காஸ், கெரசின், டீசல் விலை உயர்வை திரும்ப பெற மத்திய அரசு மறுப்பு

புதுடில்லி: சமையல் காஸ், கெரசின் மற்றும் டீசல் விலை உயர்வை திரும்பப்
பெற மறுத்து மத்திய அரசு பிடிவாதம் செய்கிறது. இதனால், விலை உயர்வுக்கு
நாடு முழுவதும் கடும் எதிர்ப்பு உருவாகியுள்ளது. "இந்த, மக்கள் விரோத
போக்கை கண்டித்து, நாடு முழுவதும், போராட்டம் நடத்தப்படும்' என, இடதுசாரி
கட்சிகள் உட்பட பல கட்சிகள் அறிவித்துள்ளன.
சமையல் காஸ், டீசல், கெரசின் ஆகியவற்றின் விலையை, மத்திய அரசு நேற்று
முன்தினம் இரவு அதிரடியாக உயர்த்தியது. சமையல் காஸ் விலை, சிலிண்டருக்கு
50 ரூபாயும், டீசல் விலை, லிட்டருக்கு மூன்று ரூபாயும், கெரசின் விலை,
லிட்டருக்கு இரண்டு ரூபாயும் உயர்த்தப்பட்டது. "இந்த விலை உயர்வை,
உடனடியாக திரும்பப் பெற வேண்டும்' என, எதிர்க்கட்சிகள் போர்க்கொடி
தூக்கியுள்ளன. பா.ஜ., கண்டனம்: பா.ஜ., மூத்த தலைவர் சுஷ்மா சுவராஜ்
கூறுகையில், ""காங்கிரஸ் கட்சி ஆட்சி அமைத்தபோது, சாதாரண மக்களுக்காக
பாடுபடுவோம் என்று கூறியது. தற்போதைய விலை உயர்வு மூலம், சாதாரண மக்களை,
அந்தக் கட்சியினர் பாடாய் படுத்துகின்றனர். இந்த விலை உயர்வால், ஏழைகள்,
விவசாயிகள் பெரிதும் பாதிக்கப்படுவர்,'' என்றார். பா.ஜ., செய்தி
தொடர்பாளர் ஷாநவாஸ் உசேன் கூறுகையில்,""காங்கிரஸ் தலைமையிலான மத்திய
அரசின், இந்த விலை உயர்வு அறிவிப்பு, நெருக்கடி காலங்களில் எடுக்கப்பட்ட
நடவடிக்கைகளை நினைவூட்டும் வகையில் உள்ளது. இந்த விலை உயர்வை, பொருளாதார
நெருக்கடி தடையாகவே கருத வேண்டியுள்ளது,'' என்றார்.
இந்நிலையில், உ.பி., உள்ளிட்ட பல்வேறு மாநிலங்களில், விலை உயர்வுக்கு
எதிர்ப்பு தெரிவித்து, பா.ஜ., சார்பில் நேற்று போராட்டம் நடத்தப்பட்டது.
டில்லியில் நடந்த போராட்டத்தில் ஏராளமான பா.ஜ.,வினர் பங்கேற்றனர். மேலும்
பல இடங்களில் இந்த போராட்டம் தொடரும் என்றும் அறிவிக்கப்பட்டுள்ளது.
கூட்டறிக்கை: மார்க்சிஸ்ட் கம்யூனிஸ்ட் பொதுச் செயலர் பிரகாஷ்
கராத், இந்திய கம்யூனிஸ்ட் கட்சியின் பரதன், ஆர்.எஸ்.பி.,யின் சந்திர
சூடன், பார்வர்டு பிளாக் கட்சியின் தேவபிரதா பிஸ்வாஸ் ஆகியோர்
கையெழுத்திட்ட, இடதுசாரி கட்சிகளின் கூட்டறிக்கை நேற்று வெளியிடப்பட்டது.
