நேற்று ஜெனீவாவில்,தேசியத்தலைவரின் புகைப்படத்தை அருகில் வைத்தபடியே ஐநா சபை முன்றலில் தீக்குளித்த வீரகாவியமான ஈழத்தமிழன் செந்தில்குமரன் !!

நேற்று ஜெனீவாவில்,தேசியத்தலைவரின் புகைப்படத்தை அருகில் வைத்தபடியே ஐநா சபை முன்றலில் தீக்குளித்த வீரகாவியமான ஈழத்தமிழன் செந்தில்குமரன் !!

சற்று முன் சில நண்பர்கள் மற்றும் பொறுப்பாளர்களுடன் ஐநா முன்றலில் அந்த தோழர் தீக்குளித்த இடத்தில் அவர் யார், இன்னார் என்ற அடையாளங்கள் ஏதும் அறியாமலே மலரஞ்சலி செலுத்தி விட்டு நின்றிருந்தோம். அருகே 24X7 தொடர் உண்ணாவிரத போராட்டத்தில் ஈடுபட்டிருக்கும் அரபு தேசத்து இளைஞர்கள் அதிகாலை நடந்த, தாங்கள் கண்ட, அந்த சம்பவத்தை எங்களிடம் விளக்கிக் கொண்டு இருந்தார்கள். ஒரு மாநிறமான இளைஞன் இங்கே இரவு பனிரெண்டு மணியில் இருந்து சுற்றிக் கொண்டு இருந்தான். சரியாக அதிகாலை 1.30 மணி அளவில் ஒரு பாட்டிலில் இருந்து அடர்த்தியான ஜெல்லி போன்ற திரவத்தை எடுத்து தன் மீது பூசிக்கொண்டு கண் இமைக்கும் நேரத்தில் கொளுத்தி கொண்டான்!

கொழுந்து விட்டு சுவாலையாக எரியும் போது எந்த சலனமும் இன்றி சில கோஷங்களை மட்டும் சொல்லிவிட்டு ஒரே இடத்தில் அப்படியே ஆடாமல் அசையாமல் நின்று எரிந்து முடித்து கீழே விழுந்தான். ஐநாவை சுற்றி பாதுகாப்பு பணியில் இருக்கும் கமேண்டோக்கள் அவனை நெருங்கும் போது கீழே சாய்ந்து விட்டான். பின்னர் காவல் துறையினர் எங்களை விலக்கி விட்டு அவன் தன்னுடன் கொண்டு வந்திருந்த பையையும், காகிதங்களையும் எடுத்துகொண்டு எரிந்த அந்த நபரை ஆம்புலன்சில் ஏற்றி சென்று விட்டார்கள். எரிந்தவன் அருகே ராணுவ தளபதி உடையில் இருக்கும் தமிழர்களின் தலைவர் ஒருவர் படம் இருந்ததை மட்டுமே எங்களால் உறுதிப்படுத்த முடிந்தது என்று மயிர்க்கூச்செறியும் அந்த சம்பவத்தை விளக்கி கொண்டு இருந்தார்கள்!

இதற்கு இடையில், சுவீஸ் காவல்துறை தீக்குளித்தவரின் உடலருகே தமிழீழ விடுதலை புலிகளின் தலைவர் பிரபாகரன் அவர்களின் படம் இருந்தது உண்மைதான், ஆனால் இறந்தவர் திபெத்தியராக இருக்கவும் வாய்ப்பு இருக்கிறது என்று சில உள்ளூர் செய்தி ஏடுகளின் மூலம் எங்களை குழப்பிவிட்டு இருந்தது. இவ்வாறு குழம்பிய நிலையில், அது யாராக இருந்தாலும் ஒரு தேசிய இனத்தின் விடுதலைக்காக உயிர்க்கொடை செய்தவனுக்கு வீரவணக்கம் செய்வதில் தவறில்லை என்று மலரஞ்சலி செலுத்திவிட்டு அந்த இடத்தில் நின்றிருந்த போது, ஒரு தமிழ் இளைஞர் சற்று பதட்டத்துடன் காரில் வந்து இறங்கினார். அவருடன் அவர் மனைவி, மற்றும் ஒரு யுவதி மேலும் பிள்ளைகள் வந்திருந்தார்கள்!

