தனியார் பள்ளிகளை அரசே ஏற்று நடத்த வேண்டும்: ராமதாஸ்

by **ஜனனி** Tue May 03, 2011 7:29 am

Last Updated :

தனியார் பள்ளிகளை அரசே ஏற்று நடத்த வேண்டும்: ராமதாஸ் Ramadas

சென்னை, மே 2: அரசு நிர்ணயிக்கும் கல்விக் கட்டணத்தை ஏற்க மறுக்கும் தனியார்
பள்ளிகளை தமிழக அரசே ஏற்று நடத்த வேண்டும் என்று பா.ம.க. நிறுவனர் ராமதாஸ்
வலியுறுத்தியுள்ளார்.
இது பற்றி அவர் திங்கள்கிழமை வெளியிட்ட அறிக்கை: தனியார் பள்ளிகளின் கல்விக்
கட்டணத்தை நிர்ணயிப்பதற்காக நீதிபதி ரவிராஜபாண்டியன் தலைமையில் தமிழக அரசு குழுவை
அமைத்துள்ளது. இந்தக் குழு கல்விக் கட்டணத்தை உயர்த்தி நிர்ணயிக்கும் வரை,
பள்ளிகளைத் திறக்கமாட்டோம் என்று தனியார் பள்ளிகள் அறிவித்துள்ளன.
மேலும், சமச்சீர் கல்விக்கான பாடநூல்கள் தரம் குறைவாக இருப்பதால் அக்கல்வி
முறையை நடப்பாண்டில் நடைமுறைப்படுத்த மாட்டோம் என்றும் அந்தப் பள்ளிகள்
தெரிவித்துள்ளன. இது தமிழக அரசுக்கு சவால் விடுக்கும் செயலாகும்.
பெரும் பணக்காரர்களின் குழந்தைகளுக்குக் கிடைக்கும் தரத்திலான கல்வி,
அடித்தட்டு மக்களின் குழந்தைகளுக்கும் கிடைக்க வேண்டும். அனைவருக்கும் தரமான கல்வி
இலவசமாகவும், கட்டாயமாகவும் வழங்கப்பட வேண்டும் என்ற உன்னத நோக்கத்துக்காக தமிழக
அரசு சமச்சீர் கல்வியை அறிமுகப்படுத்தியுள்ளது. இதே நோக்கத்துக்காக, கல்வி பெறும்
உரிமைச் சட்டத்தை மத்திய அரசு கொண்டு வந்துள்ளது.
தமிழக அரசு அறிமுகப்படுத்தியுள்ள சமச்சீர் கல்வித் திட்டத்தில் சில
குறைபாடுகள் இருக்கலாம். இது காலப் போக்கில் களையப்பட வேண்டும்.
எனினும், அனைவருக்கும் தரமான கல்வி வழங்குவதற்கான தமிழக அரசின் முயற்சிகளுக்கு
துணை நிற்க வேண்டிய தனியார் பள்ளிகள், தங்களது விருப்பம்போல் கட்டணம் வசூலித்துக்
கொள்ள அனுமதிக்க வேண்டும் என்று கோருவதும், சமச்சீர் கல்வியை தங்களது விருப்பம்
போலத்தான் செயல்படுத்துவோம் என்று கூறுவதும் ஏற்கக் கூடியது அல்ல.
இது அனைவருக்கும் தரமான கல்வி வழங்குவதற்கான முயற்சியையே அழிக்கும் செயல்
ஆகும்.
தனியார் பள்ளிகளின் இத்தகைய முயற்சிகளை முறியடிக்க வேண்டிய பொறுப்பும்,
கடமையும் தமிழக அரசுக்கு உண்டு. ஏழைகளுக்கும் தரமான கல்வி கிடைக்க எதையெல்லாம்
செய்ய வேண்டுமோ, அதையெல்லாம் மாநில அரசு செய்ய வேண்டும்.
கட்டண உயர்வு கோரி மேல்முறையீடு செய்த 6,400 பள்ளிகளிடமும் விசாரணை நடத்தி
முடிக்கப்பட்டுள்ளது. இந்நிலையில், புதிய கல்விக் கட்டண விவரத்தை நீதிபதி
ரவிராஜபாண்டியன் குழு உடனடியாக வெளியிட வேண்டும். அக்கட்டணம், ஏழைகளாலும்
செலுத்தப்பட வேண்டிய அளவிலேயே இருக்கும்படி தமிழக அரசின் குழு பார்த்துக் கொள்ள
வேண்டும். அந்தக் கட்டண நிர்ணயத்தை தனியார் பள்ளிகள் ஏற்றுக் கொள்வதை உறுதி செய்ய
சட்டப்படியான நடவடிக்கைகளை அரசு மேற்கொள்ள வேண்டும்.
அதன் பிறகும் தனியார் பள்ளிகள் ஒத்து வரவில்லை என்றால், அப்பள்ளிகளுக்கு அரசே
நிதி உதவியை வழங்கி, அனைத்துக் குழந்தைகளுக்கும் இலவச கல்வி தர வேண்டும்.
இல்லையெனில், தனியார் பள்ளிகள் அனைத்தையும் அரசே ஏற்று நடத்த வேண்டும். இதற்கான
நடவடிக்கைகளை புதிய அரசு தயக்கமின்றி மேற்கொள்ள வேண்டும் என்று ராமதாஸ்
வலியுறுத்தியுள்ளார்.