சென்னை சூப்பர் கிங்ஸ் சீனிவாசன் அலுவலகத்தில் அதிரடி ரெய்டு

by **ஜனனி** Thu Apr 22, 2010 7:18 am

சென்னை
: ஐ.பி.எல்., சார்பில் நடத்தப்படும், 'டுவென்டி-20' கிரிக்கெட்
போட்டிகளில் பெருமளவு முறைகேடு நடந்துள்ளதாக சர்ச்சையை நாடு முழுவதும்
நடந்த சோதனையின் ஒரு பகுதியாக,சென்னை சூப்பர் கிங்ஸ்' அணியின் பங்குதார்
சீனிவாசன் வீடு மற்றும் அலுவலகத்தில் வருமானவரித் துறையினர் அதிரடி சோதனை
நடத்தினர். இதேபோல் அனைத்து அணிகளின் அலுவலகங்களிலும் வருமான
வரித்துறையினர் அதிரடி சோதனை நடத்தினர்.

இந்திய கிரிக்கெட் கட்டுப்பாட்டு வாரியத்தின்
ஒரு பிரிவான ஐ.பி.எல்., சார்பில், 'டுவென்டி-20' கிரிக்கெட் போட்டிகள்
நடத்தப்பட்டு வருகின்றன. ஐ.பி.எல்., அணிகள் ஏலம் எடுக்கப்பட்டதில்
பெருமளவு முறைகேடு நடந்துள்ளதாகவும், பினாமி பெயர்களில் பல முக்கிய
வி.ஐ.பி.,க் களுக்கு அணிகளில் பங்குள்ளதாகவும் தகவல் வெளியானது.
ஐ.பி.எல்., போட்டிகளில் பெருமளவு வருவாய் ஈட்டிய அணிகள் கூட, நஷ்டம்
ஏற்பட்டுள்ளதாக பொய் கணக்கு காட்டியதாகவும் புகார் எழுந்தது. மேலும்,
ஐ.பி.எல்., சார்பில் விளையாடும் அணிகளுக்காக, வெளிநாடுகளில் இருந்து
பெருமளவு பணம், சட்ட விரோதமாக இந்தியாவுக்குள் கொண்டு வரப்பட்டதாகவும்
தகவல் வெளியானது.

இதையடுத்து, ஐ.பி.எல்.,லில் அங்கம் வகிக்கும்
எட்டு அணிகள் மற்றும் புதிதாக சேர்ந்துள்ள இரண்டு அணிகளின்
உரிமையாளர்களின் பெயர்கள், இந்த அணிகளில் பங்கு உள்ள நபர்களின் விவரங்கள்,
இதுவரை இந்த அணிகள் ஈட்டியுள்ள வருவாய் தொடர்பான அனைத்து விவரங்களையும்
தெரிவிக்கும்படி, ஐ.பி.எல்., நிர்வாகத்துக்கு, வருமானவரித் துறை நோட்டீஸ்
அனுப்பியது.இது தொடர்பாக பஞ்சாப் கிங்ஸ் லெவன் அலுவலகம், ஐ.பி.எல்.,
தலைவர் லலித் மோடியின் மும்பை அலுவலகத்தில் ஏற்கனவே, வருமானவரித் துறை
அதிகாரிகள் சோதனை நடத்தினர்.

சென்னை தொழிலதிபரிடம் ரெய்டு:
நாடு முழுவதும் நடந்த சோதனையின் ஒரு பகுதியாக, சென்னையில் நேற்று மாலை
3.30 மணியளவில், 'சென்னை சூப்பர் கிங்ஸ்' அணியின் பங்குதாரரும், பிரபல
தொழிலதிபரும், இந்திய கிரிக்கெட் வாரியத்தின்(பி.சி.சி.ஐ.,) செயலருமான
சீனிவாசன் வீடு மற்றும் அலுவலகத்தில் வருமானவரித் துறையினர் அதிரடி சோதனை
நடத்தினர்.ஐ.பி.எல்., போட்டிகளில், சென்னையை மையமாகக் கொண்டு, 'சென்னை
சூப்பர் கிங்ஸ்' அணி விளையாடி வருகிறது. அணிகளுக்கான ஏலத்தில், இந்த அணி
400 கோடி ரூபாய் மதிப்பில், அதிக விலைக்கு ஏலத்தில் எடுக்கப்பட்டது.
தற்போது அணிகளுக்கான ஏல சர்ச்சை நடந்து வருவதால் வருமானவரித் துறையினர்
இச்சோதனையை நடத்தியுள்ளனர்.வருமானவரித் துறையின் புலனாய்வு பிரிவு துணை
இயக்குனர்கள் ஸ்ரீதர், ராமகிருஷ்ண பண்டி, சுப்பாராவ் மற்றும் சரவணன்
தலைமையில், 27 பேர் கொண்ட குழுவினர் சோதனை நடத்தினர். நள்ளிரவு வரை
நீடித்த இந்த சோதனையில், ஐ.பி.எல்., அணிகளுக்கான ஏலம் தொடர்பான முக்கிய
ஆவணங்களை வருமானவரித் துறையினர் கைப்பற்றியுள்ளதாக தெரிகிறது.

