பாதுகாக்கப்பட்ட வனத்தில் அத்துமீறிய சினிமா குழுவினர் : பாழான சத்தி வனப்பகுதி

by **ஜனனி** Fri Jan 21, 2011 10:09 am

சத்தியமங்கலம் : சத்தியமங்கலத்தில், பாதுகாக்கப்பட்ட அடர்ந்த
வனப்பகுதியில், 10 நாட்களுக்கும் மேலாக நடந்த சினிமா படப்பிடிப்பின் போது,
மரக்கிளைகள் வெட்டப்பட்டும், தடை செய்யப்பட்ட வனத்தில் தீயிட்டும்,
விலங்குகளை விரட்ட பட்டாசு வெடித்தும், சினிமா குழுவினர், அத்து மீறி
செயல்பட்டுள்ளனர்.
சினிமா டைரக்டர் எஸ்.ஏ.சந்திரசேகரன் இயக்கத்தில், "சட்டப்படி குற்றம்'
படத்தின் படப்பிடிப்பு, மாநிலத்தின் பல்வேறு இடங்களில் நடந்து வருகிறது.
இப்படத்தில் சத்யராஜ், சீமான், விக்ராந்த், ராதாரவி, நடிகை பானு
உள்ளிட்டோர் நடிக்கின்றனர். ஈரோடு மாவட்டம், சத்தியமங்கலம் வனப்பகுதியில்
படப்பிடிப்பு நடத்த, சினிமா குழுவினர் வனத்துறையினரிடம் அனுமதி கோரினர்.
வனத்தை ஒட்டிய சாலையில் மட்டும் ஐந்து நாள் படம் எடுக்க அனுமதி
தரப்பட்டது. இதை மீறி, சத்தி வனக்கோட்டம், ஆசனூர் வனத்துக்குட்பட்ட
மாவள்ளம், மாவள்ளம் பிரிவு, தொட்டள்ளா ஓடை, தேவர் நத்தம், ஒடமந்தை மற்றும்
தாளவாடி பகுதியில் சண்டை, திருமணம், பாடல் காட்சிகள், டிச., 20ம் தேதி
முதல் படமாக்கப்பட்டன. ஐந்து நாள் கெடு முடிந்த பிறகும், தொடர்ந்து
படப்பிடிப்பு நடந்தது. படப்பிடிப்பின் போது, சினிமா குழுவினர், வனத்துறை
எச்சரிக்கையையும் மீறி செயல்பட்டனர். பாதுகாக்கப்பட்ட வனத்துக்குள்
சண்டைக் காட்சி படமாக்கப்பட்டது. விலங்குகளை விரட்ட, தீப்பந்தங்கள்
உருவாக்கவும், திருமண மேடைக்கு பந்தல் அமைக்கவும், மரக்கிளைகள்
வெட்டப்பட்டன. பனியில் இருந்தும், விலங்குகளிடம் இருந்தும் காக்க,
கட்டைகளை எரித்துள்ளனர்.
அதிகாலை 6 மணிக்கே, இங்கு குவிந்த படக்குழுவினர், இரவு 12 மணி வரை
படப்பிடிப்பு நடத்தியுள்ளனர். அப்பகுதி வன விலங்குகளின் ஒரே நீராதாரமான,
பெரியபள்ளத்துக்கு வன விலங்குகள் வர முடியவில்லை. விலங்குகள் வராமல்
இருக்க, அதிகாலை முதலே பட்டாசு வெடித்து விரட்டப்பட்டதாக அப்பகுதியினர்
கூறுகின்றனர். படக்குழுவினர் பயன்படுத்திய குடிநீர் பாட்டில், மது
பாட்டில், பிளாஸ்டிக் டம்ளர், தட்டு, அட்டை, சிகரெட் பாக்கெட் என,
வனத்துக்குள் ஆங்காங்கே குப்பை குவியல் கிடக்கிறது. மலைவாழ் மக்கள் விறகு
பொறுக்குவதற்கே அனுமதிக்காத வனத்துறையினர், இவர்களின் அத்துமீறலுக்கு துணை
போயுள்ளனர். அன்றாடப் பயன்பாட்டுக்கு மலைவாழ் மக்கள், சுள்ளி
பொறுக்கியதாக, மரம் வெட்டியதாக வழக்கு பதிவு செய்யும் வனத்துறையினர்,
சினிமா படப்பிடிப்புக் குழுவை கண்டு கொள்ளாதது ஏன்? என்ற கேள்விக்கு பதில்
இல்லை.
