் இன்று அலுவலகத்திற்கு அழைக்கப்பட்டார். அவர் சினிமாவில் நடிக்க
வாங்கும் சம்பளம், இது தொடர்பாக அரசுக்கு வழங்கிய வருமானவரி போன்றவை அவர்
தாக்கல் செய்த தாஸ்தாவேஜூகளுடன் ஒத்துப்போகிறதா? என்பதை அதிகாரிகள் ஆய்வு
செய்கின்றனர்.

மோகன்லாலின் வீட்டில்
"பயோமெட்ரிக்" முறையில் பூட்டப்படும் ரகசிய சென்சார் அறை ஒன்று இருந்ததை
அதிகாரிகள் கண்டுபிடித்து உள்ளனர். அவர்கள் சோதனை செய்த போது வீட்டில்
மோகன்லால் இல்லாததால் அந்த அறையை அதிகாரிகளால் திறக்க முடியவில்லை. எனவே
இன்று அவரையும் அழைத்துக் கொண்டு வீட்டுக்குச் சென்று அந்த ரகசிய அறையை
திறந்து அங்கு என்ன இருக்கிறது? என்பதை கண்டறிய அதிகாரிகள் திட்டமிட்டனர்.


அதன்படி இன்று இரண்டாவது தடவையாக மம்முட்டி,
மோகன்லால் வீடுகளில் அதிரடி சோதனை நடந்தன. ஏற்கனவே நடந்த சோதனையில் இருவர்
வீடுகளிலும் ஏராளமான ஆவணங்கள் சிக்கியதால் இன்று மீண்டும் சோதனை
நடத்தப்பட்டதாக வருமானவரித்துறை வட்டாரத்தில் தெரிவிக்கப்பட்டது.

சென்னையில்
அடையாறு கிரீன்வேஸ் சாலையில் உள்ள மம்முட்டி வீட்டில் இன்று காலை
வருமானவரி அதிகாரிகள் கார்களில் வந்து இறங்கினர். ஒவ்வொரு அறையாக சென்று
சோதனை நடத்தினார்கள்.

எழும்பூரில் உள்ள மோகன்லால்
வீட்டிலும் சோதனை நடந்தது. இதுபோல் பெங்களூர், திருவனந்தபுரம், கொச்சி
போன்ற பகுதிகளிலும் சோதனை நடந்தது. மொத்தம் 17 இடங்களில் இந்த சோதனை
நடைபெற்றன. இதில் மேலும் ஏராளமான தஸ்தாவேஜுகள் கைப்பற்றப்பட்டதாக
கூறப்படுகிறது.