அதில் கூறப்பட்டுள்ளதாவது: மத்திய அரசு அறிவித்துள்ள இந்த விலை
உயர்வு, அத்தியாவசியப் பொருட்களின் விலை உயர்வால் திண்டாடிவரும் சாதாரண
மக்களுக்கு, மேலும் அதிக அளவில் பாதிப்பை ஏற்படுத்தும். பணவீக்க அளவு
அதிகரித்துள்ள நிலையில், அத்தியாவசியப் பொருட்களின் விலை உயர்வால்,
பொதுமக்கள் ஏற்கனவே திண்டாடி வருகின்றனர். பெட்ரோலிய பொருட்கள் மீதான
வரிக்கட்டமைப்பை மாற்றி அமைக்க, மத்திய அரசு எந்த நடவடிக்கையும்
எடுக்கவில்லை. தற்போது அறிவித்துள்ள விலை உயர்வை, மத்திய அரசு உடனடியாக
திரும்பப் பெற வேண்டும். விலை உயர்வை திரும்பப் பெற வலியுறுத்தி, நாடு
முழு வதும் உள்ள, எங்களின் கட்சித் தொண்டர்கள், போராட்டம் நடத்துவர்.
இதற்கு கட்சித் தொண்டர்கள் தயாராக வேண்டும். இவ்வாறு அந்த கூட்டறிக்கையில்
தெரிவிக்கப்பட்டுள்ளது.
மார்க்சிஸ்ட் கட்சி மூத்த தலைவர் சீதாராம் யெச்சூரி கூறுகையில், ""இந்த
விலை உயர்வை, ஏற்றுக் கொள்ள முடியாது. அதிகரித்து வரும் விலை உயர்வு,
கட்டுப்படுத்தப்படும் என, ஏற்கனவே மத்திய அரசு உறுதி அளித்திருந்தது.
தற்போது விலை உயர்வை கட்டுப்படுத்துவதற்கு பதிலாக, மக்களின் மீது, சுமையை
அரசு அதிகரித்துள்ளது,'' என்றார். இந்திய கம்யூனிஸ்ட் கட்சியின் பரதன்
கூறுகையில், ""விலை உயர்வை மத்திய அரசு கட்டுப்படுத்த வேண்டும்.
இல்லையெனில், மக்களே கட்டுப்படுத்துவர். மத்திய அரசை தூக்கி எறியவும்,
மக்கள் தயங்க மாட்டார்கள்,'' என்றார். விலை உயர்வை திரும்பப் பெற
வலியுறுத்தி, ஜம்முவில் சிவசேனா கட்சி சார்பில் போராட்டம் நடத்தப்பட்டது.
கேரளாவில் பஸ் ஸ்டிரைக்: டீசல் விலை உயர்வை கண்டித்து,
கேரளாவில், வரும் 29ம் தேதி, தனியார் பஸ்கள் வேலை நிறுத்தப் போராட்டம்
அறிவித்துள்ளன. விரைவில் காலவரையற்ற போராட்டம் நடத்தவும் தனியார் பஸ்
அதிபர்கள் ஒருங்கிணைப்புக்குழு முடிவு செய்துள்ளது. மம்தா கரிசனம்: மத்திய
அரசால் அறிவிக்கப்பட்டுள்ள சமையல் காஸ் விலை உயர்வால், மக்கள்
பாதிக்கப்படாமல் இருப்பதற்காக, மேற்கு வங்க அரசு அதிரடி நடவடிக்கை
எடுத்துள்ளது. முதல்வர் மம்தா பானர்ஜி கூறுகையில், ""விலை உயர்வு
அறிவிக்கப்பட்டவுடன், மாநில நிதி அமைச்சர் அமித் மித்ராவுடன் ஆலோசித்தேன்.
இதனால், மக்களுக்கு ஏற்படும் பாதிப்பை குறைக்கும் வகையில், காஸ்
சிலிண்டர்களுக்கு, மாநில அரசால் வசூலிக்கப்படும் தீர்வையை திரும்பப்
பெறுவது என, முடிவு செய்யப்பட்டுள்ளது. இதன்மூலம், ஒவ்வொரு காஸ்
சிலிண்டருக்கும், தற்போது நிர்ணயிக்கப்பட்டுள்ள விலையில், 16 ரூபாய்
குறையும். இதனால், அரசுக்கு 75 கோடி ரூபாய் இழப்பு ஏற்படும்,'' என்றார்.