அ.தி.மு.க., அணியில் முதல்வர் வேட்பாளர் ஜெயலலிதா: முதல்வருக்கு விஜயகாந்த் பதில்

by **ஜனனி** Sat Apr 02, 2011 7:30 am

ஈரோடு: ""அ.தி.மு.க., கூட்டணியில், அ.தி.மு.க., பொது செயலர் ஜெயலலிதா
தான் முதல்வர் வேட்பாளர்,'' என, ஈரோடு பி.பி., அக்ரஹாரத்தில் தே.மு.தி.க.,
தலைவர் விஜயகாந்த் பேசினார்.
ஈரோட்டில் நேற்று முன்தினம் இரவு நடந்த தி.மு.க., பொதுக்கூட்டத்தில்
முதல்வர் கருணாநிதி பேசுகையில், "பழகிய மாட்டை வண்டியில் பூட்டுவது போல்,
ஐந்து முறை முதல்வர் பதவி வகித்த அடியேனையே, மீண்டும் ஆறாவது முறையாக
முதல்வராக்குவோம் என்று கூட்டணியினர் அறிவித்துள்ளனர். ஆனால், எதிரணியில்
யார் முதல்வர் என்று அறிவிக்கவில்லை. அப்படி அறிவித்தால், மறுநாள்
நாளிதழ்களில், அடிதடி, ரகளை என படம் வந்துவிடும். அந்த அணிக்கு ஒரு பெண்
தலைவர், ஒரு ஆண் தலைவர் உள்ளனர்' என கூறியிருந்தார். இதற்கு பதிலடி தரும்
வகையில், "ஜெயலலிதாவே முதல்வர்' என்று கூறியுள்ளார் தே.மு.தி.க., தலைவர்
விஜயகாந்த்.
ஈரோட்டில் நேற்று காலை 10 மணிக்கு பிரசாரத்தை துவக்கிய அவர், பிராமண
பெரிய அக்ரஹாரத்தில், ஈரோடு கிழக்கு தே.மு.தி.க., வேட்பாளர் சந்திரகுமாரை
ஆதரித்து பேசியதாவது: ஈரோட்டில் நேற்று கருணாநிதி, "எதிரணியில் ஒரு ஆண்
தலைவர், ஒரு பெண் தலைவர் உள்ளனர். அதில் யார் முதல்வர் என கூறினால் அடிதடி
சண்டை வரும்' என பேசியுள்ளார். எங்கள் அணி சண்டை போட வேண்டும் என நினைத்து
பிரித்து பேசியுள்ளார். அவர் பிரித்தாள்வதில் மன்னன்.எனக்கு துணை முதல்வர்
பதவியோ, ஆட்சியில் பங்கோ எதுவும் வேண்டாம் என ஏற்கனவே கூறிவிட்டேன்.
எங்கள் கூட்டணியில் அ.தி.மு.க., பொது செயலர் தான் முதல்வர். ஈரோட்டில்
நேற்று பேசிய முதல்வர், "குருகுலம் ஞாபகம் வருது' என, கூறியுள்ளார்.
பெரியார் நடத்திய குடியரசு பத்திரிகையில் பணிபுரிந்த கருணாநிதி, அச்சை
திருடிவிட்டார். அவர் ஒரு அச்சு திருடன். வரும் தேர்தலில் தனது கூட்டணி
தோல்வியடையும் என்பதால், ஈரோட்டில் பேசிய போது வேட்பாளர்களின் பெயர்களை
கூட அவர் கூறவில்லை. ஈரோடு கிழக்கு தொகுதியில் தி.மு.க., சார்பில்
போட்டியிடும் முத்துசாமியை எம்.ஜி.ஆர்., வளர்த்தார்; அவருக்கு துரோகம்
செய்துவிட்டு, எதிரணிக்கு சென்றுள்ளார். இவர் வில்லன் என, ஏற்கனவே
எம்.ஜி.ஆர். மனைவி ஜானகியம்மாளிடம் கூறினேன்.
