என்ன துணிச்சல்?நகருக்குள்ளும் கேரள செருப்புக்கழிவு

கேரளாவிலிருந்து
கொண்டு வரப்பட்டு இதுவரை மாநில எல்லையில் மட்டுமே கொட்டப் பட்டு வந்த
செருப்புக் கழிவுகள், தற்போது எல்லை மீறி, கோவை மாநகராட்சி பகுதியிலும்
கொட்டப்படுகின்றன.

கேரள எல்லையை ஒட்டியுள்ள கோவை நகரின் வழியாக
கேரளாவுக்கு மணல், சிமென்ட், பால், அரிசி, பருப்பு, கறிவேப்பிலை, காய்கறி
உள்ளிட்ட அத்தியாவசிய பொருட்கள் மற்றும் மாடு, கோழி உள்ளிட்டவை
கேரளாவுக்கு கொண்டு செல்லப்படுகின்றன. ஓரிரு நாட்கள் இப்பொருட்கள் அங்கு
போகாவிட்டாலும், கேரளாவில் சிக்கலாகி விடும். உணவுப்பொருட்களை கேரளாவுக்கு
அனுப்பும் தமிழகத்துக்கு 'பிரதி உபகாரமாக' அங்கிருந்து கழிவு பொருட்களை
கொண்டு வந்து தமிழக எல்லைக்குள் கொட்டுவது வாடிக்கையாகி வருகிறது.
பொள்ளாச்சி அருகில் மாட்டிறைச்சி கழிவுகளை கொட்டி, பெரும் போராட்டமாக
வெடித்த பின், நிறுத்தப்பட்டது.அதன்பின், மருத்துவக் கழிவுகள் கொண்டு
வந்து கொட்டப்பட்டன. அதைத் தடுக்கவும் அரசு நடவடிக்கை எடுக்கவில்லை.
பல்வேறு அமைப்புகள் எதிர்ப்பை காட்டிய பின், அந்த பிரச்னைக்கு
முற்றுப்புள்ளி வைக்கப்பட்டது. இப்போது, அடுத்ததாக செருப்புக்கழிவுகள்
குவிக்கப்படுகின்றன. கடந்த ஆண்டில், பாலக்காடு ரோட்டில் எட்டிமடை,
திருமலையாம்பாளையம், க.க.சாவடி பகுதிகளில் ரோட்டின் இரு புறமும் மலை,
மலையாக செருப்புக் கழிவுகள் கொட்டப்பட்டன. அவை அங்குள்ள மழை தண்ணீரில்
ஊறி, பெரும் நாற்றத்தை ஏற்படுத்தின; சுகாதாரமும் சீர்கெட்டது.

அதையொட்டிய பகுதிகளில் உள்ள கிராமத்து
மக்கள், பெரும் அவதிக்கு உள்ளாகி மாவட்ட நிர்வாகத்திடம் புகார்
கொடுத்தனர். அப்போதும், நடவடிக்கை இல்லாததால், தாங்களாகவே இரவு
நேரங்களில் ரோந்து மேற்கொண்டு, கழிவுகளை கொட்டும் வாகனங்களை பிடித்தனர்.
சில வாகனங்களை கேரளாவுக்கே திருப்பி அனுப்பினர். மக்களின் கோபத்தை
அறிந்து, பல மாதங்களாக தமிழகத்துக்குள் செருப்புக் கழிவுகள் வருவது
தற்காலிகமாக நிறுத்தப்பட்டிருந்தது. இப்போது, அந்த கழிவுகள் எல்லை கடந்து,
கோவை மாநகராட்சி எல்லைக்குள்ளேயே வந்து குவிக்கப்படுகின்றன. கேரள - தமிழக
எல்லையைக் கடந்து, மதுக்கரை, கோவைப்புதூர், சுண்டக்காமுத்தூர் வழியாகவோ
அல்லது செல்வபுரம் வழியாகவோ வரும் இந்த வாகனங்கள், இரவோடு இரவாக
செல்வபுரம் பைபாஸ் ரோட்டின் இரு புறமும் செருப்பு கழிவுகளை மூட்டை
மூட்டையாக கொட்டிச் செல்கின்றன. கேரளாவிலிருந்து கொண்டு வந்து
கொட்டியதற்கான அடையாளங்கள் செருப்புகளில் காணப்படுகின்றன. கேரளாவிலிருந்து
இங்கு வந்து செருப்புக் கடைகள் வைத்துள்ளவர்களுக்கும், இதற்கும் தொடர்பு
இருக்குமா என்பது, அதிகாரிகள் விசாரித்தால் அம்பலமாகும்.

மாநில எல்லையை கடந்து கழிவுகள், இங்கு வர
தமிழக எல்லையிலுள்ள அரசுத்துறைகளின் சோதனைச் சாவடிகளில் உள்ள அலுவலர்களே
காரணம். கேரளாவிலிருந்து வரும் வாகனங்களில் என்ன இருக்கிறது, என்பதை
சோதனைச்சாவடி அலுவலர்கள் சோதனை செய்வதே இல்லை. வணிகவரித்துறை,
போக்குவரத்துத்துறை சோதனைச் சாவடிகளில் இருப்பவர்கள், மாமூல் பெற்று இந்த
வாகனங் களை அனுமதிப்பதாக புகார் எழுந்துள்ளது. கேரளாவுக்கு வாகனத்தில்
பொருட்களை கொண்டு செல்வோர், தமிழகத்துக்கு திரும்பி வரும் போது
செருப்புக்கழிவுகளை ஏற்றி வந்து, இங்கே கொட்டி விடுவதாகவும்
கூறப்படுகிறது. இதற்காக, இவர்கள் அதிகமான வாடகை வாங்குவதாகவும் தெரிகிறது.
பெரும்பாலும் வாகன உரிமையாளர்களுக்கு தெரியாமல், டிரைவர்கள், கிளீனர்கள்
இந்த அத்துமீறலில் ஈடுபடுகின்றனர். இவ்வாறு செய்யும் வாகனங்களை பிடித்து,
உரிமத்தையும், டிரைவர்களின் லைசென்சையும் ரத்து செய்தால் மட்டுமே
அத்துமீறல்களை தடுக்க முடியும்.

சோதனைச் சாவடிகள் வைத்துள்ள அரசுத்துறை
உயரதிகாரிகளையும் மாவட்ட நிர்வாகம் அழைத்து, கண்டிப்பான உத்தரவுகளை வழங்க
வேண்டும். இது போன்ற வாகனங்களை அனுமதிக்கும் அலுவலர்கள் மீது கடும்
நடவடிக்கை மேற்கொள்ள எடுக்க வேண்டும். பல நூறு கோடி ரூபாய் செலவழித்து,
கோவை நகரை அழகு படுத்தி வரும் மாநகராட்சி நிர்வாகமும் இந்த விஷயத்தில்
கவனம் செலுத்தி, இத்தகைய வாகனங்களை பிடிக்க களம் இறங்குவது அவசியம்.