30 வருடகால யுத்தத்தை முடிவுக்குக் கொண்டுவந்த தமது கணவருக்கு ஜனாதிபதி

by **அருள்** Tue Feb 09, 2010 9:42 pm

கடத்திச்
சென்று சிறைவைத்த நடவடிக்கையானது 30 வருடகால யுத்தத்தை முடிவுக்குக்
கொண்டுவந்து மக்களுக்கு சமாதானத்தை உருவாக்கிய தமது கணவருக்கு ஜனாதிபதி
மகிந்த ராஜபக்ஷ வழங்கிய பரிசு என அனோமா பொன்சேக்கா கூறியுள்ளார். ஜெனரல்
பொன்சேக்காவின் இல்லத்தில் நடைபெற்ற ஊடகவியலாளர் சந்திப்பில் அவர் இதனைக்
கூறியுள்ளார். 30 வருடகால யுத்தத்தை முடிவுக்குக் கொண்டுவந்த ஜெனரல்
ஒருவரை அரசாங்கம் இவ்வாறு நடத்துமாயின் எதிர்காலத்தில் நாட்டு மக்களை
நடத்தும் விதத்தை எண்ணிப் பார்க்க முடியாது.

சரத் பொன்சேக்கா இரகசியமான இடமொன்றில் தடுத்துவைக்கப்பட்டுள்ளார். அவர்
கைதுசெய்யப்பட்டிருந்தால் ஏன் இரகசியமாக தடுத்துவைக்க வேண்டும். ஜெனரல்
பொன்சேக்கா கைதுசெய்யப்படவில்லை. அவர் கடத்தப்பட்டுள்ளார். நேற்றிரவு 9.30
அளவில் அவர் அலுவலகத்திலிருந்த போது இராணுவத்தினர் சென்று கைதுசெய்தமை
பிரச்சினைக்குரியது எனவும் அனோமா பொன்சேக்கா கூறியுள்ளார்.

எனது கணவர் சாதாரண பிரஜை. சாதாரண பிரஜையைக் கைதுசெய்வதற்கு நடைமுறைகள்
உள்ளன. சாதாரணமாக காவல்துறையினரே கைதுசெய்வர். எனினும், இராணுவ
அதிகாரிகளும் படையினரும் இணைந்து எனது கணவரைக் கைதுசெய்துள்ளனர். இதன்
தலைவராக மேஜர் ஜெனரல் மானவடு என்பவர் செயற்பட்டுள்ளார். அவரை நான் நன்கு
அறிவேன். இராணுவச் சட்டத்தின்படி அவர் கைதுசெய்யப்பட்டதாகக்
கூறுகிறார்கள். எனக்கும் இராணுவச் சட்டம் தெரியும். எனக்குத் தெரிந்த
வகையில் இராணுவச் சட்டத்தின்படி ஒரு இராணுவ அதிகாரியைக் கைதுசெய்வதற்கு
அவரைவிட உயர் அதிகாரியொருவர் இருக்கவேண்டும். அதேபோல் கைதுசெய்வதிலும்
நடைமுறைகள் இருக்கின்றன. இது கைது அல்ல. கடத்தல். அவரைத் தூக்கிச்
சென்றுள்ளனர். நான் சாதாரண பிரஜை என இதன்போது எனது கணவர் கூறியுள்ளார்.
சாதாரண பிரஜை என்ற வகையில் நான் காவல்துறையில் சரணடைகிறேன் என அவர்
குறிப்பிட்டுள்ளார். எனினும், மானவடு காவல்துறையினர் கீழே இருப்பதாகக்
கூறியுள்ளார். அது பொய்யாகும். இந்தச் சந்தர்ப்பத்தில் எந்தக் காவல்துறை
அதிகாரியும் இருக்கவில்லை. இந்தப் பொய்யைக் கூறியே அவரைக்
கைதுசெய்துள்ளனர். உண்மையில் இது கடத்தலாகும். 30 வருட யுத்தத்தை
முடிவுக்குக் கொண்டுவந்தவருக்கு வழங்கும் பரிசு இதுவா என நான் கேட்கிறேன்.

