நவனீதம்பிள்ளையின் நடவடிக்கைகள் குறித்து சரத் பொன்சேகா அதிருப்தி

by **veelratna** Thu Aug 29, 2013 11:30 pm

ஐக்கிய நாடுகள் மனித உரிமைப் பேரவையின் ஆணையாளர் நவனீதம்பி;ள்ளையின் நடவடிக்கைகள் குறித்து முன்னாள் இராணுவத் தளபதி சரத் பொன்சேகா அதிருப்தி வெளியிட்டுள்ளார். நவனீதம்பிள்ளை சொந்த நிகழ்ச்சி நிரலுக்கு அமைய செயற்பட்டு வருவதாகக் குற்றம் சுமத்தியுள்ளார்.

தமது பக்க நியாயங்களைக் கேட்டறிந்து கொள்ள நவனீதம்பிள்ளை விரும்பவில்லை என அவர் சுட்டிக்காட்டியுள்ளார். ஒரு வார காலம் நவனீதம்பிள்ளை இலங்கையில் தங்கியிருப்பதாகவும், தம்மை சந்திக்க போதியளவு கால அவகாசம் காணப்பட்டதாகவும் தெரிவித்துள்ளார்.

இரண்டு வாரங்களுக்கு முன்னதாகவே சந்திப்பு ஒன்றுக்கு வாய்ப்பு அளிக்குமாறு ஐக்கிய நாடுகள் அமைப்பிடம் தாம் கோரியதாகக் குறிப்பிட்டுள்ளார். யுத்த கால மனித உரிமை மீறல்கள் தொடர்பில் நவனீதம்பிள்ளை மெய்யாகவே கரிசனை கொண்டிருந்தால், யுத்தம் இடம்பெற்ற காலத்தில் இராணுவத் தளபதியாக கடமையாற்றிய தம்மை சந்தித்திருக்க வேண்டியது அவசியமானது என அவர் சுட்டிக்காட்டியுள்ளார்.

தற்போதைய அரசாங்கத்தின் எதேச்சாதிகார செயற்பாடுகள் குறித்து விளக்கமளிக்க விரும்புவதாகத் தெரிவித்துள்ளார். ஜனாதிபதித் தேர்தலில் மோசடிகள் இடம்பெற்றதாகவும் அது குறித்து விசாரணை நடத்தப்பட வேண்டுமெனவும் அவர் குறிப்பிட்டுள்ளார்.

யுத்தம் இடம்பெற்ற காலத்தில் இராணுவத்தினர் உரிமை மீறல்களில் ஈடுபடவில்லை எனவும், தனிப்பட்ட நபர்கள் இராணுவ தீர்மானங்களுக்கு புறம்பாக சில நடவடிக்கைகளை மேற்கொண்டனர் எனவும் அவர் சுட்டிககாட்டியுள்ளார். இது குறித்து ஐக்கிய நாடுகள் மனித உரிரமைப் பேரவையின் ஆணையாளர் நவனீதம்பிள்ளைக்கு விளக்க விரும்புவதாகத் தெரிவித்துள்ளார்.

நாடு பாதக நிலைமைகளை எதிர்நோக்கி வருவதாகவும் தெற்கில் என்ன நடக்கின்றது என்பதனை ஐக்கிய நாடுகள் அமைப்பு புரிந்து கொள்ள வேண்டும் எனவும் அவர் சுட்டிக்காட்டியுள்ளார்.