தமிழகம் இந்தியாவில்தான் உள்ளதா? வைகோவுக்கு வந்த சந்தேகம்

by **logu** Sat Sep 01, 2012 7:45 am

பூந்தமல்லி சிறப்பு முகாமில் அடைக்கப்பட்டுள்ளவர் இலங்கை தமிழ் அகதி
செந்தூரன். இவர் தன்னை விடுதலை செய்து திறந்தவெளி முகாமுக்கு அனுப்பக்கோரி
உண்ணாவிரதம் இருந்து வருகிறார்.

உடல் நலம் பாதிக்கப்பட்ட அவர்
ராயப்பேட்டை அரசு வைத்தியசாலையில் அனுமதிக்கப்பட்டு உள்ளார். அங்கும் தனது
போராட்டத்தை நடத்தி வருகிறார்.

செந்தூரனுக்கு ஆதரவாகவும் அவரை
விடுதலை செய்யக் கோரியும் ம.தி.மு.க. கட்நத 27ம் திகதி முதல் தொடர்
உண்ணாவிரதப் போராட்டம் நடத்தி வருகிறது. கட்சி தலைமை அலுவலகமான தாயகத்தில்
நடைபெற்று வரும் இந்த போரட்டத்துக்கு ஒவ்வொரு நாளும் ஒவ்வொரு பகுதியைச்
சேர்ந்த கட்சி நிர்வாகிகளும் தமிழ் உணர்வாளர்களும் உண்ணா விரதத்தில்
ஈடுபட்டு வருகிறார்கள். இன்று வைகோ தலைமையில் உண்ணாவிரதம் நடந்தது.

திருவல்லிக்கேணி, எழும்பூர், சேப்பாக்கம் பகுதி கட்சி நிர்வாகிகள் கலந்து
கொண்டனர். ம.தி.மு.க. துணைப் பொதுச்செயலாளர் மல்லை சத்யா, துரை
பாலகிருஷ்ணன், மனோகரன், குமாரி விஜயகுமார், பகுதி செயலாளர் தென்றல் நிஜார்
உள்பட பலர் கலந்து கொண்டனர். உண்ணாவிரதத்தில் வைகோ பேசியதாவது:-

இலங்கையில் இருந்து தங்கள் வாழ்வாதாரங்களை இழந்து தமிழகத்துக்கு அகதிகளாக
வந்தவர்கள் செங்கல்பட்டு சிறப்பு முகா மில் 40 பேரும் பூந்த மல்லி சிறப்பு
முகாமில் 8 பேரும் அடைத்து வைக்கப்பட்டுள்ளனர். எந்த தவறும் செய்யாமல்
பூந்தமல்லி சிறப்பு முகாமில் அடைபட்டு கிடந்த செந்தூரன் நியாயம் கேட்டு
கடந்த 26 நாட்களாக போராடி வருகிறார்.

கடந்த 12 நாட்களாக ஒரு
சொட்டு தண்ணீர் கூட அருந்தாமல் உண்ணாவிரத போராட்டத்தில் ஈடுபட்டு
வருகிறார். எந்த நிமிடத்திலும் அவர் உயிர் பிரியலாம். அவரது உயிரை
காப்பாற்ற தமிழக முதல்-அமைச்சரை வலியுறுத்தி இருக்கிறோம். அதற்காகத்தான்
இந்த உண்ணாநிலை அறப் போராட்டத்தை நடத்துகிறோம்.

இந்திய குற்றவியல்
சட்டத்துக்கு எதிராக செந்தூரன் எந்த தவறும் செய்யவில்லை. நான்
வெளிப்படையாக ஒன்றை சொல்கிறேன். இந்தியாவில் விடுதலைப்புலிகள் இயக்
கத்துக்கு தடை விதிக்கப்பட்டுள்ளது. அந்த தடையை நீட்டிக்க இவர்கள் மீது
போடப்பட்டுள்ள பொய் வழக்குகள் மூலம் முகாந்திரம் தேடுகிறார்கள். இதை
நியாயப்படுத்ததான் இந்த வழக்குகள் மூலம் பொய்யான ஆதாரங்களை
திரட்டுகிறார்கள். கடந்த ஆண்டு ஜூலை மாதம் 18-ம் திகதி தேவக்கோட்டையில்
வைத்து உரிய ஆவணங்கள் இல்லை என்பதால் செந்தூரன் கைது செய்யப்பட்டார்.

அங்கிருந்து செங்கல்பட்டு சிறப்பு முகாமில் கொண்டு அடைத்தார்கள். அதன்
பிறகு 6 மாதம் கழித்து கேரளாவுக்கு அழைத்து சென்றுள்ளனர். அங்கு எர்ணாகுளம்
கோர்ட்டில் சொந்த ஜாமீனில் விடுதலை செய்யப்பட்ட செந்தூரனை கேரள பொலிஸார்
தமிழக பொலிஸாரிடம் ஒப்படைத்துள்ளனர். கியூபிரிவு பொலிஸார் தவறான தகவல்களை
அரசுக்கு கொடுத்து வருகிறார்கள்.

செந்தூரன் திறந்து
வெளிமுகாமுக்கு அனுப்ப கோரி போராட்டத்தில் ஈடுபட்டுள்ளார். அவரைப் போல்
முகாமில் அடைபட்டு கிடக்கும் 48 பேரில் 23 பேர் மன அழுத்தத்தில் மனநலம்
பாதிக்கப்பட்டுள்ளதாக மருந்துவர்கள் குழு அறிக்கை கொடுத்துள்ளது.
அரசுக்கும் இது தெரியும். நான் வைத்தியசாலையில் செந்தூரனை பார்த்தபோதும்
இதைத்தான் அவர் என்னிடம் கூறினார்.

நான் போராட்டத்தை கைவிட
வற்புறுத்தியும் மறுத்து விட்டார். என் சொந்தங்கள் 1 1/2 லட்சம் பேர்
கொன்று ஒழிக்கப்பட்டு உள்ளனர். நான் ஒருவன் இறந்தாலும் பரவாயில்லை.
அடைபட்டு கிடக்கும் மற்ற வர்களுக்காவது தீர்வு கிடைக்கட்டும் என்கிறார்.
எந்த குற்றமும் செய்யாமல் முகாம்களில் அடைக்கப்பட்டுள்ள இவர்களை திறந்த
வெளி முகாமுக்கு அனுப்புங்கள் என்று தமிழக அரசை கேட்டுக் கொள்கிறேன்.

சிங்கள இராணுவத்துக்கு இந்தியாவில் எங்குமே பயிற்சி அளிக்கக்கூடாது என்று
வலியுறுத்தினோம். தமிழ் உணர்வாளர்கள் அத்தனை பேரும் வலியுறுத்தினார்கள்.
அப்படி இருந்தும் பெங்களூரில் பயிற்சி அளிக்கிறார்கள். அப்படியானால்
தமிழகம் இந்தியாவில் இல்லை என்று சொல்கிறார்களா? இதைச் சொன்னால்
இறையாண்மைக்கு எதிராக பேசுகிறார்கள் என்று சொல்வார்கள். அதைபற்றி எனக்கு
கவலையில்லை. எந்த குற்றமும் செய்யாத இவர்கள் கோரிக்கை நிறைவேறும் வரை இந்த
அறப் போராட்டம் தொடரும்.

இவ்வாறு அவர் பேசினார்.