நிருபமா இலங்கைக்கு பயணம்: மீனவர்கள் கொல்லப்படுவது குறித்து பேச்சு

by **ஜனனி** Sat Jan 29, 2011 7:40 am

புதுடில்லி: தமிழக மீனவர்கள், இலங்கை கடற்படையால்
அடுத்தடுத்து, கொல்லப்படும் சம்பவங்கள் விஸ்வரூபம் எடுத்துள்ளதை அடுத்து,
இதுகுறித்து விவாதிப்பதற்காக இந்திய வெளியுறவு செயலர் நிருபமா ராவ், இன்று
இலங்கை செல்கிறார். மீன்பிடிப்பதற்காக கடலுக்குள் செல்லும் தமிழக மீனவர்கள், இலங்கை
கடற்படையால் கொல்லப்படும் சம்பவங்கள் நீண்ட காலமாக அரங்கேறி வருகின்றன.
இதற்கு தமிழக அரசு மற்றும் அரசியல் கட்சிகள் சார்பில் கடும் எதிர்ப்பு
தெரிவிக்கப்பட்டும், எந்த பயனும் கிடைக்கவில்லை. அவ்வப்போது, தமிழக
மீனவர்கள் இலங்கை கடற்படையின் துப்பாக்கிச் சூட்டுக்கு ஆளாகின்றனர்.
சமீபகாலமாக இலங்கை கடற்படையின் அட்டூழியம் அதிகரித்துள்ளது.கடந்த 12ம்
தேதி கடலில் மீன்பிடித்துக் கொண்டிருந்த ஜெகதாபட்டினத்தை சேர்ந்த மீனவர்
ஒருவரை, இலங்கை கடற்படையினர் துப்பாக்கியால் சுட்டுக் கொன்றனர். இதற்கு
மீனவர்களிடம் அதிருப்தி எழுந்தது. இதையடுத்து, "தமிழக மீனவர்களை இலங்கை
கடற்படையினர் சுடவில்லை' என, இலங்கை சார்பில் விளக்கம் அளிக்கப்பட்டது.
இந்நிலையில், கடந்த 22ம் தேதி, சக மீனவர்களுடன் கடலில் மீன் பிடித்துக்
கொண்டிருந்த புஷ்பவனத்தை சேர்ந்த மீனவர் ஜெயக்குமாரின் கழுத்தில் கயிற்றை
இறுக்கி, இலங்கை கடற்படையினர் கொலை செய்தனர். மேலும், அவரது படகில் இருந்த
வலையை நாசப்படுத்தியதோடு, படகில் இருந்த மீன்களையும் கடலில் கொட்டினர்.
இந்த சம்பவம் தமிழக மீனவர்களிடையே கடும் கொந்தளிப்பை ஏற்படுத்தியது.
இதுபோன்ற சம்பவங்களை தடுத்து நிறுத்தும்படி, மத்திய அரசிடம் தமிழக அரசு
வலியுறுத்தியது. தமிழகத்தை சேர்ந்த எதிர்க்கட்சிகள் இந்த விவகாரத்தை
கையில் எடுத்துள்ளன. தமிழக சட்டசபை தேர்தல் விரைவில் நடக்கவுள்ளதை
அடுத்து, இந்த பிரச்னை மேலும் விஸ்வரூபம் எடுக்கும் என
எதிர்பார்க்கப்படுகிறது.இதையடுத்து, இந்த விவகாரத்தில் மத்திய அரசு,
அதிரடி நடவடிக்கையில் இறங்கியுள்ளது. ஏற்கனவே இந்தியாவுக்கான இலங்கை தூதரை
அழைத்து, மீனவர்கள் பிரச்னையில் தனது கவலையை மத்திய அரசு
தெரிவித்திருந்தது.மேலும், "தமிழக மீனவர்கள் கொல்லப்படுவது, ஏற்றுக் கொள்ள
முடியாத ஒன்று. இதுபோன்ற சம்பவங்களை எந்த வகையிலும் நியாயப்படுத்த
முடியாது. மீனவர்களுக்கு எதிராக படைகளை பயன்படுத்துவதை இலங்கை அரசு
தவிர்க்க வேண்டும்' என, மத்திய அரசு சார்பில் தெரிவிக்கப்பட்டது. அடுத்த
கட்டமாக, இந்த பிரச்னை குறித்து விவாதிப்பதற்காக வெளியுறவு செயலர் நிருபமா
ராவை, இன்று இலங்கைக்கு அனுப்பி வைக்கவும் திட்டமிட்டுள்ளது.
இதுகுறித்து மத்திய அரசு வட்டாரங்கள் கூறியதாவது:இந்திய
மீனவர்கள், இலங்கை கடற்படையினரால் கொல்லப்படுவதாக வெளியான தகவல்கள் கவலை
அளிக்கிறது. இந்த பிரச்னைக்கு முக்கியத்துவம் அளிக்க அரசு முடிவு
செய்துள்ளது. இந்திய வெளியுறவுத் துறை செயலர் நிருபமா ராவை, இலங்கைக்கு
செல்லும்படியும், இலங்கை அதிகாரிகளுடன் இதுகுறித்து பேச்சு
நடத்தும்படியும், வெளியுறவுத் துறை அமைச்சர் கிருஷ்ணா கேட்டுக்
கொண்டுள்ளார்.இதையடுத்து, நிருபமா ராவ் இன்று இலங்கை செல்வார் என
எதிர்பார்க்கப்படுகிறது. இந்த சந்திப்பின் போது, தமிழக மீனவர்களுக்கு
எதிரான தாக்குதல்களை கைவிடும்படி, நிருபமா ராவ் கேட்டுக் கொள்வார்.இவ்வாறு
மத்திய அரசு வட்டாரங்கள் தெரிவித்தன.