இந்தியக் கடற்படையில் மேலும் 9 ரஷிய போர் விமானங்கள்

மாஸ்கோ, மே 31:
இந்தியாவுக்கு மேலும் 9 மிக்-29கே ரக போர் விமானங்களை ரஷியா அளித்தது. அவை
அனைத்தும் கடற்படையில் இணைத்துக் கொள்ளப்பட்டுள்ளன.இந்த விமானங்கள்
அனைத்தும் இந்திய விமானந் தாங்கி கப்பலான ஐஎன்எஸ் விக்கிரமாதித்யாவில்
இடம்பெறவுள்ளன. பல்வேறு சிறப்பு அம்சங்களையுடைய ரஷியாவின் மிக்-29கே போர்
விமானங்கள் மூலம் இந்திய கடற்படையின் பலம் மேலும் அதிகரித்துள்ளதாக
கடற்படை அதிகாரிகள் தெரிவித்துள்ளனர்.12 மிக்-29கே, 4
மிக்-29கேயுபி ஆகிய போர் விமானங்களை வாங்குவதற்கு இந்தியா, ரஷியா இடையே
2004-ல் ஒப்பந்தம் கையெழுத்தானது. இதன்படி கடந்த பிப்ரவரி 2010-ல் 3
மிக்-29கே போர் விமானங்களையும், மிக்-29கேயுபி போர் விமானங்களையும்
இந்தியாவிடம் ரஷியா அளித்துவிட்டது. அந்த விமானங்கள் அப்போதே கடற்படையில்
இணைத்துக்கொள்ளப்பட்டன.இந்நிலையில் இப்போது 9 மிக்-29கே போர்
விமானங்களை ரஷியா அளித்துவிட்டது. இதனிடையே, கூடுதலாக 29 மிக்-29கே போர்
விமானங்களை வாங்குவது தொடர்பாக இரு நாடுகளும் மார்ச், 2010-ல் ஒப்பந்தம்
செய்து கொண்டுள்ளன. இந்த ஒப்பந்தத்தின்படி, அடுத்த ஆண்டு முதல் போர்
விமானங்களை இந்தியாவுக்கு ரஷியா அளிக்கும். உலகிலேயே இந்தியா மட்டும்தான்
இந்த போர் விமானங்களை ரஷியாவிடம் இருந்து வாங்குகிறது.3000
கி.மீட்டர் சீறிச் செல்லும்: மிக்-29கே போர் விமானம் வான்வெளியில் இருந்து
வான்வெளியிலும், வான்வெளியில் இருந்து கடலிலும் 3,000 கி.மீட்டர் தூரம்
வரை சீறிச்சென்று இலக்குகளை குறிவைத்து தாக்கும் திறன் கொண்டது என்பது
குறிப்பிடத்தக்கது.