தே.மு.தி.க. செயலாளர் அடித்து கொலை! தி.மு.க.பிரமுகர் கைது- போலீஸ் குவிப்பு

தர்மபுரி மாவட்டம் பென்னாகரம் அருகே
உள்ளது பருவதனஹள்ளி கிராமம். இந்த கிராமத்தை சேர்ந்தவர் அசோகன் (32)
தே.மு.தி.க. கிளை செயலாளர். இவரது பக்கத்து வீட்டை சேர்ந்தவர் சேகர் (33)
இவர் தி.மு.க. கிளை பிரதிநிதியாக உள்ளார். தேர்தலையொட்டி அசோகன் தனது
வீட்டில் அ.தி.மு.க. கூட்டணி வேட்பாளரை ஆதரித்தும், சேகர் தனது வீட்டில்
தி.மு.க. வேட்பாளரை ஆதரித்தும் சுவர் விளம்பரம் செய்தனர்.

அருகருகே இரு வீட்டிலும் சுவர் விளம்பரங்கள் போட்டி போட்டு எழுதப்பட்டதால்
அவர்களுக்குள் மோதல் ஏற்பட்டு முன்விரோதம் இருந்து வந்தது. இந்நிலையில்
வாக்குச்சாவடியில் இருந்து 200 மீட்டர் தூரத்துக்கு சுவர் விளம்பரங்கள்
மற்றும் அரசியல் கட்சியினர் ஓட்டு கேட்க கூடாது என்ற விதிமுறையின் படி
வாக்குச்சாவடி அருகில் இருக்கும் அசோகன் வீட்டிற்கு தேர்தல் அதிகாரிகள்
சென்று சுவரில் எழுதப்பட்டிருக்கும் விளம்பரத்தை அழிக்க சொன்னார்கள்.

அதன்படி அவர் விளம்பரத்தை அழித்தார். ஆனால் பக்கத்து வீட்டை சேர்ந்த சேகர்
வீட்டில் இருந்த சுவர் விளம்பரத்தை அழிக்க வில்லை. இதையடுத்து
தே.மு.தி.க. கிளை செயலாளர் அசோகன் தேர்தல் அதிகாரிகளுக்கு போன் செய்து
தே.மு.தி.க. விளம்பரத்தை அழிக்க சொன்னீர்கள். ஆனால் என் வீட்டிற்கு
அருகில் சேகர் வீட்டில் இருக்கும் விளம்பரத்தை ஏன் அழிக்கவில்லை என்று
கேட்டிருக்கிறார்.

இதுப்பற்றி தெரியவந்ததும் ஆத்திரம் அடைந்த சேகர் என்னைப்பற்றி ஏன் தேர்தல்
அதிகாரியிடம் புகார் கூறினாய் என்று கூறி தகராறு செய்தார். இதில் அவர்கள்
ஒருவருக்கு ஒருவர் மோதிக் கொண்டனர். அந்த நேரத்தில் கையால் சேகர், அசோகனை
தலையில் தாக்கியுள்ளார். அப்போது அசோகன் நிலைதடுமாறி கான்கீரிட் தளத்தில்
விழுந்தார். இதில் தலையில் படுகாயம் அடைந்த அவரை பென்னாகரம் அரசு
ஆஸ்பத்திரியில் சேர்த்து பின்னர் மேல் சிகிச்சைக்காக சேலம் அரசு
ஆஸ்பத்திரிக்கு கொண்டு சென்றனர்.

அங்கு சிகிச்சை பலனின்றி தே.மு.தி.க. கிளை செயலாளர் அசோகன் இறந்து
விட்டார். கொலை செய்யப்பட்ட அசோகனுக்கு விஜயசாந்தி என்ற மனைவியும், ஒரு
மகன், ஒரு மகள் உள்ளனர். அசோகன் கொலை செய்யப்பட்ட தகவல் அறிந்ததும்
ஏராளமான தே.மு.தி.க.வினர் சேலம் அரசு ஆஸ்பத்திரி மற்றும் பருவதனஹள்ளி
கிராமத்தில் திரண்டர்.

மேலும் தி.மு.க. பிரமுகர் சேகரை பென்னாகரம் போலீசார் கைது செய்தனர்.
இதுப்பற்றி தெரியவந்ததும் தி.மு.க. வினரும் அங்கு திரண்டனர். இதனால் அங்கு
பதட்டமான சூழ்நிலை நிலவிவருகிறது. இதையடுத்து அங்கு போலீசார் அதிகளவில்
நிறுத்தப்பட்டு பாதுகாப்பு பணியாற்றி வருகின்றனர்.

இதற்கிடையே கொலை செய்யப்பட்ட அசோகனின் இறுதி ஊர்வலம் நடத்த தே.மு.தி.க.
வினர் ஏற்பாடு செய்து வருகின்றனர். இதனால் அசம்பாவிதம் நடைபெறும் என்று
கருதி கூடுதல் போலீசார் அங்கும் நிறுத்தப்பட்டுள்ளனர்.

நன்றி:மாலைமலர்