ஆணுறைகளால் அழியும் அரியவகை ஆமைகள் பவளப்பாறைகள் ! இந்திய பெண் விஞ்ஞானி

கடலில் பவளப்பாறைகளை தொடர்ந்து அழித்தால் மீன்வளம் மட்டுமல்லாமல் மனித இனமும் அழியும் அபாயம் உள்ளது.


கடலில் மிதக்கும் ஆணுறைகளால்
அரியவகை ஆமைகள் முற்றிலுமாக அழிந்துவிட்டது என்று இந்திய கடல் ஆராய்ச்சி
பெண் விஞ்ஞானி அனிதா ஜார்ஜ் அதிர்ச்சி அளிக்கும் தகவல் தெரிவித்தார்.


முதுகில் சிலிண்டர், முகத்தில்
மாஸ்க் போட்டுக்கொண்டு ஆழ்கடலில் ஆராய்ச்சி செய்யும் சவாலான பணியில்
ஈடுபட்டு வரும் பெண் கடல் ஆராய்ச்சியாளர் அனிதா ஜார்ஜ். இவரது சொந்த ஊர்
நாகர்கோவில்.


இந்தியாவின் முதல் பெண் கடல்
ஆராய்ச்சியாளர் என்ற பெருமையைப் பெற்றுள்ள இவர், நெல்லை மனோன்மணியம்
சுந்தரனார் பல்கலைக்கழகத்தில் உயிர் தொழில்நுட்பத்துறையில் எம்.பில்.
மற்றும் ''இந்தியாவின் தென்மேற்கு, தென்கிழக்கு கடலோர பகுதிகளில் உள்ள கடல்
பஞ்சுகள்'' என்ற தலைப்பில் ஆய்வு செய்து முனைவர் பட்டம் பெற்றுள்ளார்.
ஆசியா, ஐரோப்பா, வட-அமெரிக்காவில் உள்ள பல்வேறு பகுதிகளுக்கு சென்று
ஆராய்ச்சி செய்து வருகிறார்.


கன்னியாகுமரி மாவட்டத்தில்
முட்டம், மன்னார் வளைகுடா, கேரள மாநிலம் விழிஞ்ஞம், லட்சத்தீவு, கோவா,
இலங்கை, அமெரிக்கா போன்ற நாட்டுகளிலுள்ள ஆழ்கடல் பகுதியில் 1997-ம்
ஆண்டிலிருந்து கடல் பஞ்சுகள் மற்றும் கடல்வாழ் உயிரினங்கள் குறித்து ஆய்வு
செய்து வருகிறார். இதுவரை 61 வகையான கடல் பஞ்சுகளை அறிமுகம் செய்துள்ளார்.
இந்த வகை கடல் பஞ்சுகள் கேன்சர், எய்ட்ஸ் உள்பட பல்வேறு நோய்களை
குணப்படுத்தும் தன்மை கொண்டவை என்று கண்டறியப்பட்டுள்ளது.


குறிப்பாக வங்காளவிரிகுடா,
மன்னார் வளைகுடா, அரபிக்கடல் பகுதியில் உள்ள கேரள மாநிலம் விழிஞ்ஞம் கடல்
பகுதியில் புதிய வகை உயிர்காக்கும் அரிய மருத்துவ குணம்கொண்ட கடல் பஞ்சுகள்
இருப்பதையும் கண்டுப்பிடித்து இருக்கிறார். கடல் விசிறி, பவளப்பாறைகள்
பற்றியும் இவரது ஆய்வு தொடர்கிறது.


இவர் நாகர்கோவிலில் அமெரிக்க நிதி
உதவியுடன் செயல்படும் கடல் ஆராய்ச்சி நிறுவனமான, சுற்றுச்சூழல் ஆராய்ச்சி
மற்றும் சமூக கல்வி நிறுவனத்தில் விஞ்ஞானியாக இருக்கிறார். முன்பு
லட்சத்தீவில் உள்ள டபிள்ï.டபிள்ï.எப்-இந்தியா நிறுவனத்தின் கவுரவ கடல்
ஆராய்ச்சியாளராக இருந்தார்.


