இணையசமநிலை விதிகளில் டிராய் குளறுபடி

இணையசமநிலை விதிகளில் டிராய் குளறுபடி

இணையசமநிலையை காக்க இதற்கான விதிகளில் உள்ள குறைகளை களைந்து வலுப்படுத்த வேண்டும் என டிராயை நிபுணர்கள் வலியுறுத்தியுள்ளனர். இணைய சமநிலை தொடர்பாக கருத்துக்களை கேட்டறிந்த இந்திய தொலைத்தொடர்பு ஒழுங்குமுறை ஆணையம் (டிராய்), கட்டண வசூலில் பாரபட்சம் காட்டக்கூடாது என உத்தரவிட்டது. இதில், எல்லாவித சேவைக்கும் ஒரே மாதிரியான கட்டணம்தான் வசூலிக்க வேண்டும். சில இணைய பக்கங்களை அல்லது வலைதளங்களை பயன்படுத்துவதற்கு என தனி கட்டணம் நிர்ணயிப்பது தவறு. இதுபோல், சில இணையதளங்களை பயன்படுத்துவதை இலவசமாகவும் அறிவிப்பது கூடாது. பாகுபாடான இணையசேவை கட்டண தடுப்பு ஒழுங்குமுறை விதி 2016ன்படி இந்த அறிவிப்பு வெளியிடப்படுகிறது. இதை மீறும் நிறுவனங்களுக்கு நாள் ஒன்றுக்கு குறைந்தபட்சம் ரூ.50 ஆயிரம் முதல் ரூ.50 லட்சம் வரை அபராதம் விதிக்கப்படும் என உத்தரவிட்டது.

அதேநேரத்தில் தொலைத்தொடர்பு சேவை நிறுவனங்கள் அவசர சேவையாக வழங்கும் பட்சத்தில் கட்டணங்களை குறைத்து வசூலிக்கலாம் எனவும் குறிப்பிட்டிருந்தது. டிராயின் இந்த கெடுபிடி விதிகளுக்கு தொலைத்தொடர்பு நிறுவனங்கள் அதிருப்தியை வெளிப்படுத்தியுள்ளன.   இருப்பினும், விதிகளில் உள்ள சில குளறுபடிகள்தொலைத்தொடர்பு நிறுவனங்கள் இணைய சமநிலை விதிகளை மீறுவதற்கு சாதகமாக அமைந்துவிடும் என நிபுணர்கள் சிலர் தெரிவித்துள்ளனர். இதுகுறித்து அவர்கள் கூறியதாவது:இணைய சமநிலைக்கு ஆதரவாக டிராய் பிறப்பித்த அதிரடி உத்தரவு வரவேற்கத்தக்கதுதான். அதேநேரத்தில் இதில் உள்ள அம்சங்கள் மேலும் வலுப்படுத்தப்பட வேண்டும். இந்த விதிகளில் சில சலுகைகள் விதிவிலக்குகளாக கூறப்பட்டுள்ளன.



அதில் மிக முக்கியமானது, தொலைத்தொடர்பு நிறுவனங்கள் தங்கள் சொந்த நெட்வொர்க்கில் உள்ள ஆப்ஸ்கள் போன்றவற்றை இலவசமாக பயன்படுத்தவோ, குறைந்த கட்டண சலுகையையோ வாடிக்கையாளர்களுக்கு வழங்கலாம் என்பதுதான். சில தொலைத்தொடர்பு நிறுவனங்கள் தாங்களே ஆப்ஸ்களை வெளியிட்டுள்ளன. பொழுதுபோக்குக்கான ஆப்களையும் சில நிறுவனங்கள் வெளியிட்டுள்ளன. இவற்றை இலவசமாக பயன்படுத்த அனுமதிப்பது இணையசமநிலையை இவை மீறுவதற்கு வசதியானதாகிவிடும். இதை பயன்படுத்தி பிற வகையிலும் அவை விதி மீற இடம் அளித்து விடும். எனவே, இந்த விதியை மாற்றி அமைத்து இணைய சமநிலையை காக்கும் நடவடிக்கைகளை டிராய் வலுப்படுத்த வேண்டும் என வலியுறுத்தியுள்ளனர்.

தினகரன்