வனத்தில் இரவைப் பகலாக்கும் பகலவனின் மந்திரம்: சோலார் சிஸ்டத்தில் பூர்த்தியாகும் நிஜம்

பல நூற்றாண்டுகளாக இருளில் சிக்கி தவித்த மலைவாழ் கிராமங்களில்,
இரவையும் பகலாக்கும் வரப்பிரசாதம் சோலார் சிஸ்டத்தால் கிடைத்து வருகிறது.
இயற்கையோடு இணைந்து வாழும் மக்கள் சூரியனின் ஆற்றலால், தமக்கு கிடைக்கும்
மின்சாரத்தை கொண்டு கல்வி, குடிநீர் உட்பட அனைத்து தேவைகளையும் இன்று
நிறைவேற்றி வருகின்றனர். ஆனைமலை புலிகள் காப்பகத்திற்கு உட்பட்ட உடுமலை,
அமராவதி வனச்சரக பகுதிகளில், தளிஞ்சி, கோடந்தூர் உட்பட 14
வனக்குடியிருப்புகளில் 2,500க்கும் மேற்பட்ட மலைவாழ் மக்கள்
வசிக்கின்றனர்.
இருளில் தவித்த கிராமங்கள்: சமவெளிப்பகுதியில் கடந்த
நூற்றாண்டில் வசதிகள் அதிகரிக்கப்பட்ட போதும், மின்வசதி கிடைக்காமல்
மலைவாழ் கிராமங்கள் பின்தங்கியே இருந்தன. வனவிலங்குகள் மத்தியில் வாழும்
மலைவாழ் மக்கள், வனத்தில் கிடைக்கும் விறகுகளை எரித்து ஏற்படும்
வெளிச்சத்தில், தங்கள் கடந்த கால இரவு நேரங்களை கழித்து வந்தனர். மலைவாழ்
மக்கள் மாலை நேரங்களில் பொழுது போக்கவும், வனவிலங்குகளை விரட்டவும்
விறகுகளை ஒரு இடத்தில் எரித்து பாதுகாப்பு தேடி வந்தனர். காலப்போக்கில்,
சமவெளிப்பகுதியிலுள்ள மக்களை போன்று உடைகளில் நாகரிக மாற்றத்தை கொண்டு
வந்த மலைவாழ் மக்களுக்கு அடிப்படை வசதிகளையும் ஏற்படுத்த அரசு முயற்சி
மேற்கொண்டது. மலைவாழ் மக்களுக்கு பாதுகாக்கப்பட்ட குடிநீர் வசதி
ஏற்படுத்தப்பட்ட பின் மலைவாழ் மக்கள் மின்வசதிக்காக அரசிடம் கோரிக்கை
அளித்தனர்.
கைகொடுத்தது சூரிய ஆற்றல்: மலைப்பகுதிக்கு மின்வசதி கொண்டு
செல்வதில் பல்வேறு சிக்கல்கள் உள்ளதால், இருள் நீக்கி வெளிச்சம்
அளிப்பதில் சிக்கல் நீடித்தது. இந்நிலையில், கடந்த எட்டு ஆண்டுகளுக்கு
முன் சூரிய ஆற்றல் மூலமாக இயங்கும், சோலார் சிஸ்டம்
அறிமுகப்படுத்தப்பட்டது. உடுமலை, அமராவதி வனச்சரகத்திற்கு உட்பட்ட 14
வனகுடியிருப்பு பகுதிகளிலும், சோலார் சிஸ்டம் ஏற்படுத்தப்பட்டது. இதில்,
தளிஞ்சி மலைவாழ் குடியிருப்பு பகுதிகளில் கொடுக்கப்பட்ட சோலார் மின்
திட்டத்தை மக்கள் தொடர்ந்து பயன்படுத்தி அன்றாட தேவைகளை பூர்த்தி செய்து
வருகின்றனர். இக்குடியிருப்பில், ஒவ்வொரு வீட்டிலும் தலா ஒரு சோலார்
சிஸ்டம் வீதம் 183 இயங்கி வருகிறது. இதிலிருந்து பெறப்படும்
மின்சாரம்,பேட்டரிகளில் சேகரிக்கப்பட்டு, இரவு நேரத்தில் விளக்கு எரிக்க
பயன்படுத்தப்படுகிறது. நாள் ஒன்றுக்கு 35 முதல் 50 யூனிட் வரை சோலார்
மூலமாக பெறப்படுகிறது. இது மின்விசிறி, பிரிட்ஜ் போன்ற வசதிகள் இல்லாத மலை
வாழ் குடும்பங்களுக்கு உபரியாகவே இருக்கும். இதனால், வீட்டு தேவைக்கு போக
மீதமுள்ள மின்சாரத்தை பயன்படுத்தி தெரு விளக்கும் அமைத்துள்ளனர்.
