தேர்தல் நிதியை கட்டு; இல்லையேல் மூட்டைய கட்டு!: தி.மு.க., தலைமை கறார்

தேர்தல் நிதியை கட்டு; இல்லையேல் மூட்டைய கட்டு!: தி.மு.க., தலைமை கறார்

‘தேர்தல் நிதி, 2 கோடி ரூபாயை, முழுமையாக கட்சி தலைமையிடம் செலுத்தாத மாவட்ட செயலர்கள், வேட்பாளர் நேர்காணலுக்கு அழைக்கப்பட மாட்டார்கள்’ என, தி.மு.க., தலைமை சுற்றறிக்கை அனுப்பி உள்ளதால், பல மாவட்ட செயலர்கள் அதிர்ச்சி அடைந்து
உள்ளனர்.வரும் சட்டசபை தேர்தலை எதிர்கொள்ள, சில மாதங்களுக்கு முன், தி.மு.க., தலைமை, ஒவ்வொரு மாவட்டத்திற்கும், தேர்தல் நிதியாக, 2 கோடி ரூபாய் நிதி
வசூலிக்க உத்தரவிட்டது.தேர்தல் நிதியை வசூலித்த, பல மாவட்ட செயலர்கள் மற்றும் நிர்வாகிகள், முழுமையான கணக்கை காட்டாததோடு, தேர்தல் நிதி, 2 கோடி ரூபாயை, இன்னும் தலைமையிடம் செலுத்தாமல்
உள்ளனர். இதனால், அதிருப்தி அடைந்துள்ள தி.மு.க., தலைமை, தேர்தல் நிதி தொடர்பாக, 65 மாவட்ட செயலர்களுக்கும், ஒரு சுற்றறிக்கை

அனுப்பியுள்ளது.அதில், ‘தேர்தல் நிதி வழங்கக் கோரி, தங்களிடம் தேர்தல் ரசீது புத்தகங்கள் வழங்கப்பட்டன. பலர் தேர்தல் நிதியான, 2 கோடி ரூபாயில், ஒரு பகுதியை மட்டும் வழங்கியுள்ளனர்.
வசூலித்த தேர்தல் நிதியை, வரும், 15ம் தேதிக்குள் வழங்காவிட்டால், சட்டசபை தேர்தலுக்கான, தி.மு.க., வேட்பாளர் நேர்காணலுக்கு, மாவட்ட செயலர்கள் அழைக்கப்பட மாட்டார்கள்’ என,
தெரிவிக்கப்பட்டுள்ளது. இதனால், அதிர்ச்சி அடைந்துள்ள தி.மு.க., மாவட்ட செயலர்கள், மாவட்ட, ஒன்றிய, நகர, பேரூர் மற்றும் கிளை கழக நிர்வாகிகளிடம், அவர்கள் வாங்கி சென்ற தேர்தல் நிதி தொடர்பான ரசீது புத்தகங்கள் மற்றும் அவர்கள் வசூலித்த நிதியை பெற, தீவிரம் காட்டி வருகின்றனர்.