கருணாநிதி எதற்கெடுத்தாலும் பெரியார், அண்ணாதுரை கொள்கைபடி செல்வதாக
கூறுகிறார். பெரியாரும், அண்ணாதுரையும், கருணாநிதியை கொள்ளையடிக்க
கூறினரா; திருடக் கூறினரா; ஊழல் செய்ய கூறினரா? தேர்தல் அதிகாரிகள்
நேர்மையாக நடந்தால், "எமர்ஜென்சி' என்கிறார். மதுரையில் இந்திரா காந்தியை
கம்பியால் அடித்தது இவர் தானே... மதுரையில் அழகிரி வீட்டில் போலீஸ்
பாதுகாப்பு விலக்கப்பட்டதால், "மதுரை கலெக்டர் சகாயம் சரியில்லை; மாற்ற
வேண்டும்' என, கூறுகின்றனர். இதைத்தான் அரசன் அன்று கொல்வான்; தெய்வம்
நின்று கொல்லும் என்று கூறுவர். நான் கருணாநிதியை திட்டுவதற்கு வரவில்லை.
அவர் செய்த தவறை கூறுகிறேன்.இவ்வாறு விஜயகாந்த் பேசினார்.
யார் அந்த மணிமொழி? பெருமாநல்லூர் பகுதியில் பேனர் வைப்பது,
கொடி கட்டுவது போன்ற கட்சி நடவடிக்கைகளுக்கு கடிவாளம் போட்டு
வைத்துள்ளார், போலீஸ் இன்ஸ்பெக்டர் மணிமொழி. திருப்பூர் வடக்கு தொகுதிக்கு
உட்பட்ட பெருமாநல்லூர் நால்ரோட்டில் விஜயகாந்த் பிரசாரம் செய்ய அனுமதி
மறுக்கப்பட்டதால், வடக்கு ரத வீதியில் கூட்டம் நடத்த முடிவு
செய்யப்பட்டது. ஆனால், நேற்று முன்தினம் முதல்வர் கருணாநிதி நால்ரோட்டில்
பிரசாரம் செய்தார். அதன் பின், நால்ரோடு பகுதியில் பிரசாரம் செய்ய
மணிமொழியிடம், தே.மு.தி.க., வினர் போராடி அனுமதி பெற்றனர். இதையறிந்த
விஜயகாந்த், நேற்று கனிமொழி-மணிமொழி என அடுக்குமொழியில் பேசி, கண்டனம்
தெரிவித்தார். "கெடுபிடியாக நடந்து கொண்டால், தி.மு.க., அரசு புரமோஷன்
வழங்கும் என்ற எதிர்பார்ப்பில் அவ்வாறு நடந்து கொள்கிறார்; அவர்
நினைப்பதுபோல், தி.மு.க., மீண்டும் ஆட்சிக்கு வராது' என்றார் விஜயகாந்த்.
பேச்சை கேட்காவிட்டால் எமர்ஜென்சியா? பெருந்துறையில்
அ.தி.மு.க., வேட்பாளர் வெங்கடாசலத்தை ஆதரித்து, அவர்
பேசியதாவது:"தமிழகத்தில் சத்தமில்லாமல் "எமர்ஜென்சி' நடக்கிறது' என்று
கருணாநிதி கூறுகிறார். போலீசார் உங்கள் பேச்சை கேட்காவிட்டால்
எமர்ஜென்சியா? ஈரோட்டில் பேசிய கருணாநிதி, "பழக்கப்பட்ட மாட்டையே
வண்டியில் பூட்டுவதைப் போல, ஐந்து முறை முதல்வராக இருந்த என்னை, ஆறாவது
முறையும் வண்டி இழுக்க வா என்கின்றனர்' என,பேசியுள்ளார். அவர் பேசுவதைக்
கண்டு மயங்கி விடாதீர்கள் என் மக்களே."என் மடியில் தவழ்ந்த பிள்ளை
இளங்கோவன்' என்கிறார் கருணாநிதி. அந்த பிள்ளை சில மாதங்களுக்கு முன்
உங்கள் அடி மடியில் கை வைத்தது நினைவில் இல்லையா? இவ்வாறு விஜயகாந்த்
பேசினார்.