சிறிலங்கா விமானப்படையின் இரு கிபிர் போர் விமானங்கள் வானில் மோதி வெடித்துச் சிதறின

சிறிலங்கா விமானப்படைக்குச் சொந்தமான இரண்டு கிபிர் ஜெட் போர் விமானங்கள் வானத்தில் மோதி வெடித்துச் சிதறின.

இன்று காலை 9.30 மணியளவில் இந்த சம்பவம் இடம்பெற்றது.

கம்பகா மாவட்டத்தில் உள்ள வரண பகுதி வான்பரப்பில் இந்த விபத்து இடம்பெற்றது.

இந்த விபத்தில் ஒரு விமானி உயிரிழந்தார். மற்றொருவர் படுகாயமடைந்தார்.

சிறிலங்கா
விமானப்படையின் 60வது ஆண்டு நிறைவு நிகழ்வை முன்னிட்டு நாளை தொடக்கம்
விமான சாகச நிகழ்வுகளுக்கு ஏற்பாடுகள் செய்யப்பட்டுள்ளன.

இந்த
சாகச நிகழ்வில் பங்கேற்கும் கிபிர் போர் விமானங்கள் இன்று காலை
கட்டுநாயக்க விமானப்படைத் தளத்தில் இருந்து இறுதி ஒத்திகைக்காகப்
புறப்பட்டன.

வானில் ஒத்திகையை மேற்கொண்டிருந்த போது எதிர்பாராத வகையில் இரு கிபிர் விமானங்கள் ஒன்றுடன் ஒன்று மோதி வெடித்துச் சிதறின.

கடைசிநேரத்தில் இரு விமானங்களினதும் விமானிகள் பரசூட் மூலம் தப்பியதாக விமானப்படைப் பேச்சாளர் அறிவித்தார்.

ஆனாலும் அவர்களின் ஒருவர் பின்னர் சடலமாக மீட்கப்பட்டார்.

இன்னொரு விமானி படுகாயமடைந்த நிலையில் மீட்கப்பட்டுள்ளார்.

உடனடியாக
சம்பவம் நடந்த இடத்துக்குச் சென்ற சிறிலங்கா அதிபர் மகிந்த ராஜபக்ச இந்தச்
சம்பவம் குறித்து உயர்மட்ட விசாரணைகளை நடத்த விமானப்படைத் தளபதிக்கு
உத்தரவிட்டுள்ளார்.

பிளைட் லெப்டினன்ட் மொகான் பெரேரா என்ற விமானியே உயிரிழந்தார்.

ஸ்குவாட்ரன் லீடர் வஜிர ஜெயக்கொடி என்ற விமானி படுகாயங்களுடன் மீட்கப்பட்டுள்ளார்.

நாளை
சிறிலங்கா விமானப்படை 60வது ஆண்டு நிறைவைக் கொண்டாடுவதற்கு ஏற்பாடுகள்
செய்யப்பட்டுள்ள நிலையில் ஏற்பட்டுள்ள இந்த விபத்து சிறிலங்கா அரசாங்கத்தை
அதிர்ச்சியில் ஆழ்த்தியுள்ளது.