வாழ்க்கை தரத்திற்கும் கை கொடுத்தது: துவக்கத்தில், 5 மணி
நேரத்திற்கும் மேலாக கிடைத்த மின்சாரத்தை, மின் விளக்குகளுக்கு மட்டும்
பயன்படுத்தி வந்த மக்கள் சிறிது சிறிதாக மற்ற தேவைகளுக்கும் பயன்படுத்தி
வருகின்றனர். வனத்துறை சார்பில், ஆற்றிலிருந்து கொண்டு வரப்படும் குடிநீர்
சுத்திகரிப்பு செய்தல் பணிக்கும்; பள்ளியில் "டிவி' மூலமாக பாடங்கள்
கற்பிக்கவும் சோலார் திட்டம் பயன்படுத்தப்படுகிறது. இங்கு இயங்கி வரும்
ஊராட்சி ஒன்றிய துவக்கப்பள்ளியில் படிக்கும் 67 மாணவர்களுக்கும் சோலார்
மூலமாக பெறப்படும் மின்சாரத்தில் இருந்து "டிவி' இயக்கப்பட்டு ஆங்கிலம்
பேசுதல் உட்பட பல்வேறு பாடங்கள் காண்பிக்கப்படுகின்றன. அனைத்து மலைவாழ்
குடியிருப்பு பகுதிகளுக்கும் சோலார் மின் திட்டம் அறிமுகப்படுத்தப்பட்ட
போதும், அதை முறையாக பயன்படுத்தி அன்றாட தேவைகளை பூர்த்தி செய்துகொள்ளும்
தளிஞ்சி மலைவாழ் மக்கள் மற்ற கிராமங்களுக்கு முன்னுதராணமாக
விளங்குகின்றனர்.
மாற்றம் தாருங்கள்: தளிஞ்சி மலைவாழ் மக்கள் கூறியதாவது: எங்கள்
முன்னோர்கள் வன விலங்குகளுக்கு மத்தியில் இருளில் மூழ்கியே தங்கள் வாழ்வை
வாழ்ந்தனர். தற்போது, சோலார் சிஸ்டத்தால் மின்விளக்குகள் பயன்படுத்தி
குழந்தைகள் கல்வி பயில்கின்றனர். பல ஆண்டுகாலமாக பயன்படுத்தப்பட்டு
வந்ததால், தற்போது குறைந்த அளவே மின்சாரம் உற்பத்தியாகிறது. புதிதாக
பொறுப்பேற்றுள்ள அ.தி.மு.க., அரசு புதியதாக பேட்டரிகள் வழங்கினால் மிகவும்
பயனுள்ளதாக இருக்கும். அரசு வழங்கவுள்ள இலவச மிக்சி, கிரைண்டர் போன்றவை
பயன்படுத்துவதற்கு ஏதுவாக இருக்கும், என்றனர்.
திருப்பூர் மாவட்ட வனஅலுவலர் ராஜ்குமார் கூறியதாவது: வனத்திற்குள்
வாழும் மக்களுக்கு மின்வசதி எடுத்துச்செல்வது சிரமம் என்பதால், மலைவாழ்
குடியிருப்புகளுக்கு சோலார் சிஸ்டம் வழங்கப்பட்டது. வனச்சூழல்,
வனவிலங்குகள் பாதிக்காத வகையில், இயற்கையாக சூரிய ஒளியிலிருந்து மின்
உற்பத்தி செய்யப்படுவதால், சோலார் சிஸ்டம் மிகவும் பயனுள்ளதாக உள்ளது.
மலைவாழ் குடியிருப்பு மட்டுமின்றி, வனத்திலுள்ள வேட்டை தடுப்பு முகாம்,
வனப்பணியாளர் குடியிருப்புகளுக்கும் சோலார் சிஸ்டமே பயன்படுத்தப்படுகிறது.
மலைவாழ் மக்களுக்கு வரப்பிரசாதம் போன்று அமைந்துள்ளது. அதில், தளிஞ்சி
மலைவாழ் குடியிருப்பில் சோலார் சிஸ்டத்தை பயன்படுத்தி தங்களது தேவைகளை பல
ஆண்டுகளாக பூர்த்தி செய்து வருகின்றனர். தற்போது, பேட்டரி மாற்றித்தர
வேண்டும் என கோரிக்கை விடுத்துள்ளனர்; அரசுக்கு இது குறித்து
தெரிவிக்கப்பட்டு, உரிய நடவடிக்கை எடுக்கப்படும், என்றார்.
எதிர்பார்ப்பு: வனச்சூழலில், மலைகுடியிருப்புகளில், சோலார்
சிஸ்டம் வெற்றிகரமாக பயன்படுத்தும் போது, சமவெளிப்பகுதியிலும் இத்திட்டம்
மின்பற்றாக்குறை பிரச்னைக்கு கைகொடுக்கும் என எதிர்பார்ப்பு
மேலோங்கியுள்ளது. அரசு முழு முயற்சி மேற்கொண்டு, அரசுத்துறைகள் மற்றும்
தனியார் தொழிற்சாலைகளிலும் மின் உற்பத்திக்கு சோலார் சிஸ்டம்
பயன்படுத்தலாம் என்பதே இயற்கையை நேசிக்கும் இயற்கை ஆர்வலர்களின்
எதிர்பார்ப்பாக உள்ளது.