காரில் வந்து இறங்கிய இளைஞர் தன் மச்சினனை நேற்று இரவில் இருந்து காணவில்லை, காரில் இருக்கும் யுவதியின் கணவன்தான் அவன், வயது 34, அவன் தீவிர ஈழ உணர்வாளன். இங்கே ஒருவர் தீக்குளித்து இறந்த செய்தி அறிந்து பக்கத்து மாகாணத்தில் இருந்து வருகிறோம். தீக்குளித்தவரை யாராவது பார்த்தீர்களா என்று எங்களை நோக்கி கேள்வி எழுப்பினார். அவர் தன்னோடு கொண்டு வந்திருந்த அவருடைய மச்சினன் படத்தையும் நீட்டினார்!

நான் முன்பே இறந்த அந்த தோழரின் உடலை பார்த்து இருந்ததால், காரில் இருந்த இரு யுவதிகளின் தவிப்பையும் , குழந்தைகளின் ஏக்கத்தையும் பார்த்தவாரே, அவர் கொண்டு வந்திருந்த வீசா புகைப்படத்தை எட்டி பார்த்தேன், அதிர்ச்சி நெஞ்சில் இடியாய் இறங்கியது. அதற்கு மேல் அந்த இடத்தில் நிற்கும் துணிவு என்னிடம் இருந்திருக்கவில்லை. ஆம், தமிழீழ விடுதலை போராட்ட தீக்கு தன்னுடலையும் தின்ன கொடுத்து விட்டான், செந்தில் குமரன்!!!

கண்ணீர் அஞ்சலிகள்...









சுவிஸ் ஜேனிவாவில் தீக்குளித்த ரத்னசிங்கம் செந்தில்குமரன் உயிரிழப்பு

இரண்டாம் இணைப்பு ஜெனிவாவில் ஐ.நா.மனித உரிமை பேரவை தலைமை அலுவலகத்திற்கு முன்பாக உள்ள முன்றலில் வியாழக்கிழமை அதிகாலை 1:00 மணிளவில் தீக்குளித்த ரத்னசிங்கம் செந்தில்குமரன் இன்று மாலை லவுசான் சூவ் வைத்தியசாலையில் மரணமானார்.

அதிகாலை ஒருமணியளவில் ஜெனிவா ஐ.நா. பகுதியில் ரோந்து சுற்றி வந்த காவல்துறையினர் ஒருவர் தீப்பற்றி எரிந்து கொண்டிருப்பதை கண்டு அவரை ஜெனிவா வைத்தியசாலைக்கு எடுத்து சென்றனர். அதன் பின்னர் கடுமையான எரிகாயங்களுக்கு சிகிச்சை அளிக்கப்படும் லவுசான் சூவ் வைத்தியசாலைக்கு உலங்குவானூர்தியில் எடுத்து சென்றனர். அங்கு மாலை 4.30மணிக்கு அவர் இறந்தார் என காவல்துறையினர் தெரிவித்துள்ளனர்.

தீக்குழித்த ரத்னசிங்கம் செந்தில்குமரன் அருகில் தமிழீழத் தேசியத் தலைவரது படம் இருந்தாகவும் காவல்துறையினர் தெரிவித்துள்ளனர்.

அவர் தீக்குளித்த இடத்தில் சிறிய பிளாஸ்ரிக் கொள்கலன் ஒன்று எரிந்த நிலையில் காணப்பட்டதாகவும் அதிலேயே அவர் எரிபொருளை எடுத்து வந்திருக்கலாம் என்றும் காவல்துறையினர் தெரிவித்துள்ளனர்.

ரத்னசிங்கம் செந்தில்குமரன் சுவிஸ்ஸை சேர்ந்த தமிழர் என்றும் தாயகத்தில் கிளிநொச்சியை சேர்ந்தவர் என்றும் அறியமுடிகிறது. இவர் மூன்று பிள்ளைகளின் தந்தையாவார்.

வீரவணக்கம்