தற்கொலை செய்து கொண்ட செங்கொடி உடலுக்கு தலைவர்கள் அஞ்சலி!

காஞ்சிபுரம்: மரண தண்டனையை எதிர்த்து தீக்குளித்து தற்கொலை செய்து
கொண்ட இளம்பெண் செங்கொடி உடலுக்கு வைகோ, திருமாவளவன் உள்ளிட்ட பலர் அஞ்சலி
செலுத்தினர். திமுக தலைவர் கருணாநிதி சார்பில் முன்னாள் அமைச்சர்
தா.மோ.அன்பரசன், அஞ்சலி செலுத்தி குடும்பத்தினருக்கு ஆறுதல் கூறினார்.
ராஜீவ் கொலை வழக்கில் பேரறிவாளன், சாந்தன், முருகன் ஆகிய 3 பேரின் தூக்கு
தண்டனையை ரத்து செய்ய வலியுறுத்தி காஞ்சிபுரம் அடுத்த ஓரிக்கையை சேர்ந்த
பரசுராமன் மகள் செங்கொடி (20), தாலுகா அலுவலகம் அருகே நேற்று மாலை
தீக்குளித்து தற்கொலை செய்து கொண்டார். இவர், காஞ்சிபுரம் அருகே உள்ள
கீழ்கதிர்பூரில் இயங்கி வரும் மக்கள் மன்றத்தில் பணியாற்றியவர்.

செங்கொடி
எழுதி வைத்திருந்த கடிதத்தில், ‘இலங்கை தமிழர் பிரச்னைக்காக தோழர்
முத்துக்குமார் உயிர் தியாகம் செய்ததுபோல், என் உடல் பேரறிவாளன், சாந்தன்,
முருகன் ஆகியோரின் உயிரை காக்க பயன்படும் என்ற நம்பிக்கையுடன் செல்கிறேன்.
இப்படிக்கு செங்கொடி’ என எழுதியிருந்தார்.
இதுபற்றி தகவல் அறிந்ததும்
திமுக தலைவர் கருணாநிதி, முன்னாள் அமைச்சர் தா.மோ.அன்பரசனை காஞ்சிக்கு
அனுப்பி வைத்தார். காஞ்சிபுரம் அரசு மருத்துவ மனைக்கு நள்ளிரவு 11 மணிக்கு
வந்த தா.மோ.அன்பரசன், செங்கொடி உடலுக்கு அஞ்சலி செலுத்தினார். அவரது
உறவினர்களுக்கும் மக்கள் மன்ற நிர்வாகிகளுக்கும் ஆறுதல் கூறினார்.

விடுதலை
சிறுத்தைகள் கட்சி தலைவர் திருமாவளவன், நள்ளிரவு 11.30 மணியளவில் வந்து
செங்கொடி உடலுக்கு அஞ்சலி செலுத்தினார். பின்னர் நிருபர்களிடம் பேசிய அவர்,
‘‘அப்பாவிகளான பேரறிவாளன், சாந்தன், முருகன் ஆகியோருக்கு விதிக்கப்பட்ட
மரண தண்டனையை ரத்து செய்ய கோரி, செங்கொடி செய்த உயிர் தியாகத்தை மத்திய,
மாநில அரசுகள் உணர்ந்து போர்க்கால அடிப்படையில் அவர்களை விடுதலை செய்ய
வேண்டும். கேரளாவில் பாலன் என்பவரது மரண தண்டனையை அந்த மாநில அரசு ரத்து
செய்தது போல, தமிழக அரசும் தன்னாட்சி அதிகாரத்தை பயன்படுத்தி அவர்களை
காப்பாற்ற நடவடிக்கை எடுக்க வேண்டும். தமிழக முதல்வர் கருணை கூர்ந்து
செய்வார் என நம்புகிறோம்’’ என்றார்.

நள்ளிரவு 2 மணியளவில் மதிமுக
பொது செயலாளர் வைகோ, மருத்துவமனைக்கு சென்று செங்கொடியின் உடலை பார்த்து
கண் கலங்கினார். அவரது உறவினர்களுக்கு ஆறுதல் கூறினார். பின்னர் வைகோ
கூறுகையில், ‘‘கோடான கோடி மக்களின் உணர்வை வெளிப்படுத்தும் விதமாக
நினைத்து, நம்பிக்கையோடு உயிர் தியாகம் செய்த செங்கொடியின் உணர்வை உணர்ந்து
தமிழக முதல்வர், 3 பேரையும் காப்பாற்ற நடவடிக்கை எடுக்க வேண்டும்.
செங்கொடியின் தியாகத்தை வரலாறு மறக்காது. கேரள அரசு போல தமிழக அரசும்
செய்து இந்த விஷயத்தில் இந்தியாவுக்கே வழிகாட்டியாக இருக்க வேண்டும்’’
என்றார்.

செங்கொடியின் உடல் இன்று காலை பிரேத பரிசோதனை
செய்யப்பட்டு, மருத்துவமனையிலேயே வைக்கப்பட்டுள்ளது. அவரது உடலை பொதுமக்கள்
அஞ்சலிக்காக பொது இடத்தில் வைக்க மதிமுக, விடுதலை சிறுத்தைகள் மற்றும்
மக்கள் மன்ற நிர்வாகிகள் முடிவு செய்தனர். இதுதொடர்பாக ஆர்டிஓ வீரப்பன்,
எஸ்.பி. மனோகரனிடம் பேசினர். ஆனால், செங்கொடி உடலை பொது இடத்தில் வைக்க
போலீசார் அனுமதி மறுத்துவிட்டனர். இதனால், தனியார் மண்டபம் அல்லது தமிழ்
அமைப்பாளர் யாராவது ஒருவர் வீட்டில் வைக்கலாமா என ஆலோசித்து வருகின்றனர்.