வைகோவுக்கு எம்.பி., பதவி : ஜெ., கடைக்கண் பார்வை கிடைக்குமா?

அரசியலில்
பெரிய அளவிற்கு எந்தவித ஏற்றத்தையும் காணாமல் துவண்டு போயிருக்கும்
ம.தி.மு.க.,விற்கும், கட்சியின் பொதுச்செயலர் வைகோவிற்கும், விரைவில்,
"மறுமலர்ச்சி' ஆரம்பமாகும் என, அக்கட்சி தொண்டர்களிடையே பலமாக பேச்சு
அடிபட ஆரம்பித்துள்ளது.



கூட்டணியின்
தலைவர் என்பதையும் தாண்டி, தனது கட்சிக்கு மறுவாழ்வு தரும், "ரட்சகராக'
ஜெயலலிதாவை பெரிதும் நம்பியிருக்கிறார் வைகோ. கட்சியில்
நம்பிக்கைக்குரியவர்களாக இருந்த பல பிரமுகர்கள் வரிசையாக காலை வாரிய சோகம்
வைகோவிற்கு இல்லாமல் இல்லை. ஆனாலும், "கட்சிக்கு கண்டிப்பாக ஒருநாள்
ஏற்றம் கிடைக்கும்' என்ற நம்பிக்கை மட்டும் வைகோவிடம் திடமாக இருக்கிறது.
இந்நிலையில், தனக்கு ராஜ்யசபா எம்.பி., பதவி கிடைப்பதன் மூலம்,
தொண்டர்களிடையே புதிய எழுச்சியையும், உத்வேகத்தையும் எழுப்ப முடியும் என
வைகோ நினைக்கிறார். தொண்டர்களும், வைகோ எம்.பி.,யாகும் நாளை
எதிர்பார்த்தபடி உள்ளனர். ஆனால், பதவி கிடைக்க, ஜெயலலிதாவின் கடைக்கண்
பார்வை கிடைக்குமா என்பது தான், தொண்டர்களிடையே மிகப்பெரிய கேள்வியாக
உள்ளது.


சமீபத்தில், அ.தி.மு.க.,
பொதுச்செயலர் ஜெயலலிதாவை அவரது போயஸ் தோட்ட இல்லத்தில் வைகோ சந்தித்து,
பிறந்த நாள் வாழ்த்து தெரிவித்தார். அப்போது, ராஜ்யசபா எம்.பி., பதவி
குறித்து ஜெயலலிதாவிடம் வைகோ பேசியதாகவும், அதற்கு, தனது கட்சியினருக்கு
அப்பதவியை வழங்க இருப்பதாக ஜெ., தெரிவித்ததாகவும் அ.தி.மு.க.,
வட்டாரத்தில் பரபரப்பான பேச்சு உலா வருகிறது. இதனால், வைகோ சோகமாகவும்,
வருத்தமாகவும் இருக்கிறார் என, கட்சி வட்டாரங்களில் திடீரென புரளி
கிளம்பியது. அது குறித்து விசாரித்த போது, அப்படி எதுவும் இல்லை என்பது
உறுதியானது.


இது தொடர்பாக,
கட்சிப் பிரமுகர்கள் சிலர் கூறியதாவது: கடந்த லோக்சபா தேர்தலில் வைகோ
வெற்றி பெறுவார் என, அ.தி.மு.க., - ம.தி.மு.க.,வினர் மட்டுமல்லாமல்,
இலங்கை வாழ் தமிழர்களும் பெரிதும் எதிர்பார்த்தனர். ஆனால், அந்த
எதிர்பார்ப்பு தவிடுபொடியானது. தோல்வி அதிர்ச்சியிலிருந்து மீள்வதற்காக,
மக்கள் பிரச்னைகளை வைகோ கையில் எடுத்துக் கொண்டார். குறிப்பாக, நதிகள்
மீது தனது முழு கவனத்தையும் செலுத்தினார். முல்லைப் பெரியாறு, அமராவதி,
நெய்யாறு, செண்பகவல்லி, பாலாறு உள்ளிட்ட ஆறுகளின் பிரச்னைகளுக்காக பல
போராட்டங்களை நடத்தினார். சமீபத்தில் தூத்துக்குடி மாவட்டத்தில் நடந்த
ஒன்றிய குழு பெருந்தலைவர் தேர்தலில், அ.தி.மு.க., ஆதரவுடன் ஆளுங்கட்சியை
வீழ்த்தி ம.தி.மு.க., வெற்றி பெற்றுள்ளது. இனி, கட்சி மெல்ல எழும் என
நம்புகிறோம். அ.தி.மு.க.,வுக்கு கிடைக்கக் கூடிய இரு ராஜ்யசபா எம்.பி.,
பதவிகளில், ஒரு எம்.பி., பதவியை வைகோவுக்கு வழங்க வேண்டும். அவர்
டில்லிக்கு சென்றால், தமிழக அரசியலில் பெரிய அதிரடி மாற்றம் உருவாகும்.
ஒரு லோக்சபா தொகுதியில் நின்று வைகோ வெற்றி பெற்றால், தனது பெரும்பகுதி
நேரத்தை அத்தொகுதியின் மக்கள் நலப்பணிக்கு மட்டுமே செயல்படுத்த வேண்டும்.
ராஜ்யசபா பதவிக்கு தேர்ந்தெடுக்கப்பட்டால், வரும் சட்டசபை தேர்தலில் அவர்
அனைத்து தொகுதிகளிலும் சூறாவளி பிரசாரம் செய்து, அ.தி.மு.க., கூட்டணி
வெற்றிக்கு வழி வகுப்பார்.

வைகோவை
பொறுத்தவரையில், எம்.பி., பதவியை கடந்து, மாவட்ட, மாநில அரசியலைக் கடந்து,
தேசிய எல்லைக்கும் அப்பாற்பட்டு, சர்தேச அளவிலும், ஐ.நா., அமெரிக்க செனட்
சபையிலும் அவரது குரல் ஒலித்துள்ளது. தற்போது பள்ளி, கல்லூரிகள், கட்சி
பொதுக்கூட்டங்கள், மாநாடுகளில் அவர் குரல் ஒலித்தாலும், அவரது
சிம்மக்குரல் மீண்டும் ராஜ்யசபாவில் ஒலிப்பதை நாங்கள் கேட்க
ஆசைப்படுகிறோம். இவ்வாறு அவர்கள் தெரிவித்தனர். வைகோ இதுவரை மூன்று முறை
ராஜ்யசபா எம்.பி., யாகவும், இரு முறை லோக்சபா எம்.பி.,யாகவும்
பணியாற்றியுள்ளார். இனியும் அவர் பணியாற்ற வாய்ப்பு உள்ளதா என்பது,
ஜெ.,வுக்குத் தான் வெளிச்சம்