சிறுநீரகக் கற்கள் உருவாகாமல் தடுப்பது எப்படி?

by **KAPILS** Sat May 18, 2013 11:00 am

பிரசவ வேதனைக்கு ஈடாக வலி தரும் ஓர் உபாதை உண்டென்றால் அது சிறுநீரக மற்றும் நீர்ப்பாதைக் கற்களால் (Kidney and Urinary stones) ஏற்படும் வலியே ஆகும்.
எழுபது வயதுக்கு உட்பட்டவர்களில் கிட்டதட்ட பத்து சதவீதம் பேர் இதை அனுபவித்துள்ளனர் என மருத்துவர்கள் தெரிவிக்கின்றனர்.

எல்லோருக்கும் இரண்டு சிறுநீரகங்கள் முதுகுத் தண்டின் இருபுறமும் விலா எலும்பின் கீழ் உள்ளன. இவை இரத்தத்தில் உள்ள நச்சுப் பொருட்களையும், தேவைக்கு அதிகமான நீரையும் வடிகட்டிச் சிறுநீராக மாற்றுகின்றன.

இது நுண் குழல்கள் வழியாக சிறுநீரகத் தொட்டிக்கு (Pelvis of the kidney) சென்று அங்கிருந்து சிறுநீரகக் குழல் (Ureter) மூலம் சிறுநீரகப் பையை (Urinary bladder) சென்றடைகின்றது.

சிறுநீர் வெளியேறும் வரை அது சிறுநீரகர் பையில் தங்குகிறது. கல்சியம் ஒக்சலேட், யூரிக் அமிலம் போன்ற பொருட்களின் அளவு சிறுநீரில் அதிகமானால் கற்கள் உருவாக வாய்ப்பு அதிகமாகிறது.

இப்பொருட்கள் படிக உருவம் பெற்று சிறுநீரகத்தில் சேர்ந்துவிடும். அதன்பின் இது கொஞ்சம் கொஞ்சமாகப் பெரிதாகி சிறுநீரகக் கல்லாகி விடுகிறது.

பொதுவாக கற்கள் சிறுநீரக வழியாக நகர்ந்து சென்று வெளியேறிவிடும். பெரிதாகி விட்ட கற்கள் சிறுநீரகப் பாதையை அடைத்து சிறுநீர் வெளியேறத் தடங்கல் ஏற்படுத்தும்.

சில நேரங்களில் இவை மிகப்பெரிதாகி சிறுநீரகத் தொட்டியை அடைத்துக் கொண்டு தொற்று மற்றும் தடையை ஏற்படுத்தலாம்.

பெரும்பான்மையான கற்கள் கல்சியம் ஒக்சலேட் அல்லது கல்சியம் பொஸ்பேட் வகையைச் சேர்ந்தவையாகும். மேலும் சிலருக்கு யூரிக் அமிலம், ஸ்ட்ரூவைட், சிஸ்டின் கொண்ட கற்களும் உருவாகலாம்.

கற்களின் இரசாயனக் கூட்டமைப்பை பொறுத்து சிகிச்சை மாறுபடலாம். கற்கள் உருவாக்கும் காரணங்களை உணவுப் பழக்கம் சார்ந்தவை என்றும் மருத்துவம் சார்ந்தவை என்றும் பிரித்துக் கொள்ளலாம்.

உணவு சார்ந்த காரணங்களில் திரவங்கள் அருந்தும் அளவு குறிப்பிடத்தக்கது. குறைவாக திரவம் உட்கொள்பவர்களுக்குச் சிறுநீர் குறைவாக உற்பத்தியாகி கல் உருவாக்கும் பொருட்களின் செறிவு அதிகமாகிறது.

தாராளமாக திரவங்கள் குறிப்பாக தண்ணீர் உட்கொண்டால் (குறைந்த பட்சம் ஒரு நாளைக்கு இரண்டு லீட்டர்) கல் உருவாகும் வாய்ப்பு குறைந்து விடுகிறது.

மதுவகைகள், கோப்பி, தேனீர் போன்றவற்றை அருந்துவதால் கல் உருவாகும் வாய்ப்பு அதிகமாவதில்லை.

உணவு மற்றும் திரவங்களில் உள்ள கல்சியத்தை அதிகமாக உட்கொள்வதால் கற்கள் உருவாகும் வாய்ப்பு அதகமாவதில்லை. பால், தயிர் போன்ற உணவுப் பொருட்களைத் தவிhப்பதால் கற்கள் அதிகமாக உருவாகலாம்.