அவர் அர்ப்பணிப்புடன் யுத்தத்திற்கு பங்களிப்பு வழங்கியதை நான் அறிவேன்.
அரசாங்கத்தைக் கவிழ்க்கும் தேவை இருந்திருந்தால் பிரபாகரன்
கொல்லப்பட்டவுடன் அவர் அதனைச் செய்திருக்கலாம். அவருக்கு அவ்வாறான தேவை
எதுவும் இருக்கவில்லை. அவர் எந்தச் சந்தர்ப்பத்திலும் சீருடையுடன்
அரசியலில் ஈடுபடவில்லை. இவை அனைத்தையும் செய்த பின்னர் இறுதியில்
விலங்கொன்றை கொண்டுசெல்வதைப் போல் எனது கணவரை அழைத்துச் சென்றுள்ளனர்.

அதேவேளை, மானவடுவுடன் சென்ற ஏனைய அதிகாரிகள் எனது கணவரைக் கைதுசெய்வதைத்
தவிர்க்க முயன்றபோது மானவடு அவர்களை கடுமையாக திட்டியுள்ளார். இவனைக்
கொண்டுசெல்லுங்கள் போன்ற வார்த்தைகளை மானவடு பயன்படுத்தியுள்ளார். இன்று
எனக்கு நேர்ந்துள்ளது நாளை உங்களது கணவன்மார்களுக்கும், தந்தையருக்கும்
ஏற்படக்கூடும்.

நாம் இவற்றுக்கு எதிராக ஒன்றிணைய வேண்டும். அரசாங்கம் இவ்வாறு தரம்
தாழ்ந்துள்ளமை குறித்து நான் கவலையடைகிறேன். எனக்கு நேர்ந்ததைப் போன்று
உங்களுக்கும் நேராதிருப்பதற்காக அனைத்துப் பெண்களும் ஒன்றிணைய வேண்டும்.
பெண்கள் என்ற வகையில் இதற்கெதிராக ஏதேனும் ஒன்றைச் செய்தாகவேண்டும்.
அதற்காக என்னுடன் ஒன்றிணையுங்கள் என அனைவரிடமும் கோரிக்கை விடுப்பதாக
அனோமா பொன்சேக்கா குறிப்பிட்டுள்ளார்.

சரத் பொன்சேக்கா கைதுசெய்யப்பட்டுள்ளதை காணாமல் போன இராணுவத்தினரின் பெற்றோர்களின் சங்கம் வன்மையாகக் கண்டித்துள்ளது:‐

ஜெனரல் சரத் பொன்சேக்கா கைதுசெய்யப்பட்டுள்ளதை வன்மையாகக் கண்டிப்பதாக
காணாமல் போன இராணுவத்தினரின் பெற்றோர்களின் சங்கம் விடுத்துள்ள
அறிக்கையில் தெரிவித்துள்ளது.

அவர் கைதுசெய்யப்பட்டதானது முழு இலங்கைக்கு மாத்திரமல்லாது முழு
இராணுவத்தினருக்கும் ஏற்பட்ட களங்கம் எனவும் இந்தப் பாரிய அவச்செயல்
குறித்து இலங்கையர்கள் என்ற வகையில் முக்கியமாக இராணுவக் குடும்ப
உறுப்பினர்கள் என்ற வகையில் தாம் மிகவும் கவலையடைவதாக அந்த அறிக்கையில்
கூறப்பட்டுள்ளது.

30 வருடகாலமாக பல்வேறு துயரங்களுக்கு மத்தியில் இராணுவ குடும்ப
உறுப்பினர்களினால் மேற்கொள்ளப்பட்ட அர்ப்பணிப்பை அவமதிப்புக்குள்ளாக்கும்
செயல் கீழ்த்தரமான செயல் என இதனை காண்கின்றோம். உலகில் எந்த நாட்டிலும்
இடம்பெறாத இவ்வாறான அவச் செயல் குறித்து நாம் கவலையடைகிறோம் எனவும்
காணாமல் போன இராணுவத்தினரின் பெற்றோர்களின் சங்கம் விடுத்துள்ள
அறிக்கையில் மேலும் தெரிவிக்கப்பட்டுள்ளது.