பெற்ற மகளையே விபசாரத்தில் தள்ளிய கொடூர பெற்றோர், போலீசார் கைது செய்தனர்

by **மாலதி** Sat Mar 12, 2011 7:46 am

கொச்சி, மார்ச்.11- பெற்ற மகளையே விபசாரத்தில் தள்ளியதோடு பல்வேறு
மாநிலங்களுக்கும் அழைத்து சென்று செக்ஸ் கொடுமையில் ஈடுபடுத்திய கொடூர
பெற்றோரை கேரள போலீசார் கைது செய்தனர்.

15 வயது மகள்

கேரள
மாநிலம் கொச்சி மாவட்டத்தில் உள்ள பரவூர் என்ற இடத்தின் அருகே வாணியக்கரா
என்ற கிராமம் இருக்கிறது. அந்த கிராமத்தை சேர்ந்த சுதீர் (வயது45), சைனாபா
(38) என்ற தம்பதிக்கு 15 வயதில் மகள் உள்ளார். டி.வி. மற்றும்
சினிமாவுக்கு துணை நடிகர், நடிகைகளை அனுப்பும் ஏஜெண்டு வேலையை சுதீர்
செய்து வருகிறார்.

இந்த நிலையில், தனது 15 வயது மகளை கடந்த ஒரு
ஆண்டாக விபசாரத்தில் ஈடுபடுத்தி வந்தது தெரிய வந்துள்ளது. கேரளாவின்
பல்வேறு இடங்களுக்கும் அந்த பெண்ணை அழைத்துச் சென்று விபசாரத்தில் தள்ளி
இருக்கிறார். இது குறித்து தாய் சைனாபாவிடம் அந்த பெண் முறையிட்ட போது
அவரும் கண்டு கொள்ளவில்லை. கணவருடன் சேர்ந்து மகளை கொடுமை படுத்தியுள்ளார்.

சினிமா, டி.வி. இயக்குனர்கள்

கேரளா
தவிர, கர்நாடக மாநிலத்தில் மைசூர், பெங்களூர் ஆகிய இடங்களுக்கும்
தமிழ்நாட்டில் கோவைக்கும் அழைத்துச் சென்று விபசாரத்தில் ஈடுபடுத்தி
இருக்கின்றனர். மேலும், சினிமா மற்றும் டி.வி. தொடர் இயக்குனர்களுக்கு
மகளை விருந்தாக்கி உள்ளனர். இத்தகைய சூழ்நிலையில், கோவையில் ஒரு வீட்டில்
அந்த பெண்ணை அடைத்து வைத்திருந்த போது தப்பிச் சென்று விட்டார்.

பின்னர்,
உறவினர் வீட்டில் அடைக்கலம் புகுந்து தன்னுடைய கண்ணீர் கதையை
தெரிவித்தார். அதனால், மனம் உருகிய உறவினர்கள் ஒன்று சேர்ந்து பரவூர்
போலீஸ் நிலையத்தில் புகார் செய்தனர். இதையடுத்து, அந்த இளம் பெண்ணை
போலீசார் மீட்டு விசாரணை நடத்தினர். அப்போது, சுதீர் மற்றும் சைனாபா
ஆகியோரின் கொடூர செயல்கள் தெரிய வந்தன.

போலீஸ் காவல்

இதைத்தொடர்ந்து,
பெற்ற மகளையே விபசாரத்தில் தள்ளிய சுதீர், சைனாபா இருவரையும் போலீசார்
கைது செய்தனர். பின்னர், அவர்களை கோர்ட்டில் ஆஜர் படுத்தினர். அப்போது,
இரண்டு பேரையும் போலீஸ் காவலில் வைத்து விசாரிக்க கோர்ட்டு அனுமதித்தது.

இந்த
விவகாரத்தில், சுதீருக்கு உடந்தையாக இருந்த மேலும் 3 பேரும் போலீசாரால்
கைது செய்யப்பட்டனர். தொடர்ந்து விசாரணை நடைபெற்று வருவதால், மேலும் பலர்
சிக்கக் கூடும் என தெரிகிறது.

தினதந்தி