அரசு மருத்துவமனைகள் அனைத்தும் கம்ப்யூட்டர் மயம்

by **அருள்** Sat Jul 16, 2011 7:26 am

திருப்பூர்: திருப்பூர் மாவட்டத்தில் உள்ள அரசு மருத்துவமனைகள்
கம்ப்யூட்டர் மயமாகின்றன. அதில், சிகிச்சைக்கு வரும் நோயாளிகள் விவரம்,
அளிக்கப்படும் சிகிச்சை, வழங்கப்படும் மருந்து விவரம் பதியப்படும்.
அந்நோயாளிகளுக்கு "பார் கோடு'டன் கூடிய "பின் நம்பர்' வழங்கப்படும். அதை
பயன்படுத்தி, தமிழகத்தில் உள்ள எந்தவொரு அரசு மருத்துவமனையிலும்
அடுத்தகட்ட சிகிச்சை பெற முடியும். தமிழகத்தில் உள்ள அனைத்து அரசு
மருத்துவமனைகளையும் கம்ப்யூட்டர்மயமாக்க தனி "சாப்ட்வேர்'
உருவாக்கப்பட்டுள்ளது. அதில், நோயாளிகளின் விவரங்களை "ஆன்லைனில்' பதிவு
செய்ய முடிவு செய்யப்பட்டுள்ளது. இத்திட்டம், காஞ்சிபுரம், திருவள்ளூர்
மாவட்டங்களில் முதல்கட்டமாக துவக்கப்பட்டுள்ளது. விரைவில் தமிழகம்
முழுவதும் விரிவுபடுத்த திட்டமிடப்பட்டுள்ளது.

இத்திட்டம்
குறித்து மாவட்ட ஒருங்கிணைப்பாளர் ஒருவர் கூறியதாவது: தேசிய ஊரக நல
மேம்பாட்டு திட்டத்தின் கீழ் தமிழகம் முழுவதும் 32 மாவட்ட தலைமை அரசு
மருத்துவமனை கள், 220 தாலுகாவில் உள்ள அரசு மருத்துவ மனைகள் கம்ப்யூட்டர்
மயமாக்கப்பட உள்ளன. அனைத்து இடங்களுக்கும் கம்ப்யூட்டர், டேபிள், இருக்கை,
யூ.பி.எஸ்., மற்றும் அதற்கான உபகரணங்கள் வழங்கப்பட்டு வருகின்றன. சிகிச்சை
பெற வரும் நோயாளிகளின் பெயர், முகவரி, வயது, பாலினம் உள்ளிட்ட விவரங்களை
பதிவு செய்து, அவர்களுக்கென எட்டு இலக்கம் கொண்ட தனி "பின் நம்பர்'
மற்றும் "பார் கோடு' கொண்ட அட்டை வழங்கப் படும். அதை பயன்படுத்தி அவர்கள்,
மாநிலத்தில் உள்ள எந்தவொரு அரசு மருத்துவமனைக்கும் சென்று சிகிச்சை
பெற்று, நோய்க்கான மருந்து பெற முடியும். "ஆன்லைனில்' பதிவு
செய்யப்பட்டுள்ளதால் நோயாளியின் எண்ணை கம்ப்யூட்டரில் டைப் செய்தால்
போதும். இதற்கு முன் என்ன சிகிச்சை மேற்கொண்டார்; எந்த மருத்துவமனையில்
சிகிச்சை பெற்றார்; சிகிச்சை அளித்த டாக்டர்; நோயின் தன்மை; என்னென்ன
மருந்துகள் வழங்கப்பட்டுள்ளன என்ற விவரங்கள், கம்ப்யூட்டர் "ஸ்கீரினில்'
வந்து விடும். இதன் பின், அந்நோயாளிக்கு என்ன சிகிச்சை அளிக்க வேண்டும்
என்பதை அந்த டாக்டர் உணர்ந்து, சிகிச்சை மேற்கொண்டால் போதும். மாநிலம்
முழுவதும் அரசு மருத்துவமனைகளில் பொருத்தப்படும் அனைத்து
கம்ப்யூட்டர்களும் ஒருங்கிணைக்கப்பட்டு, சென்னையில் "மெயின் சர்வருடன்'
இணைப்பு கொடுக்கப்படும். கம்ப்யூட்டர் பயன்படுத்துவது குறித்து அரசு
மருத்துவமனை டாக்டர், செவிலியர், பணியாளர்களுக்கு பயிற்சி அளிக்கப்படும்.
ஏதாவது ஒரு கம்ப்யூட்டர் பழுதானாலும், வேறொரு கம்ப்யூட்டரை இயக்கும்
வகையில் "சாப்ட்வேர்' இணைப்பு கொடுக்கப்படும், என்றார். நோயாளிகளின்
விவரம் "ஆன்லைனில்' பதிவு செய்திருப்பதால், மருத்துவமனைக்கு செல்லும்போது,
பழைய பைல்களை எடுத்துச் செல்ல வேண்டியதில்லை. "பின் நம்பர்' கொண்ட அட்டையை
கொண்டு சென்றால் போதும். அதேபோல், நோயாளிக்கு இதற்கு முன் என்ன சிகிச்சை
அளித்தோம் என டாக்டர்களும் குழம்ப வேண்டிய தேவையில்லை.

இத்திட்டத்துக்காக,
திருப்பூர் மாவட்டத்துக்கு 276 கம்ப்யூட்டர்கள் வழங்கப்பட்டுள்ளன.
திருப்பூருக்கு 82; அவிநாசி 25; உடுமலை 42; பல்லடம் 31; காங்கேயம் 32;
தாராபுரம் 46; ஜல்லிப்பட்டி 11; கரடிவாவி 7; கம்ப்யூட்டர்கள் வழங்கப்
பட்டுள்ளன. திருப்பூருக்கு வழங்கப்பட்ட கம்ப்யூட்டர்கள், தற்காலிகமாக
நாமக்கல் அரசு மருத்துவமனையில் உள்ளன. அவற்றை திரும்பப் பெற்று, பொருத்த
முடிவு செய்துள்ளனர். அதன்பின், கம்ப்யூட்டர் மயமாக்கும் பணி துரிதகதியில்
நடைபெறும்.