ஸ்ரீரங்கம் இடைத்தேர்தலை பயன்படுத்தி பலத்தை சோதிக்க...வியூகம்

ஸ்ரீரங்கம் இடைத்தேர்தலை பயன்படுத்தி பலத்தை சோதிக்க...வியூகம்

ஸ்ரீரங்கம் தொகுதி இடைத்தேர்தலை ஜெ., இல்லாமல் சந்தித்து, தி.மு.க.,வில் பலம் என்ன, அ.தி.மு.க.,விற்கு அனுதாப அலை உள்ளதா என, சோதிக்க, தி.மு.க., புது வியூகம் வகுத்துள்ளது.
இந்த பின்னணியில் தான், ஜெ., சிறையில் அடைக்கப்பட்டு, 10 நாட்களான பின், கடந்த, 8ம் தேதி, தி.மு.க., தலைவர் கருணாநிதி, தன் மவுனத்தை கலைத்தார். சென்னையில், மாவட்ட செயலர்கள் கூட்டத்தை கூட்டி, 'ஜெயலலிதா தேவையில்லாமல், தண்டிக்கப்பட்டு விட்டார் என்ற, பொய் பிரசாரத்தை முறியடிக்கும் பணியை உடனடியாக செய்யுங்கள்' என்று கட்டளையிட்டார்.அதற்கு அடுத்த நாள், 'ஸ்ரீரங்கம் சட்டசபை தொகுதி எம்.எல்.ஏ.,வான ஜெ., பதவி இழந்து விட்டதை அடுத்து, அந்த தொகுதி காலியாக உள்ளது என, உடனடியாக அறிவிக்க வேண்டும்' என்று, தமிழக சட்டசபை செயலருக்கு, தி.மு.க., சார்பில் அவசர மனு அளிக்கப்பட்டது.
பத்து நாள் மவுனத்திற்கு பின், தி.மு.க., தலைமை எடுத்துள்ள, இந்த இரண்டு நடவடிக்கைகளுக்கும் பின்னணியில், இடைத் தேர்தலை சந்திக்கும் திட்டம் இருப்பதாக தெரியவந்துள்ளது.இதுகுறித்து, அறிவாலய வட்டாரத்தில் கூறப்படும் தகவல்கள்:
பெங்களூரு சிறையில் ஜெ., அடைக்கப்பட்ட பின், அதன்மூலம் அனுதாபம் தேடும் முயற்சியில் ஆளும் கட்சியினர் இறங்கினர். அவர்களது எதிர்ப்பு போராட்டங்கள் வாயிலாக, இந்த நடவடிக்கையில் ஈடுபட்டனர்.
அச்சம்:இதன் காரணமாக, கைது நடவடிக்கையால், மக்கள் மத்தியில் ஜெயலலிதாவுக்கு அனுதாபம் தான் அதிகரித்து வருகிறது என்ற செய்திகள் வெளியாகின. இது இனியும் தொடர்ந்தால், எந்த வழக்கின் தீர்ப்பை எதிர்பார்த்து காத்திருந்தோமே, அது, இலவு காத்த கிளி கதையாக முடிந்து விடும் என்ற அச்சம், தி.மு.க.,வுக்கு ஏற்பட்டது.
சொத்துக்கள்:அதையடுத்து, மாவட்ட செயலர்கள் கூட்டம் அவசரமாக கூட்டப்பட்டது. அதில், ஊழல் செய்து சொத்துக்கள் குவித்த காரணத்தால் தான், ஜெ., சிறைக்கு சென்றார் என்று, மக்களிடையே பிரசாரம் செய்யும்படி அறிவுறுத்தப்பட்டது.மேலும், ஜெ., தேவையில்லாமல் தண்டிக்கப்பட்டு விட்டார் என்ற, பொய் பிரசாரத்தை முறியடிக்குமாறும், கேட்டுக் கொள்ளப்பட்டனர்.
அதன் தொடர்ச்சியாக, 9ம் தேதி, தி.மு.க., சார்பில், சட்டசபை செயலரிடத்தில், அவசர மனு அளிக்கப்பட்டது. அதில், 'சொத்து குவிப்பு வழக்கில், ஜெயலலிதாவுக்கு நான்கு ஆண்டுகள் சிறை தண்டனை விதிக்கப்பட்டதை அடுத்து, அவர் முதல்வர் பதவியையும், எம்.எல்.ஏ., பதவியையும் இழந்து விட்டார். இதை கவர்னரும் உறுதி செய்ததுடன், புதிய அமைச்சரவைக்கு பதவி பிரமாணமும் செய்து வைத்துள்ளார். இதை ஏற்று, ஜெயலலிதாவின் ஸ்ரீரங்கம் சடடசபை தொகுதி, காலியாக உள்ளது என, உடனடியாக அறிவிக்க வேண்டும்' என்று, வலியுறுத்தப்பட்டிருந்தது. தொகுதி காலியாக இருக்கிறது என்று அறிவித்தால் தான், ஆறு மாதங்களில் அங்கே இடைத்தேர்தல் நடத்த, தேர்தல் ஆணையம் நடவடிக்கை எடுக்கும். ஆறு மாதங்களுக்குள் ஜெயலலிதா தண்டனை விஷயத்தில், எந்த மாற்றமும் ஏற்பட்டு விடப்போவதில்லை.
வாய்ப்பு:ஜெயலலிதா இல்லாத ஒரு தேர்தலை, ஆளும் கட்சி சந்திக்க வேண்டியிருக்கும். அவரது பிரசாரம் எடுபடுகிறதா அல்லது, எதிர் பிரசாரம் எடுபடுகிறதா என்பது தெரிந்து விடும். மேலும், ஜெயலலிதாவுக்கு அனுதாப அலை இருக்கிறதா என்பதையும் அறியும் வாய்ப்பு கிடைக்கும். 2016 சட்டசபை தேர்தலுக்கு முன்னோட்டமாக, இந்த தேர்தல் முடிவு அமையும் என்று கணக்கு போடப்பட்டுள்ளதால், தி.மு.க., தரப்பு, இந்த இடைத் தேர்தலை சந்திக்கும் ஆர்வத்தில் உள்ளது.இவ்வாறு, அறிவாலய வட்டாரத்தில் கூறப்படுகிறது.

-தினமலர்-