ஒரு சின்னக் கேள்வி!ஆன்மீக கட்டுரை

by **அருள்** Sat Nov 23, 2013 9:53 pm

ஒரு சின்னக் கேள்வி!
ஒரு சின்னக் கேள்வி!ஆன்மீக கட்டுரை 1453266_560903373982609_867031580_n

இந்தப் பதிவை நீங்கள் தமிழில் படித்துக் கொண்டிருக்கிறீர்களாயின், நீங்கள் கிறிஸ்தவர் அல்லது இஸ்லாமியர் அல்லாதவர் ஆயின், நீங்கள் சைவம் அல்லது வைணவம் அல்லது சுமார்த்தம் எனும் மூன்று இந்து சமயப் பிரிவுகளில் ஒன்றில் அடங்குகிறீர்கள் என்று உங்களுக்குத் தெரியுமா?

அப்படி சைவம் என்றால், தத்துவ ரீதியில் “சித்தாந்தம்” அல்லது “வீரசைவம்” எனும் இரண்டில் ஒரு பிரிவில் அடங்குவீர்கள் என்றோ, வைணவம் என்றால் “விசிட்டாத்வைதம்” அல்லது “துவைதம்” அல்லது “அசிந்திய பேதாபேதம்” எனும் மூன்றில் ஒரு பிரிவில் அடங்குவீர்கள் என்றோ உங்களுக்குத் தெரியுமா?

சமயம் என்பது சமயத்தின் பேரில் திருட்டுத்தனமாக உழைக்கும் வெறும் சாமியார்களும் சமய நிறுவனங்களும் அல்ல! தானே கடவுள் என்று கூறி மக்களை ஏமாற்றுபவர்கள் அல்ல! இந்தக் குப்பைகளையெல்லாம் தாண்டி எத்தனை மேலான தத்துவங்களை போதிக்கிறது என்று நாம் யாராவது அறிந்து வைத்திருக்கிறோமா?

நமது தத்துவம் என்ன? சமயம் உண்மையில் என்ன சொல்கிறது? மதம்பிடித்து ஆடச் சொல்கிறதா? அல்லது, நூலறிவை நூலோடு வைத்துக் கொள்ளாமல் வாழ்க்கையிலும் கடைப்பிடி என்று சொல்கிறதா? புராண – இதிகாசங்கள் வெறும் கதைகள் தான், கதைகளிலிருந்தான நீதிகளே நமக்குத் தேவை என்பதை நாம் அறிவோமா?

நன்மையோ தீமையோ எல்லாம் அவன் தருவது தான்… கடவுள் என்று ஒருவன் இருந்தால், அவன் நன்மை மட்டுமே தரவேண்டும், துன்பத்தைத் தருபவனோ, துன்பத்தைப் பார்த்துக் கொண்டு சும்மா இருப்பவனோ கடவுள் இல்லை என்று கூறுவது வடிகட்டிய முட்டாள்த் தனம் என்று “பகுத்தறிந்தாவது” நாம் உணர்ந்துகொள்கிறோமா?

நேற்று வெட்டியாக முகநூலில் உலாவிக்கொண்டிருந்தபோது, ஒரு சமய விவாதத்தைக் காண நேர்ந்தது. இருபா இருபஃது, போற்றிப் பஃறொடை, சிவ தருமோத்தரம் என்று அந்த சைவ இறையேற்பர் (ஆத்திகர்) தன் சமயக் கருத்துக்களை அடுக்க, “என்ன உளறுகிறீர்கள்? என்ன இதெல்லாம்?” என்று அப்பாவித்தனமாக கேட்டார் அந்த இறைமறுப்பர் (நாத்திகர்). அவை சைவ சமய நூல்கள் என்று, கடவுளை மறுக்கும் அவருக்குத் தெரிந்திருக்க வாய்ப்பில்லை, வேண்டாம்; கடவுளை நம்பும் நமக்காவது தெரியுமா?

சமயம் பற்றி சிறிதும் அறியாத ஒரு தலைமுறை உருவாகிக் கொண்டிருப்பதைத் தான், அடிக்கடி முகநூலில் காணக்கிடைக்கும் சமய விவாதங்கள் உணர்த்துகின்றன.

நடிகர் மீதான தனிப்பட்ட அபிமானத்தில் திரைப்படமே பார்க்காமல், இணையத்தில் விமர்சனம் எழுதுபவர்களுக்கும், வாழ்க்கையில் கண்ட துன்பங்களால் பாதிப்புற்று, சமயம் பற்றி சிறிதுகூட அறியாமல், கடவுளே இல்லை என்று வாதிடுவோருக்கும் எந்த வித்தியாசத்தையும் காண முடியவில்லை.

அவர்களைச் சொல்லிக் குற்றமில்லை. சமயம், சமய நூல்கள் பற்றி எதுவுமே அறியாமல், யாரோ நாலுபேர் சொல்வதை நம்பித் தான் அவர்களது வாதங்கள் அமைகின்றன. குறைந்தபட்சம் அப்படி தாம் கண்டது, கேட்டது உண்மைதானா என்றுகூட அவர்கள் சோதித்துப் பார்ப்பதில்லை, பாவம்!

சமயமே ஒரு சாக்கடை….இதையெல்லாம் தெரிந்துவைத்திருப்பதால் எனக்கென்ன லாபம் என்று உங்களில் பலர் கேட்கலாம். நல்லது…

சமயம் என்பது வாழ்க்கைநெறி.. தமிழரைப் பொறுத்தவரை, நம் பண்பாட்டை, நாகரிகத்தை சமயத்திலிருந்து பிரித்தெடுத்தால் வெறும் பூச்சியம் தான் மிஞ்சும்.

அரைகுறைப் புரிதலுள்ளவர்கள் தான் சமயத்தை வெறும் அடையாளமாகப் பார்த்து, தன் சமயம் உயர்ந்தது என்று போர்க்கொடி தூக்குவார்கள். அதை வாழ்விலக்கணமாகப் பார்க்கும் யாருமே, அடுத்தவனை வற்புறுத்துவதோ, அடுத்தவன் பாதையில் தலையிடுவதோ இன்றி, தன்பாட்டில் அதன்வழி ஒழுக முற்படுவார்கள்.

சமயம் – மனிதனை மனிதனாக சமைப்பது!
நெறி – தவறுகளிலிருந்து திருத்தி மனிதனை நெறிப்படுத்துவது!

அவ்வளவுதான் சமயம்! புரிவதும், புரியாதும் அவரவர் விருப்பம். தூங்குபவர்களை எழுப்பலாம்… தூங்குவது போல் நடிப்பவர்களை?!