சோதனை குறித்து, பி.சி.சி.ஐ., செயலர் சீனிவாசனைத் தொடர்பு கொண்டு, செய்தியாளர்கள் கேட்டபோது, 'நான் தற்போது டில்லியில் இருக்கிறேன். நான் இல்லாதபோது, வருமானவரித் துறையினர் சோதனை நடத்தியுள்ளனர்' என்றார்.

ப்ரீத்தி ஜிந்தாவுக்கு நோட்டீஸ் :
பஞ்சாப் கிங்ஸ் லெவன் அணி, தனது ஆண்டு நிதி நிலை அறிக்கையை தாக்கல்
செய்யவில்லை என, சண்டிகாரில் உள்ள கம்பெனிகளுக்கான பதிவாளர் அலுவலகம்
புகார் தெரிவித்தது. இதையடுத்து, இந்த அணியின் உரிமையாளர்கள் ப்ரீத்தி
ஜிந்தா, தொழிலதிபர் நுஸ்லி வாடியாவுக்கு சண்டிகார் மாஜிஸ்திரேட் கோர்ட்,
நேற்று நோட்டீஸ் அனுப்பியது.நாடு முழுவதும் சோதனை: இந்த விவகாரத்தில்
நேற்று அதிரடி திருப்பம் ஏற்பட்டது. நாடு முழுவதும் உள்ள ஐ.பி.எல்.,
தொடர்புடைய பெரும்பாலான அலுவலகங்களில் வருமானவரித் துறையினர் ஒரே
நேரத்தில் சோதனை நடத்தினர்.

ஐ.பி.எல்., போட்டிகளை, 'டிவி'யில் ஒளிபரப்பும்
உரிமையை பெற்றுள்ள 'வேர்ல்டு ஸ்போர்ட்ஸ் குரூப் மற்றும் சோனி மல்டி
ஸ்கிரீன் மீடியாவின் மும்பை அலுவலகங்களில் சோதனை நடத்தப்பட்டது. இது
தொடர்பாக, லலித் மோடியிடமும் அதிகாரிகள் விசாரணை நடத்தினர்.இதேபோல்,
கோல்கட்டாவில் உள்ள நடிகர் ஷாருக் கானின் கோல்கட்டா நைட் ரைடர்ஸ்
அலுவலகத்திலும், ஐதராபாத்தில் உள்ள டெக்கான் சார்ஜர்ஸ் அணியின்
அலுவலகத்திலும் வருமானவரித் துறை அதிகாரிகள் சோதனை நடத்தினர்.சென்னை,
புனே, கொச்சி, ஐதராபாத், பெங்களூரு, சண்டிகார், டில்லியில் உள்ள
ஐ.பி.எல்., அணிகளின் அலுவலகங்களிலும் நேற்று சோதனை நடத்தப்பட்டது. ஒரே
நேரத்தில் நாடு முழுவதும் நடந்த இந்த அதிரடி சோதனை, ஐ.பி.எல்.,
வட்டாரத்தில் கலக்கத்தை ஏற்படுத்தியுள்ளது.

அமலாக்கப் பிரிவும் கிடுக்கிப்பிடி :
ஐ.பி.எல்., அணிகளுக்காக வெளிநாடுகளிலிருந்து சட்ட விரோத பண பரிமாற்றம்
நடந்துள்ளதாக வெளியான தகவலை அடுத்து, அமலாக்க பிரிவு அதிகாரிகளும்
விசாரணையை துவக்கியுள்ளனர்.

அமலாக்க பிரிவு அதிகாரிகள் கூறியதாவது:ஐ.பி.எல்.,
அமைப்பில் நடந்துள்ள முறைகேடு குறித்து, வருமானவரித் துறை அதிகாரிகள்,
ஏற்கனவே விசாரணை நடத்தி வருகின்றனர். இந்நிலையில், ஐ.பி.எல்., அணிகளுக்காக
மொரீஷியஸ் உள்ளிட்ட வெளிநாடுகளிலிருந்து பெருமளவு பணம், சட்ட விரோதமாக
இந்தியாவுக்குள் கொண்டு வரப்பட்டதாக தகவல் வெளியானது. ரிசர்வ் வங்கியின்
அனுமதி இல்லாமல், வெளிநாடுகளிலிருந்து, இந்தியாவுக்கு பணம் வந்துள்ளது
குறித்து, அமலாக்க பிரிவு அதிகாரிகள் விசாரணையை துவக்கியுள்ளனர்.இது
தொடர்பாக, வழக்கும் பதிவு செய்யப்பட்டுள்ளது. சட்ட விரோத பண பரிமாற்ற
விவகாரத்தில், யாருக்காவது தொடர்பு இருப்பது தெரியவந்தால், அந்த நபரும்
வழக்கில் சேர்க்கப்படுவார். இதன் பின்னர் அவருக்கு நோட்டீஸ் அனுப்பி
விளக்கம் கேட்கப்படும்.இவ்வாறு அமலாக்க பிரிவு அதிகாரிகள் தெரிவித்தனர்.