ரகானே விஸ்வரூபம்! * முதல் சதம் விளாசினார் * ராஜஸ்தான் அசத்தல் வெற்றி * பெங்களூரு அணி சொதப்பல்

[You must be registered and logged in to see this image.]



பெங்களூரு: ஐந்தாவது
ஐ.பி.எல்., தொடரின் முதல் சதத்தை ரகானே விளாசினார். இவர் 103 ரன்கள்
விளாச, ராஜஸ்தான் ராயல்ஸ் அணி 59 ரன்கள் வித்தியாசத்தில் அசத்தல் வெற்றி
பெற்றது. பவுலிங், பேட்டிங்கில் ஏமாற்றிய பெங்களூரு அணி, சொந்த மண்ணில்
சொதப்பியது.
பெங்களூருவில் நேற்று நடந்த ஐ.பி.எல்., தொடரின்
18வது லீக் போட்டியில் ராஜஸ்தான் ராயல்ஸ், பெங்களூரு ராயல் சாலஞ்சர்ஸ்
அணிகள் மோதின. "டாஸ் வென்ற ராஜஸ்தான் அணி கேப்டன் டிராவிட், "பேட்டிங்
தேர்வு செய்தார்.
"சூப்பர் துவக்கம்:
ராஜஸ்தான்
அணிக்கு வலுவான துவக்கம் கிடைத்தது. ஒருபக்கம் டிராவிட் அடக்கி வாசிக்க,
மறுபக்கம் ரகானே வெளுத்து வாங்கினார். அரவிந்த் ஸ்ரீநாத் ஓவரில் ரன் மழை
பொழிந்தார். வெட்டோரி சுழலில் டிராவிட்(25) சிக்கினார்.
ஷா அதிரடி:
அடுத்து
வந்த ஓவேஸ் ஷா, கெய்ல் ஓவரில் 2 சிக்சர், ஒரு பவுண்டரி அடிக்க,
ஒட்டுமொத்தமாக 21 ரன்கள் எடுக்கப்பட்டன. பின் வினய் குமார் ஓவரில் ரகானே
ஒரு சிக்சர், ஷா இரண்டு சிக்சர், ஒரு பவுண்டரி அடிக்க, மொத்தம் 24 ரன்கள்
எடுக்கப்பட்டன. இவர்களது அதிரடியில் அனுபவ முரளிதரனும் தப்பவில்லை. இவர்
வீசிய போட்டியின் 18வது ஓவரில் ஷா ஒரு பவுண்டரி, ரகானே ஒரு சிக்சர்,
பவுண்டரி அடிக்க, ஒட்டுமொத்தமாக 17 ரன்கள் எடுக்கப்பட்டன. ஷா 60
ரன்களுக்கு(5 பவுண்டரி, 5 சிக்சர்), ஜாகிர் பந்தில் அவுட்டானார்.
பங்கஜ் அபாரம்:
கடின
இலக்கை விரட்டிய பெங்களூரு அணிக்கு போத்தா வீசிய முதல் பந்திலேயே சிக்சர்
அடித்து மிரட்டினார் மயான்க் அகர்வால். போத்தாவின் அடுத்த ஓவரில் இவர் 2
சிக்சர், பவுண்டரி அடித்தார். அமித் சிங் பந்தை கெய்ல், சிக்சருக்கு
அனுப்ப, எதிர்பார்த்த துவக்கம் கிடைத்தது. இந்த நேரத்தில் போட்டியின் 5வது
ஓவரை வீசிய பங்கஜ் சிங் திருப்புமுனை ஏற்படுத்தினார். நான்காவது பந்தில்
அகர்வாலை(34) வெளியேற்றினார். 6வது பந்தில் கெய்லை(8) போல்டாக்கினார்.
திரிவேதி கலக்கல்:
இதற்கு
பின் சித்தார்த் திரிவேதி அசத்தினார். இவரது "வேகத்தில் டிவிலியர்ஸ்(6),
விராத் கோஹ்லி(22), சவுரப் திவாரி(17), கேப்டன் வெட்டோரி(1) போல்டாகினர்.
முகமது கைப்(14) தாக்குப்பிடிக்கவில்லை. வினய் குமார்(11), ஜாகிர் கான்(0)
ஏமாற்றினர். பெங்களூரு அணி 19.5 ஓவரில் 136 ரன்களுக்கு
ஆல்-அவுட்டாகி தோல்வி அடைந்தது. தான் வளர்ந்த மண்ணில் வெற்றிக் கொடி
நாட்டிய ராஜஸ்தான் அணி கேப்டன் டிராவிட், தன்னை புறக்கணித்த பெங்களூரு
சாலஞ்சர்ஸ் நிர்வாகத்துக்கு தக்க பதிலடி கொடுத்தார்.
ஆட்ட நாயகன் விருதை ரகானே தட்டிச் சென்றார்.
ஒரே ஓவரில் 6 பவுண்டரி: ரகானேவுக்கு,
பெங்களூரு அணியின் அரவிந்த் ஸ்ரீநாத் மீது என்ன கோபமோ தெரியவில்லை. இவரது
பந்துவீச்சை ஒருகை பார்த்தார். போட்டியின் 14வது ஓவரை வீசிய இவருக்கு மறக்க
முடியாத "அடி கொடுத்தார். முதல் பந்தை பவுண்டரிக்கு பறக்க விட்டார்.
தொடர்ந்து 2வது, 3வது, 4வது, 5வது, 6வது பந்துகளும் பவுண்டரிக்கு சென்றன.
இதன் மூலம் ஐ.பி.எல்., வரலாற்றில், ஒரே ஓவரில் தொடர்ந்து 6 பவுண்டரி அடித்த
முதல் வீரர் என்ற சாதனை படைத்தார். இந்த ஓவரில் மட்டும் 24 ரன்கள்
எடுக்கப்பட்டன.
"ஆரஞ்சு தொப்பி: சதம் அடித்த ரகானே,
இத்தொடரில் அதிக ரன் எடுத்தவர்களுக்கான "ஆரஞ்சு நிற தொப்பியை பெற்றார்.
இவர் 5 போட்டிகளில் 260 ரன்கள் குவித்துள்ளார். அடுத்த இடத்தில் ராஜஸ்தான்
அணியின் ஓவேஸ் ஷா(204) உள்ளார். சென்னை வீரர் டு பிளசிஸ்(171) மூன்றாவது
இடத்துக்கு பின்தங்கினார்.
10 ஓவரில் 134 ரன்கள்: ராஜஸ்தான்
அணி முதல் 10 ஓவரில் 61 ரன்கள் தான் எடுத்தது. பின் ரகானே, ஓவேஸ் ஷா
அதிரடியாக விளையாட, கடைசி 10 ஓவரில் 134 ரன்கள் எடுக்கப்பட்டன.