வன்னியில் இலவச பேரூந்து சேவை நிறுத்தம்

by **அருள்** Thu Jan 06, 2011 3:03 pm

மீள்குடியேறிய பகுதிகளில் கடமையாற்றும் ஆசிரியர்களுக்கான இலவச பஸ் சேவை
நிறுத்தப்பட்டுள்ளதாகவும் உடனடியாக அந்த பஸ் சேவையினை மீண்டும் ஆரம்பிக்க
வேண்டுமென்றும் இலங்கை ஆசிரியர் சங்க செயலாளர் ஜோசப் ஸ்டாலின் கோரிக்கை
விடுத்துள்ளார்.

இது தொடர்பாக அவர் மேலும் தெரிவிக்கையில்;

கிளிநொச்சி, துணுக்காய், முல்லைத்தீவு கல்வி வலயங்களின் கீழுள்ள
பாடசாலைகளில் பல்வேறு சிரமங்களின் மத்தியிலேயே ஆசிரியர்கள்
பணியாற்றுகின்றனர். எதுவித அடிப்படை வசதிகளோ விடுதி உள்ளிட்ட வசதிகளோ
இல்லாத நிலையில் அர்ப்பணிப்புடன் இந்த ஆசிரியர்கள் பணியாற்றுகின்றனர்.

தற்போது வன்னியில் பல இடங்களில் ஆசிரியர்கள் இடமாற்றஞ் செய்யப்படும்
வேளையில் மக்கள் மீளக்குடியமர்ந்த இப்பகுதிகளில் கல்வி கற்பிக்கும்
ஆசிரியர்கள் யாழ்ப்பாணம் மற்றும் வவுனியா போன்ற தூர இடங்களிலிருந்தே
சென்று கற்பிக்கின்றனர்.

இவ் ஆசிரியர்களுக்காக கல்வித் திணைக்களத்தின் ஏற்பாட்டில்
வவுனியாவிலிருந்து இரண்டு பஸ்களும் யாழ்ப்பாணத்திலிருந்து ஒரு பஸ்ஸூம்
இலவச சேவையாக யுத்தத்தின் பின்னர் நடத்தப்பட்டு ஆசிரியர்கள் சென்று வரக்
கூடிய ஏற்பாடு செய்யப்பட்டிருந்தது.

மீளக்குடியமர்ந்த பகுதிகளில் மக்களின் இயல்பு வாழ்க்கைக்காக பல்வேறு
நடவடிக்கைகளை அரசாங்கம் மேற்கொள்வதாகக் கூறிய போதும் இவ் இலவச பஸ் சேவை
இவ்வருடம் முதல் நிறுத்தப்பட்டுள்ளது.

வழமை போல் பாடசாலைகள் புதிய தவணைக்காக ஆரம்பமானதும் இச் சேவையை
எதிர்பார்த்த ஆசிரியர்கள் தற்போது ஏமாற்றமடைந்துள்ள நிலையில் மிகவும்
சிரமத்துடன் கடமைக்கு செல்லவேண்டியுள்ளது. இப் பஸ் சேவையானது
நிறுத்தப்பட்டதால் சுமார் 150 இற்கும் அதிகமான ஆசிரியர்கள்
பாதிக்கப்பட்டுள்ளனர். இதனால் அங்கு கல்வி நிலையும் பாதிக்கப்பட்டுள்ளது.

எனவே நிறுத்தப்பட்ட இவ் இலவச பஸ் சேவையை உடனடியாக மீண்டும் நடத்துவதற்கு
சம்பந்தப்பட்ட சகலரும் நடவடிக்கை எடுப்பதோடு ஆசிரியர்கள் இலகுவாகவும்
சுமுகமானதாகவும் சென்று பணியாற்றக் கூடிய சூழ்நிலையை ஏற்படுத்திக்
கொடுக்குமாறும் வேண்டுகோள் விடுக்கின்றேன். என்று அவர் கூறியுள்ளார்.