மன்னார் வளைகுடாவில் 150 மீட்டர்
ஆழம் வரை சென்று கடல் ஆராய்ச்சி செய்து பல சாதனைகள் படைத்ததால், இவருடைய
ஆர்வத்தை பாராட்டி அமெரிக்காவில் உள்ள கன்ஸாஸ் பல்கலைக்கழகத்தில் நடந்த உலக
ஆழ்கடல் ஆராய்ச்சி குறித்த மாநாட்டில் இந்தியா சார்பில் அவர் கலந்து
கொண்டது குறிப்பிடத்தக்கது.


கடல் ஆராய்ச்சி பற்றி அனிதா ஜார்ஜ் நமது நிருபரிடம் கூறியதாவது:-


இறைவன் நமக்கு அளித்துள்ள கடலில்
இயற்கை வளங்கள் கொட்டிக்கிடக்கின்றன. கடலில் லட்சக்கணக்கான உயிரினங்கள்
வாழ்கின்றன. இவற்றில் மீன்களை மட்டுமே நாம் அதிகம் பயன்படுத்துகிறோம்.
மீதமுள்ள வளங்களை பயன்படுத்துவதில்லை. கடலில் பவளப்பாறைகளில்தான் மீன்கள்
அதிகம் வாழ்கின்றன.


துறைமுகத்திற்கு வரும்
கப்பல்களில் இருந்து கொட்டப்படும் கழிவுகள், மீனவர்கள் வீசி எறியும்
வலைகள், தொழிற்சாலை கழிவுகள் போன்ற பல காரணங்களால் பவளப்பாறைகள் அழிந்து
வருகின்றன. சுனாமி வருவதற்கு முன்பும், வந்த பின்னும் கடலில் அகழ்
ஆராய்ச்சி செய்தபோது பவள பாறைகள் பெருமளவு சேதமடைந்திருந்தது
கண்டுபிடிக்கப்பட்டது. பவளப்பாறை அதிகம் காணப்பட்ட சிதம்பரம்-பிச்சாவரம்
பகுதியில் சுனாமி பாதிப்பு அதிகமில்லை. அப்பகுதியில் மாங்குரோவ் காடுகளும்,
பவளப்பாறைகளும் அதிகம் இருப்பதே அதற்கு காரணம்.


மிக்சி, கிரைண்டரைக்கூட கடலில்
போடுகிறார்கள். ஆணுறைகளும் (காண்டம்) கடலுக்குள் கிடக்கின்றன. ஆணுறைகளை,
சில அரியவகை ஆமைகள் மீன்கள் என்று தவறாக நினைத்து சாப்பிட்டுவிடுகின்றன.
இதனால் அந்த இனம் அழிந்து வருகிறது. இது, மிகவும் சோகத்திலும் சோகமாக
உள்ளது.


லட்சத்தீவில் பிளாஸ்டிக் உள்பட
கண்ட பொருட்களைக் கொட்டுவதற்கு தடை விதிக்கப்பட்டிருப்பதால் அந்த கடல்பகுதி
மாசு இல்லாமல் பளிச்சென்று இருக்கிறது. கடல் ஆராய்ச்சிக்கு இந்த பகுதி
மிகவும் ஏற்ற இடமாகும்.


அதேபோல் தாய்லாந்து, ஹாங்காங்
கடல் பகுதியில் கடல் விசிறியும், கடல் குச்சியும், மத்திய கிழக்கு
நாடுகளில் உள்ள ஓமன் கடல், அரேபியன் கடல் பகுதியில் அபூர்வ வகை
பவளப்பாறைகளும் உள்ளன. கடலுக்கு அடியில் மீன்கள், பிற உயிரினங்களின் பயணம்,
செடிகள், பாசிகள் அடங்கிய தோட்டங்களை காண கண்கோடி வேண்டும்.


இயற்கை வளங்கள் கொட்டிக்கிடக்கும்
கடலை, மாசுபடுத்துவதை உடனே நிறுத்த வேண்டும். பவளப்பாறைகளை அழித்தால்
மீன்வளம் மட்டுமல்லாமல் மனித இனமே அழியும் அபாயம் ஏற்படும். கடல் வளத்தை
காப்பது நமது ஒவ்வொருவரின் கடமை ஆகும்.


இவ்வாறு அனிதா ஜார்ஜ் கூறினார்.