அம்மா கைபேசி திட்டத்தை துவக்கி வைத்தார் முதல்வர் ஜெயலலிதா!

by **Tamil** Sun Feb 28, 2016 7:19 am

தமிழகத்தில் சமுதாய சுய உதவிக்குழு பயிற்றுனர்களுக்கு 15 கோடி ரூபாய் மதிப்பீட்டிலான அம்மா கைபேசிகளை வழங்கும் திட்டத்தினை முதல்வர் ஜெயலலிதா துவக்கி வைத்தார்.

இது குறித்து இன்று தமிழக அரசு வெளியிட்ட செய்திக் குறிப்பில், முதல்வர் ஜெயலலிதா இன்று (27.2.2016) தலைமைச் செயலகத்தில், ஊரக வளர்ச்சி மற்றும் ஊராட்சித் துறை சார்பில் விருதுநகர் மாவட்டம் – அருப்புக்கோட்டையில் 1 கோடியே 50 லட்சம் ரூபாய் மதிப்பீட்டில் கட்டப்பட்டுள்ள ஊராட்சி ஒன்றிய அலுவலகக் கட்டடத்தை காணொலிக்காட்சி மூலமாக திறந்து வைத்தார்.

மேலும், 271 கோடியே 94 லட்சம் ரூபாய் மதிப்பீட்டில் ஊரக வளர்ச்சி மற்றும் ஊராட்சித் துறை சார்பில் கட்டப்பட்டுள்ள கட்டடங்களை திறந்து வைத்து, சமுதாய சுய உதவிக்குழு பயிற்றுனர்களுக்கு 15 கோடி ரூபாய் மதிப்பீட்டிலான அம்மா கைபேசிகளை வழங்கும் திட்டத்தினையும், 807 கோடியே 26 லட்சம் ரூபாய் மதிப்பீட்டிலான 38,441 சூரிய சக்தியுடன் கூடிய பசுமை வீடுகள் வழங்கும் திட்டத்தினையும் துவக்கி வைத்தார்கள்.

தமிழ்நாட்டில் 92 லட்சம் உறுப்பினர்களைக்கொண்டு 6 லட்சத்து 8 ஆயிரம் மகளிர் சுய உதவிக்குழுக்கள் இயங்கி வருகின்றன. இதில் ஊரகப்பகுதிகளில் சுமார் 4 லட்சத்து 23 ஆயிரம் மகளிர் சுய உதவிக்குழுக்கள் செயல்பட்டு வருகின்றன.

இக்குழுக்களுள் 15 முதல் 20 வரை உள்ள மகளிர் சுய உதவிக்குழுக்களின் பணிகளை மேற்பார்வையிடுவதற்கும் வழிநடத்துவதற்கும் ஒரு சமுதாய சுய உதவிக்குழு பயிற்றுனர் என்ற அளவில் தமிழ்நாட்டில் சுமார் 20,000 சமுதாய சுய உதவிக்குழு பயிற்றுனர்கள் ஊரகப்பகுதிகளில் உள்ளனர். மகளிர் சுய உதவிக் குழுக்கள் தாங்கள் நடத்தும் கூட்டங்கள், சயதா தொகை செலுத்துதல், சேமிப்பு, உட்கடன் விவரம், கடனை மீளச் செலுத்துதல் போன்ற பணிகளுக்காக பல்வேறு பதிவேடுகளை பராமரிக்கவும், பதிவு செய்யவும், செயல்பாடுகளை மேற்பார்வையிடவும் அம்மா கைபேசி திட்டம் என்ற புதிய திட்டம் துவக்கப்படும் என்று ஜெயலலிதா சட்டப்பேரவையில் அறிவித்தார்.

அதன்படி, முதற்கட்டமாக, தமிழகத்தில் உள்ள 20,000 சமுதாய சுய உதவிக்குழு பயிற்றுனர்களுக்கு 15 கோடி ரூபாய் மதிப்பீட்டிலான அம்மா கைபேசிகளை வழங்கும் திட்டத்தினை துவக்கி வைக்கும் அடையாளமாக, 3 சமுதாய சுய உதவிக்குழு பயிற்றுனர்களுக்கு அம்மா கைபேசிகளை ஜெயலலிதா இன்று வழங்கி, துவக்கி வைத்தார்கள்.

அம்மா கைபேசி திட்டத்தின் கீழ் சமுதாய பயிற்றுனர்களுக்கு கைபேசியுடன் சிம் சேவையும் இலவசமாக வழங்கப்படும். சிம் கார்டு பயன்பாட்டிற்கான மாதாந்திர கட்டணத்தை தமிழ்நாடு மகளிர் நல மேம்பாட்டு நிறுவனமே ஏற்றுக்கொள்ளும். மேலும், இத்திட்டத்தின் கீழ் வழங்கப்படும் நவீன கைபேசியில் ஒருவருக்கொருவர் பேசுதல், குறுஞ்செய்திகள் அனுப்புதல், புகைப்படம் எடுத்தல், இணைய தொடர்பு வசதி போன்ற அனைத்து வசதிகளும் உள்ளன என்று தெரிவிக்கப்பட்டுள்ளது.