நக்கீரன் கோபால் மீது நடவடிக்கை கோரி கோர்ட்டில் மனு; பல இடங்களில் புகார்

by **மாலதி** Tue Jan 10, 2012 7:33 am

"நக்கீரன்' கோபால் உட்பட மூவர் மீது வழக்குப் பதிவு செய்து நடவடிக்கை
எடுக்க கோரி, அ.தி.மு.க., ஈரோடு புறநகர் வழக்கறிஞர் பிரிவு தலைவர் அருள்
முருகன், ஈரோடு தலைமை குற்றவியல் நீதித்துறை நடுவர் மன்றத்தில் மனு தாக்கல்
செய்தார். மனுவில் கூறியுள்ளதாவது: முதல்வர் ஜெயலலிதா குறித்து வெளியான
செய்தியை கண்டித்து, சென்னையில், "நக்கீரன்' வார இதழில் அலுவலகம்
தாக்கப்பட்டது. மாநிலம் முழுவதும், "நக்கீரன்' இதழ் எரிக்கப்பட்டது.
இச்செய்தியை
வெளியிட்ட நக்கீரன் ஆசிரியர் கோபால், இணை ஆசிரியர் காமராஜ், ஈரோடு மாவட்ட
விநியோகிஸ்தர் பெரியசாமி ஆகியோர் மீது நடவடிக்கை எடுக்க வேண்டும்.
அப்புத்தகத்தில் வெளியான செய்தி முதல்வர் ஜெயலலிதாவின் புகழுக்கும்,
அ.தி.மு.க.,வுக்குள் களங்கம் ஏற்படுத்தும் வகையிலும், பொது அமைதிக்கு
குந்தகம் ஏற்படுத்தும் வகையிலும், உள் நோக்கம் கொண்டதாகவும், முதல்வர் மீது
அவதூறான எண்ணத்தை மக்களிடம் பரப்பும் நோக்குடனும் வெளியிடப்பட்டுள்ளது.
எனவே, இந்திய தண்டனைச்சட்டம், 501 - தவறான செய்தியை பதிப்பித்தல், 502 -
தவறான செய்தியை வெளியிடுதல், 504 - பொது அமைதிக்கு பங்கம் விளைவித்தல்,
ஆகிய பிரிவுகளின் கீழ், அம்மூவர் மீது வழக்குப் பதிவு செய்து விசாரித்து,
தண்டிக்கப்பட வேண்டும். இவ்வாறு மனு தாக்கல் செய்துள்ளார்.
திருச்சி:
ஜெயலலிதா குறித்து அவதூறாக செய்தி வெளியிட்ட, "நக்கீரன்' வாரப் பத்திரிக்கை
மீது, வழக்குப் பதிவு செய்யக் கோரி, அ.தி.மு.க., வழக்கறிஞர்கள் சார்பில்,
திருச்சி மாநகர போலீஸ் கமிஷனர் அலுவலகத்தில் புகார் அளிக்கப்பட்டது.
திருச்சி
அ.தி.மு.க., வழக்கறிஞர் பிரிவு மாவட்டச் செயலாளர் ராஜேந்திரன் தலைமையில்,
30க்கும் மேற்பட்ட வழக்கறிஞர்கள், நேற்று திருச்சி மாநகர கமிஷனர்
அலுவலகத்துக்கு வந்திருந்தனர். "நக்கீரன்' வாரப் பத்திரிக்கை மீது,
ஐ.பி.சி., 153 (இழிவுப்படுத்தும் விதமாக செய்தி அச்சிட்டு கலவரத்தை
ஏற்படுத்துதல்) மற்றும் 503 (இழிவான செய்தியை வெளியிட்ட, அச்சிட்ட,
விற்பனையாளர் மீது நடவடிக்கை) ஆகிய பிரிவுகளின் கீழ், வழக்குப் பதிவு
செய்யக் கோரி, மனு கொடுத்தனர். கமிஷனர் மாசானமுத்து, விடுமுறையில்
இருப்பதால், திருச்சி மாநகர சட்டம் ஒழுங்கு துணை கமிஷனர் ஜெயபாண்டியன்,
மனுவை பெற்றுக் கொண்டார். வழக்குப் பதிவு குறித்து, அரசு தரப்பு
வக்கீல்கள் மற்றும் மாநகர போலீசார், நேற்று மாலை 6 மணி வரை நடத்திய
ஆலோசனையில், முடிவு எட்டப்படவில்லை.

சென்னை: சென்னை, பெரம்பூரில்,
வைஷ்ணவ பேரவை செயல்பட்டு வருகிறது. இந்த பேரவையின் தலைவர் ஜெயந்தி
ஐயங்கார், நேற்று காலை சென்னை போலீஸ் கமிஷனர் அலுவலகத்திற்கு வந்தார்.
அப்போது அவர் அளித்த புகாரில் கூறியிருப்பதாவது; கடந்த 7ம் தேதி நக்கீரன்
வார இதழில், தமிழக மக்களால் ஒருமனதாக தேர்ந்தெடுக்கப்பட்ட முதல்வர்
ஜெயலலிதாவைப் பற்றி உண்மைக்குப் புறம்பான அவதூறு செய்திகளை, முதல்வரின்
புனிதத்தை கெடுக்கும் வகையில் வெளிடப்பட்டுள்ளது. ஆறு கோடி தமிழர்களால்
தேர்ந்தெடுக்கப்பட்ட ஒரு மாநில முதல்வரைப் பற்றிய அவதூறு செய்திகளைப்
பரப்புவது, ஓட்டளித்தவர்களுக்கு மன உளைச்சலை ஏற்படுத்துவதுடன், ஜனநாயகத்தை
அவமதிக்கும் செயல். இவ்வாறு,முதல்வரின் பெயரினை கெடுக்கும் நோக்கில்
செய்தியினை வெளியிட்டுள்ள நக்கீரன் கோபாலை விசாரித்து, தக்க நடவடிக்கை
எடுக்க வேண்டும். இவ்வாறு அதில் கூறப்பட்டுள்ளது. முதல்வர் ஜெயலலிதா
தொடர்பான செய்திக்கு எதிர்ப்பு தெரிவித்து மூன்றாவது நாளாக நேற்று வடசென்னை
தெற்கு அ.தி.மு.க.,வினர், நக்கீரன் கோபால் கொடும்பாவியை எரித்து
ஆர்பாட்டம் நடத்தினர்.