ஐவர் குழுவில் இடம்பெறாதது சட்ட விரோதம் : ஜெயலலிதா காட்டமான அறிக்கை

by **Tamil** Tue Feb 23, 2010 7:02 am

சென்னை
: "முல்லைப் பெரியாறு பிரச்னையில், சுப்ரீம் கோர்ட் அமைத்துள்ள ஐவர்
குழுவில், தமிழகம் இடம் பெறாது என்று, கருணாநிதி அறிவித்திருப்பது
முறையற்ற செயல்; அரசியலமைப்புச் சட்டத்திற்கு எதிரானது' என, அ.தி.மு.க.,
பொதுச் செயலர் ஜெயலலிதா குற்றஞ்சாட்டியுள்ளார்.

அவர் வெளியிட்டுள்ள அறிக்கை:அ.தி.மு.க.,
ஆட்சியில், சுப்ரீம் கோர்ட்டில் எடுத்து வைக்கப்பட்ட திறமையான வாதங்களால்,
முல்லைப் பெரியாறு அணையின் நீர் மட்டத்தை 136 அடியில் இருந்து, 142 அடியாக
உயர்த்திக் கொள்ளலாம் என சுப்ரீம் கோர்ட் உத்தரவிட்டது.இந்த தீர்ப்பை
அவமதிக்கும் வகையில், கேரள அரசு சட்டம் இயற்றியவுடன், அந்த சட்டத்தை
எதிர்த்து உடனடியாக சுப்ரீம் கோர்ட்டில் மனு தாக்கல் செய்யப்பட்டது.ஆட்சி
மாற்றம் ஏற்பட்டபின், சுப்ரீம் கோர்ட் தீர்ப்பின்படி, அணையின் நீர்
மட்டத்தை உயர்த்த முதல்வர் கருணாநிதி நடவடிக்கை எடுக்காமல், கேரள அரசின்
சட்டத்திற்கு மதிப்பளித்து விட்டார். அதன்பின், சுப்ரீம் கோர்ட்டில்
வழக்கு நடந்த போது, தமிழகத்தின் சார்பில், வலுவான வாதங்கள் எடுத்து
வைக்கப்படவில்லை.

இப்பிரச்னையை
சுப்ரீம் கோர்ட்டின் அரசியல் சாசனப் பிரிவிற்கு மாற்ற முடிவு செய்த போது,
தமிழகம் அதை எதிர்க்கவில்லை. இது கருணாநிதியால், வேண்டுமென்றே செய்யப்பட்ட
மிகப்பெரிய துரோகம். முல்லைப் பெரியாறு பிரச்னை மட்டுமின்றி, அனைத்து
நதிநீர்ப் பிரச்னைகளிலும் இதே நிலைமை தான் உள்ளது.முல்லைப் பெரியாறு
பகுதியில், புதிய அணை கட்டுவதற்கான ஆய்வு நடத்த, மத்திய அரசு அனுமதி
அளித்ததைக் கண்டித்து, கண்டனப் பொதுக்கூட்டம் அறிவித்துவிட்டு, அதையும்
கருணாநிதி கைவிட்டார். பின்னர், "யாரிடம் முறையிடுவது என்றே தெரியவில்லை'
என்று புலம்பினார்.தற்போது, சுப்ரீம் கோர்ட் அரசியல் சாசனப் பிரிவு, ஓய்வு
பெற்ற தலைமை நீதிபதி தலைமையில், ஐவர் குழுவை அமைத்துள்ளது. இந்த குழுவில்,
பங்கேற்பதில்லை என தீர்மானம் நிறைவேற்றியதன் மூலம், பிரச்னையைக் கைகழுவி
விட்டுவிட்டார்.தமிழக அரசின் சார்பில் தொடுக்கப்பட்ட வழக்கில் தான், இது
போன்ற உத்தரவை சுப்ரீம் கோர்ட் பிறப்பித்துள்ளது.

இந்த
குழுவில், இடம் பெறாததன் மூலம், கேரள அரசின் சட்டத்தை தமிழக அரசு
ஆதரிப்பதாக அர்த்தம் ஆகிவிடாதா?தமிழகத்தின் சார்பில் யாரும்
நியமிக்கப்படவில்லை என்றால், தமிழகத்தினுடைய கருத்துக்களை பிரதிபலிக்க
முடியாத சூழ்நிலை வந்துவிடாதா? தமிழகத்தின் சார்பில், எடுத்துச் சொல்ல
ஒன்றுமில்லை என சுப்ரீம் கோர்ட் எடுத்துக் கொண்டு விடாதா?

இதைப்பற்றியெல்லாம்
யோசிக்காமல், ஐவர் குழுவில் தமிழகம் இடம் பெறாது என்று கருணாநிதி
அறிவித்திருப்பது முறையற்ற செயல்."இந்திய அரசியல் சாசனத்திற்கு
நம்பிக்கையுடனும், நாணயத்துடனும் நடந்து கொள்வேன்' என்று பதவிப் பிரமாணம்
எடுத்துக் கொண்ட முதல்வர், சுப்ரீம் கோர்ட் தீர்ப்பை உதாசீனப்படுத்துவது
இந்திய அரசியலமைப்புச் சட்டத்தை மீறும் செயல்.இந்த துரோகச் செயலுக்கு எனது
கடும் கண்டனத்தை தெரிவிப்பதோடு, சுப்ரீம் கோர்ட்டால் அமைக்கப்பட்ட ஐவர்
குழுவில் தமிழகத்தின் சார்பில், திறமையான ஒருவரை நியமித்து, தமிழகத்தின்
உரிமையை நிலைநாட்ட நடவடிக்கை எடுக்க வேண்டும்.இவ்வாறு ஜெயலலிதா
அறிக்கையில் தெரிவித்துள்ளார்