முதல்வருக்கு பாடம் புகட்ட மக்கள் தயார் : ஜெ., கடும் தாக்கு

by **மாலதி** Mon Jan 17, 2011 6:55 pm

சென்னை : "பாம்புக்கு தலையையும், மீனுக்கு வாலையும் காட்டும் முதல்வர்
கருணாநிதிக்கு தக்க பாடம் புகட்ட தமிழக மக்கள் தயாராகிவிட்டனர்' என,
அ.தி.மு.க., பொதுச்செயலர் ஜெயலலிதா கூறியுள்ளார்.
அவரது அறிக்கை:இலங்கை கடற்படையினரால் தமிழக மீனவர்கள் தாக்கப்படுவதும்,
கொல்லப்படுவதும், துன்புறுத்தப்படுவதும் அன்றாட செய்திகளாகி விட்டன.கடந்த
12ம் தேதி, புதுக்கோட்டை மாவட்டம், ஜெகதாபட்டினத்தில் இருந்து ஆனந்தராஜ்
என்பவருக்கு சொந்தமான விசைப்படகில் நான்கு மீனவர்கள் மீன்பிடித்துக்
கொண்டிருக்கும் போது, இலங்கை கடற்படையினர் மீனவர்களை நோக்கி
துப்பாக்கியால் சுட்டுள்ளனர்.துப்பாக்கிச் சூட்டில் படுகாயம் அடைந்த தமிழக
மீனவர் பாண்டியன். மருத்துவமனைக்கு கொண்டு செல்லும் வழியில்
உயிரிழந்துள்ளார். இலங்கை கடற்படையின் இந்த கொலைவெறி தாக்குதலுக்கு எனது
கடும் கண்டனம்.
இந்தியா - பாகிஸ்தான் எல்லையில் கூட இல்லாத அளவுக்கு ஒரு பதட்டமான
சூழ்நிலை இலங்கை கடற்பகுதியில் நிலவுகிறது. இந்த பதட்டமான சூழ்நிலையை
தணிக்க வேண்டிய மத்திய அரசு, தொடர்ந்து மவுனம் சாதித்து வருகிறது. மத்திய
அரசை வலியுறுத்த வேண்டிய கருணாநிதி, இதுபோன்று சம்பவங்கள் நடக்கும்
போதெல்லாம் கடிதம் எழுதுவது, உண்ணாவிரதம் இருப்பது என கபட நாடகங்களை
நடத்தி தனது பணியை முடித்துக் கொள்வார்.அதே சமயத்தில், வளம் கொழிக்கும்
துறைகளை பெறுவது, ஸ்பெக்ட்ரம் ஊழல், கூட்டணிக்கு ஆபத்து என்றால்
நேரடியாகவோ, தூதுவர் மூலமாகவோ டில்லிக்கு சென்று பிரதமரையும், காங்கிரஸ்
கட்சித் தலைவரையும் சந்தித்து தன் பிரச்னைக்கு தீர்வு காண்பார்.
இதே போன்று, பாண்டியன் உயிரிழப்பு சம்பவம் குறித்து பிரதமர்
உரையாடினாரா என இலங்கை அதிபரிடம் கேட்டதற்கு, 'இல்லை' என்று இலங்கை அதிபர்
தெரிவித்ததாக செய்தி வந்துள்ளது. இதிலிருந்து கருணாநிதி தந்தி அனுப்பிய
லட்சணத்தையும், தமிழர்கள் மீது மத்திய அரசுக்குள்ள அக்கறையின்மையையும்
எளிதில் புரிந்து கொள்ளலாம். இச்சம்பவத்தின் பதட்டம் தணிவதற்குள்,
ராமேஸ்வரம் மீனவர்கள் மீது இலங்கை கடற்படையினர் மீண்டும் தாக்குதல் நடத்தி
அவர்கள் வசம் இருந்த இறால் மீன்கள், ஜி.பி.எஸ்., கருவி, மொபைல் போன்
ஆகியவற்றை பறித்துக் கொண்டு, அவர்களின் வலைகளை கடலில் வீசிவிட்டு
சென்றுள்ளனர்.
இவற்றை எல்லாம் பார்க்கும் போது இந்திய மீனவர்கள் மீதான அத்துமீறிய
தாக்குதல்களை தடுக்கக் கூடிய வல்லமை மத்திய அரசுக்கு இல்லையோ என்று தான்
எண்ணத் தோன்றுகிறது. பாம்புக்கு தலையையும், மீனுக்கு வாலையும் காட்டும்
கருணாநிதிக்கு தக்கப் பாடம் புகட்ட தமிழக மக்கள் தயாராகிவிட்டனர். தமிழக
மீனவர்கள், மீது இலங்கைத் கடற்படையினர் தாக்குதல் நடத்தாத அளவுக்கு மத்திய
அரசின் நடவடிக்கை அமைய வேண்டும்.இவ்வாறு ஜெயலலிதா கூறியுள்ளார்.