கம்யூனிஸ்ட் கட்சி, சத்தி ஒன்றிய செயலர் ஸ்டாலின் சிவகுமார்
கூறியதாவது: சத்தி வனப்பகுதியில் நடந்த சினிமா படப்பிடிப்பின் போது எழுந்த
செயற்கை புகையால், சுற்றுச்சூழல் பாதிக்கப்பட்டுள்ளது. சாதாரண மனிதர்களை
விறகு பொறுக்க கூட அனுமதிக்காத வனத்துறை, எந்த அடிப்படையில் வனத்துக்குள்
படப்பிடிப்பு நடத்த அனுமதித்தனர்? காட்டுக்குள் இருக்கும் வன விலங்குகள்
நீர் அருந்தும் ஓடையை ஆக்கிரமித்து, விலங்குகளுக்கு தொந்தரவு கொடுத்த
படக்குழுவினர் மீது, சட்டப்படி நடவடிக்கை எடுக்க வேண்டும்.
எஸ்.பி.,யிடம் இந்து மக்கள் கட்சி மனு: சத்தியமங்கலம்
வனப்பகுதியில் படப்பிடிப்பு நடத்தி வரும் இயக்குனர், நடிகர் மீது உரிய
நடவடிக்கை எடுக்குமாறு இந்து மக்கள் கட்சியினர், ஈரோடு எஸ்.பி.,க்கு மனு
செய்துள்ளனர். இந்து மக்கள் கட்சியின் மாநில பொதுச்செயலர் அண்ணாதுரை,
ஈரோடு எஸ்.பி.,யிடம் அளித்த புகார் மனுவில் கூறியிருப்பதாவது: தமிழக
அரசால் தடை செய்யப்பட்ட வனப்பகுதியில், யாருடைய அனுமதியுமின்றி, இப்படத்தை
எடுத்துள்ளனர். தீவிரவாதிகள் மற்றும் வனச் சொத்தை பாதுகாக்கவே, இந்த
வனப்பகுதியை தமிழக அரசு, "ரிசர்வ் பாரஸ்ட்' என அறிவித்துள்ளது.ஆசனூர்,
மாவநத்தம், பவானிசாகர், புளிஞ்சூர், திம்பம், தலைமலை ஆகிய பகுதியில்,
இப்படத்தின் படப்பிடிப்பு நடந்துள்ளது. பெயருக்கு அனுமதி வாங்கி,
அனுமதியில்லாமல் தடையை மீறி இப்படத்தை எடுத்து வருவது சட்டப்படி குற்றம்.
அடர்ந்த காட்டுப் பகுதியில் இவர்கள் படப்பிடிப்பு நடத்தியதால், அங்குள்ள
வன விலங்குகள் பாதிப்புக்கு உள்ளாகின. இப்படக் குழுவினர் வனப்பகுதியில்
உள்ள உயிரினங்களை துன்புறுத்தியுள்ளனர். ஆகவே, திரைப்படத்தின்
தயாரிப்பாளர் மற்றும் இயக்குனரான சந்திரசேகரன் மற்றும் நடிகர் சத்யராஜ்
உள்ளிட்ட 60 பேர் மீது, சட்டப்படி நடவடிக்கை எடுக்க வேண்டும். இவ்வாறு
மனுவில் கூறப்பட்டுள்ளது.