எனினும் கல்சிய மாத்திரைகளை அளவுக்கு அதிகமாக வெறும் வயிற்றில் உட்கொண்டால் கற்கள் உருவாகும் வாய்ப்பு அதிகமாகிறது.

சிறுநீரகக் கற்களுக்கான அறிகுறிகள் பல வகைப்படும். சிறுநீரகத்திலிருந்து சிறுநீரகக் குழல்களுக்கு கற்கள் நகரும் போது இந்த அறிகுறிகள் மிகைப்படுகின்றன.

குறிப்பாக துடிக்க வைக்கும் வலி கூடிக் குறையக் கூடிய தன்மைக் கொண்டது. இருபது முதல் அறுபது நிமிடங்கள் வரை நீடிக்கும் அலைகளாக இவை தாக்கும்.

கல் இருக்கும் பக்கத்திலேயே வலி இருக்கும். கல் நகர்வதைப் பொறுத்து வலி முதுகின் ஒரு பக்கமாகவோ, விலா எழும்புகளின் நடுவிலோ, வயிற்றுப் பகுதியின் கீழோ, பிறப்புறுப்புகளின் பக்கமாகவோ ஏற்படலாம்.

சிறுநீரில் இரத்தம் கழிதல், சிறிய கற்கள் சிறுநீருடன் வெளியேறுதல் ஆகியவை ஏற்படக்கூடும். வலி தீவிரமானால் வாந்தியும் தொற்றும் ஏற்பட்டால் காய்ச்சலும் வரலாம். சிலருக்கு நோய்க்குறிகள் ஏதுவுமில்லாமல்வேறு காரணங்களுக்காகச் கோதனை செய்யும் போது சிறுநீர் பாதையில் கற்கள் இருப்பது தெரியவரலாம்.

கற்கள் இருப்பதை உறுதி செய்ய மருத்துவர் CT – கேன் அல்லது அல்ட்ராசவுண்ட் சோதனைக்கு சிபாரிசு செய்வார். வயிற்றுப் பகுதியை சாதரண எக்ஸ்ரே அல்லது ஐவிபி எனப்படும் விசேட எக்ஸ்ரே மூலமாகப் பரிசோதிக்கும் போது பெரும்பான்மையான கற்கள் தென்படும்.

ஆரம்ப சிகிச்சை அனைவருக்கும் பொதுவானது. வலி நிவாரண மருந்துகள் முதல் நிலை சிகிச்சையாக வழங்கப்படுகின்றன. தண்ணீர் அல்லது இதர திரவங்களை தாராளமாக உட்கொண்டால் சிறுநீரின் அளவு அதிகமாகி கற்களை வெளியேற்றும் வாய்ப்பு அதிகரிக்கும்.

குமட்டல் அல்லது வாந்தி காரணமாக எதுவும் குடிக்க முடியாதவர்கள் மருத்துவமனைக்குச் செல்வது நல்லது. அவர்களுக்கு இரத்த நாளங்கள் வழியாக திரவங்கள் செலுத்தப்படும்.

வழக்கமாக மருத்துவர்கள் வடிகட்டியின் வழியே சிறுநீரை பாய்ச்சச் சொல்வார்கள். வடிகட்டியில் பிடிபட்ட கற்களை இரசாயன சோதனைக்கு அனுப்பி எந்த வகையைச் சேர்ந்தது என்று தெரிந்து கொள்வது தடுப்புறை சிகிச்சைக் அவசியமானதாகும்.

5-9 மி.மீ அளவான கற்கள் வேறு சிகிச்சை எதுவுமின்றி வெளியேறிவிடும். ஆனால் 10 மி.மீ ஆமலான கற்கள் சிறுநீர்க்குழல் மூலம் வெளியேறுவது கடினம்.

அப்படிப்பட்டவர்களுக்கு மின் அலைகள் செலுத்தி கல் நொறுக்குதல் சிகிச்சை (Shock-wave Lithotripsy) பரிந்துரைக்கப்படலாம். வேறு சிலருக்கு அறுவை சிகிச்சைத் தேவைப்படலாம்.

வெகு சிலருக்கு நீர்குழல் உட்காட்டி (Ureteroscope) என்ற செயல்முறை மூலம் கற்களை வெளியே எடுக்க வேண்டி வரலாம்.

Dr. P. Periyasamy M.S. M.ch.(Uro)