சோனியா வெளிநாட்டு பயணம் தகவல்களை வெளியிட உத்தரவு

புதுடில்லி : "தேசிய ஆலோசனை கவுன்சில் தலைவர் சோனியா, வெளிநாட்டுக்கு
மேற்கொண்ட சுற்றுப் பயணங்கள் மற்றும் அதற்கான செலவுகள் குறித்த தகவல்களை
வெளியிட வேண்டும்' என, பிரதமர் அலுவலகத்துக்கு, மத்திய தகவல் ஆணையம்
உத்தரவிட்டுள்ளது.
ரமேஷ் வர்மா என்பவர், தகவல் பெறும் உரிமைச் சட்டத்தின் கீழ், ஒரு
மனு தாக்கல் செய்திருந்தார். "தேசிய ஆலோசனை கவுன்சில் குழு தலைவர் சோனியா,
வெளிநாடுகளுக்கு மேற்கொண்ட சுற்றுப் பயணங்கள் குறித்தும், இதற்கான
செலவுகளை யார் ஏற்றுக் கொண்டது என்பது குறித்தும் விவரங்கள் தேவை' என,
அந்த மனுவில் அவர் குறிப்பிட்டிருந்தார்.
இந்த மனு, பிரதமர் அலுவலக விவகாரங்களுக்கான அமைச்சகத்துக்கு கடந்த
பிப்ரவரி 2010ல் கிடைத்தது. இதன்பின், அதே ஆண்டு மார்ச்சில் இந்த மனு,
வெளியுறவு அமைச்சகத்துக்கு அனுப்பி வைக்கப்பட்டது. அதன்பின், 10 நாட்கள்
கழித்து, பார்லிமென்ட் விவகாரங்களுக்கான அமைச்சகத்துக்கு அனுப்பி
வைக்கப்பட்டது.
இதுகுறித்து மத்திய தலைமை தகவல் ஆணையர் சத்யானந்த் மிஸ்ரா
கூறியதாவது: தகவல் பெறும் உரிமைச் சட்டத்தின் கீழ் பெறப்படும் மனுக்களை,
பிரதமர் அலுவலகம் மிகவும் சாதாரணமாக கையாளக்கூடாது. எந்த மனுவை, எந்த
அமைச்சகத்துக்கு அனுப்ப வேண்டும் என்பதை கவனமுடன் ஆய்வு செய்து,
சம்பந்தப்பட்ட அமைச்சகத்துக்கு அனுப்பி வைக்க வேண்டும். இவ்வாறு இல்லாமல்,
ஒவ்வொரு அமைச்சகத்துக்கும், மனுக்கள் மாற்றி மாற்றி அனுப்பப்பட்டால், அது
தொடர்பான தகவல்களை பெறுவதில் தாமதம் ஏற்படும்.
கடந்த 10 ஆண்டுகளாக, சோனியா மேற்கொண்ட வெளிநாட்டு சுற்றுப்
பயணத்துக்கான எந்த செலவையும், மத்திய அரசு ஏற்கவில்லை என, பார்லிமென்ட்
விவகாரத் துறை தெரிவித்துள்ளதாகக் கூறப்படுகிறது. இருந்தாலும், இது
தொடர்பான விவரங்கள், சம்பந்தப்பட்ட மனுதாரருக்கு கொடுக்கப்பட்டதாக, மத்திய
அமைச்சரவை செயலரிடம் இருந்து எந்த தகவலும் இல்லை. எனவே, இது தொடர்பான
விவரங்களை வெளிப்படையாக தெரிவிக்க வேண்டும். இவ்வாறு மிஸ்ரா கூறினார்.