ராஜபக்ச வெறி நாய் போல நடந்துகொள்கிறார் - பிரித்தானிய ஊடகத்திடம் பொன்சேகா

by **Tamil** Wed Feb 03, 2010 3:13 pm

சிறிலங்கா
அதிபர் மகிந்த ராஜபக்ச வெறி நாய் போன்று நடந்து கொள்வதாகவும், அனைவரையும்
தடுப்புக் காவலில் வைக்கவே விரும்புகிறார் என்றும் விசனம்
வெளியிட்டிருகிறார் ஜெனரல் சரத் பொன்சேகா.
சிறிலங்கா அதிபர் தேர்தலில் மகிந்த ராஜபக்சவிடம் தோல்வியடைந்த சரத்
பொன்சேகா, சதிப் புரட்சி மூலம் அதிகாரத்தைக் கைப்பற்ற முனைந்ததான
குற்றச்சாட்டுக்கு உள்ளாகியிருக்கிறார்.
அவருடன் தொடர்புடைய படைஅதிகாரிகளை சிறிலங்கா அரசின் உத்தரவின் பேரில்
குற்றப் புலனாய்வுப் பிரிவு காவல் துறையும், இராணுவப் பொலிசாரும் கைது
செய்து வருகின்றனர்.
இதுவரையில் பிரிகேடியர் துமிந்த கெப்பிட்டிவலன உள்ளிட்ட 37 பேரை காவலில் வைத்துள்ள அதிகாரிகள் மேலும் பலரை விசாரணை செய்யவுள்ளனர்.
சரத் பொன்சேகாவின் அலுவலகத்துக்கு 500 செல்லிடப்பேசிகளையும்
அவற்றுக்கான இணைப்புக்களையும் பெற்றுக் கொடுத்த ஓய்வுபெற்ற மேஜர் ஜெனரலும்
அவர்களுள் அடங்குவார்.
சரத் பொன்சேகா இராணுவத் தளபதியாக இருந்த போது அவரது உதவியாளராக இருந்த
பிரிகேடியர் துமிந்த கெப்பிட்டவலன கடந்த வார இறுதியில் கைது
செய்யப்பட்டிருந்தார்.
கடந்த வருடம் ஊடகவியலாளர் லசந்த விக்கிரமதுங்க படுகொலை செய்யப்பட்ட சம்பவம் தொடர்பாகவே இவர் கைது செய்யப்பட்டுள்ளார்.
சட்டத்துக்கு முரணான படுகொலைகள் மற்றும் மகிந்தவின் அரசாங்கத்தில்
நிலவும் ஊழல்கள் தொடர்பாக லசந்த விக்கிரமதுங்க கடுமையான விமர்சனங்களை
முன்வைத்து வந்தவர்.
பிரிகேடியர் கெப்பிட்டிவலனவின் வீட்டுக்குள் புகுந்து சோதனையிட்ட
காவல்துறையினர் அவரைக் கைது செய்வதற்கு முன்னர் லசந்த விக்கிரமதுங்கவின்
படுகொலை தொடர்பாகவே பல கேள்விகளைக் கேட்டதாக அவரது மனைவி கூறியுள்ளார்.
அதே வேளை இது தொடர்பாக பிரித்தானிய ஊடகம் ஒன்றுக்கு கருத்து
வெளியிட்டுள்ள சரத் பொன்சேகா, லசந்தவின் படுகொலையுடன் பிரிகேடியர்
கெப்பிட்டிவலன எந்தவகையிலும் தொடர்புபடவில்லை என்று கூறியுள்ளார்.
“அலுவலகத்தை இயக்க முடியாமல் அதிகாரிகளிடம் இருந்து என்னைத் தனிமைப்படுத்தவே அவர்கள் இப்படிச் செய்கிறார்கள்.
வெறி நாய் போன்று நடந்து கொள்ளும் மகிந்த ராஜபக்ச அனைவரையும் தடுப்புக்
காவலில் வைக்கவே விரும்புகிறார்” என்றும் சரத் பொன்சேகா மேலும்
கூறியுள்ளார்.
அதே வேளை, பிரிகேடியர் கெப்பிட்டிவலன கைது செய்யப்பட்டிருப்பதை
உறுதிப்படுத்தியுள்ள இராணுவப் பேச்சாளர் பிரிகேடியர் உதய நாணயக்கார, அவர்
லசந்த விக்கிரமதுங்கவின் படுகொலை தொடர்பாகத் தான் கைது செய்யப்பட்டாரா
என்பதை உறுதிப்படுத்தவில்லை.
இதற்கிடையே அரசைக் கவிழ்க்க முயன்ற சதிப் புரட்சி தொடர்பாக ஜெனரல் சரத்
பொன்சேகாவை கைது செய்வதற்கான முயற்சிகள் நடந்து வருவதாக
தெரிவிக்கப்படுகிறது.
அத்துடன் அவரை இராணுவ நீதிமன்றத்தில் நிறுத்தி விசாரிப்பது பற்றிய ஆலோசனைகளும் நடத்தப்படுகின்றன.
சரத் பொன்சேகாவின் "ஜெனரல்" தர பதவி நிலையைப் பறிக்கும் வகையில் இந்த நடவடிக்கை மேற்கொள்ளப்படவுள்ளதாகவும் கூறப்படுகிறது.
ஆனால் அதற்கு அவர் குற்றமிழைத்தார் என்று நிரூபிக்க வேண்டியது அவசியம் என்று இராணுவ அதிகாரிகள் தெரிவித்துள்ளனர்