அரசு கேபிள் நிறுவனத் தலைவராக உடுமலை ராதாகிருஷ்ணன் நியமனம்

by **அருள்** Tue Jul 05, 2011 6:48 am

Last Updated :

அரசு கேபிள் நிறுவனத் தலைவராக உடுமலை ராதாகிருஷ்ணன் நியமனம் Radhaki

சென்னை, ஜூலை 4: தமிழக அரசின் தகவல் தொழில்நுட்பத் துறையிடம் இருந்து அரசு
கேபிள் டி.வி. நிறுவனம் முழுவதுமாக பிரிக்கப்பட்டுள்ளது.
இந்த நிறுவனத்தின் தலைவராக திருப்பூர் மாவட்ட அதிமுக இளைஞரணிச் செயலாளரும்,
கேபிள் டி.வி. தொழிலில் ஈடுபட்டு வருபவருமான உடுமலை கே.ராதாகிருஷ்ணன்
நியமிக்கப்பட்டுள்ளார். இதற்கான உத்தரவை தகவல் தொழில்நுட்பத் துறை செயலாளர்
சந்தோஷ்பாபு திங்கள்கிழமை வெளியிட்டார்.
எதற்காக இந்த மாற்றம்: அரசு கேபிள் டி.வி. நிறுவனம், தமிழக அரசின் தகவல்
தொழில்நுட்பத் துறையின் கீழ் இருந்து வந்தது. திமுக ஆட்சியில் இந்த நிறுவனம்
எந்தவித செயல்பாடுகளும் இல்லாமல் முடங்கியே இருந்தது. இந்த நிறுவனத்துக்கென
வாங்கப்பட்ட கேபிள்கள் உள்பட அனைத்துப் பொருள்களும் பாழாகி வருகின்றன.
அதிமுக ஆட்சிப் பொறுப்பேற்றதும் அரசு கேபிள் டி.வி. நிறுவனத்துக்கு புத்துயிர்
அளிக்கப்பட்டு வருகிறது. இதற்கான பூர்வாங்கப் பணிகளில் முதல்வர் ஜெயலலிதா
ஈடுபட்டுள்ளார். முதல் கட்டமாக, தகவல் தொழில்நுட்பத் துறையில் இருந்து அரசு கேபிள்
டி.வி. நிறுவனம் பிரிக்கப்பட்டு, தனது கட்டுப்பாட்டில் உள்ள உள்துறைக்கு
மாற்றியுள்ளார்.
அதிகாரிகள் நியமனம்: கேபிள் டி.வி. நிறுவனத்தை தனது கட்டுப்பாட்டில் கொண்டு
வந்ததோடு மட்டுமல்லாது, அந்த நிறுவனத்தைச் செயல்பட வைப்பதற்கான தகுந்த
அதிகாரிகளையும் அவர் நியமனம் செய்து வருகிறார். அரசு கேபிள் டி.வி. நிறுவனத்தின்
நிர்வாக இயக்குநராக எம்.ஜெயராமன் ஞாயிற்றுக்கிழமை நியமிக்கப்பட்டார். தொழிலாளர்
மற்றும் வேலைவாய்ப்புத் துறையின் இணைச் செயலாளராக அவர் பொறுப்பு வகித்து வந்தார்.
முன்னதாக, அவர் திருநெல்வேலி மாவட்ட ஆட்சியராக பணிபுரிந்தார். நிர்வாக இயக்குநர்
நியமிக்கப்பட்ட அடுத்த நாளான திங்கள்கிழமை அரசு கேபிள் டி.வி. நிறுவனத்தின் தலைவராக
உடுமலை கே.ராதாகிருஷ்ணன் நியமனம் செய்யப்பட்டுள்ளார்.
ராதாகிருஷ்ணன்: திருப்பூர் மாவட்ட அதிமுக இளைஞரணி செயலாளராக இருப்பவர் உடுமலை
ராதாகிருஷ்ணன். அவர் 23 ஆண்டுகளாக அதிமுகவில் பல்வேறு பொறுப்புகளில் இருந்து
வருகிறார். மேலும், 20 ஆண்டுகளுக்கும் மேலாக கேபிள் டி.வி. தொழிலில் ஈடுபட்டு
வருகிறார்.
இதுகுறித்து கருத்துத் தெரிவித்த அதிமுக வட்டாரங்கள், அரசு கேபிள் டி.வி.
நிறுவனத்தை செயல்பட வைப்பதற்கு கள அனுபவம் அவசியம். எனவே, கேபிள் டி.வி. தொழில்
பற்றி நன்கு தெரிந்த ஒரு நபர் அந்த நிறுவனத்தின் தலைவராக இருப்பது அவசியம். இந்தச்
சூழலை கருத்தில் கொண்டு அரசு கேபிள் டி.வி. நிறுவனத்தின் தலைவராக உடுமலை
ராதாகிருஷ்ணன் நியமனம் செய்யப்பட்டுள்ளார் எனக் கூறின.