தேர்தலில் அதிமுகவுக்கு ஆதரவாக பிரசாரம்: வைகோவை சந்தித்த சீமான் அறிவிப்பு

வருகின்ற சட்டப்பேரவைத் தேர்தலில் அதிமுகவை நாம் தமிழர் கட்சி ஆதரிக்கும் என்று அக்கட்சியின் தலைவர் சீமான் தெரிவித்தார்.
நாம் தமிழர் கட்சியின் தலைவர் சீமான் இன்று மதிமுக பொதுச் செயலாளர் வைகோவை சந்தித்துப் பேசினார்.
மதிமுக தலைமை அலுவலகமான தாயகத்தில்
நிகழ்ந்த ஒன்றரை மணி நேரச் சந்திப்புக்குப் பின் நிருபர்களிடம் கூட்டாக
பேட்டியளிக்கையில் சீமான் கூறும்போது, "நான் சிறையில் இருந்த போது
விடுதலையாக வேண்டும் என்று மனப்பூர்வமாக வைகோ அறிக்கை வெளியிட்டார். அதைப்
போல நான் விடுதலை செய்யப்பட்டேன். அவரது அன்புக்கும் ஆதரவுக்கும் நன்றி
செலுத்த கடமைப்பட்டவன்.
வருகிற தேர்தலில் காங்கிரசையும், அதன் கூட்டணி கட்சியையும் அப்புறப்படுத்த வேண்டும் என்ற லட்சிய வெறியோடு பணியாற்றுவோம்.
வைகோ தேசிய அரசியலில் பல வருடங்கள் இருந்து
விட்டார். மாநில அரசியலுக்கு அவர் வர வேண்டும். எம்.எல்.ஏ.வாக
சட்டப்பேரவைக்குள் செல்ல வேண்டும். அங்கு தமிழர்கள் ஆதரவு குரல் ஒலிக்க
வேண்டும் என்று நான் அவரை வலியுறுத்தினேன். அவர், 'யோசிக்கிறேன்' என்று
கூறியிருக்கிறார். யோசிப்பதற்கு எதுவும் இல்லை. இந்த முறை எப்படியாவது
அவர் எம்.எல்.ஏ. தொகுதியில் போட்டியிட வேண்டும்," என்றார்.
கடந்த நாடாளுமன்றத் தேர்தலைப் போல்
அதிமுகவுக்கு ஆதரவாக குரல் கொடுப்பீர்களா என்று கேட்டதற்கு, "இரட்டை
இலைக்கு வாக்களியுங்கள் என்று கடந்த தேர்தலில் சொன்னேன். ஈழத்
தமிழர்களுக்கு எதிரான காங்கிரஸுக்கு எதிராக களத்தில் நிற்கும் பெரிய கட்சி
அ.தி.மு.க.
காங்கிரஸை வீழ்த்த இரட்டை இலைக்கு ஆதரவு
அளியுங்கள் என்றேன். இப்போதும் அப்படித்தான் சொல்வேன். இதை கூட சொல்வதற்கு
தைரியும் இல்லை என்றால், நான் எப்படி போராளியாக முடியும். யாருக்கு
வேண்டுமானாலும் ஓட்டு போடுங்கள் என்று குடுகுடுப்பக்காரன் போல் நான்
ஜோசியம் சொல்ல மாட்டேன். யார் வர வேண்டும் என்பதல்ல. யார் வரக்கூடாது
என்பதுதான் எங்கள் குறி," என்றார்.
முதல்வர் கருணாநிதியை எதிர்த்து
போட்டியிடுவதாக கூறியுள்ளது குறித்து கேட்டதற்கு, "காமராஜரை ஸ்ரீனிவாசன்
தோற்கடிக்க வில்லையா? அதே போல் சீமானால் தோற்கடிக்க முடியாதா? அது
வரலாற்றில் தவறு. தேர்தலுக்கு இன்னும் நேரம் இருக்கிறது. அப்போது
பார்ப்போம்," என்றார்.
வைகோ நம்பிக்கை...
வைகோ கூறுகையில், "தமிழீழ மக்களின்
உரிமைகளுக்காகவும், தமிழ் ஈழ விடுதலைக்காகவும் அர்ப்பணிப்பு உணர்வுடன்
போராடும் போராளி சீமான் மீது இரண்டு முறை தேசிய பாதுகாப்பு தடுப்பு சட்டம்
தவறாக பயன்படுத்தப்பட்டது. சிறைச் சாலைகளில் அடக்குமுறை. லட்சிய தாகம்
கொண்டவர்களை ஒடுக்க முடியாது. சீமான் கைது செய்யப்பட்டதும் முதல் கண்டன
அறிக்கை ம.தி.மு.க. கொடுத்தது.

சீமான் பேசிய அதே பேச்சை நான் தமிழ்நாடு முழுவதும் கூட்டங்களில் பேசினேன்.
அவர் பேச்சில் எந்த தவறும் இல்லை. வேலூர் சிறையில் நானும், நெடுமாறனும்
சீமானை சந்தித்தோம். அப்போது எந்த தவறும் செய்யாமல் ஸ்ரீபெரும்புதூரில்
நடந்த ஒரு கொலைக்காக 20 ஆண்டுகளாக சிறையில் வாடும் தம்பிகளையும்
பார்த்தேன். சீமானை கைது செய்தது சட்டவிரோதம் என்று நீதிமன்றம்
விடுவித்துள்ளது.

விடுதலைப் புலிகளை ஆதரித்து பேசுவது எங்கள் உரிமை. அதை யாரும் தடுக்க
முடியாது. கடந்த நாடாளுமன்றத் தேர்தலில் ஆட்சி அதிகாரத்தை பிடித்ததற்கு
1200 கோடி ரூபாய் செலவு செய்தும் கூட 13 லட்சம் வாக்குகள்
வித்தியாசத்தில்தான் தி.மு.க. - காங்கிரஸ் கூட்டணி வெற்றி பெற்றது.
வருகிற சட்டப்பேரவைத் தேர்தல் தமிழர்களின்
தன்மானத்துக்கு விடும் அறை கூவல். தமிழ்நாட்டின் சட்டம் ஒழுங்கு, 2ஜி
ஸ்பெக்ட்ரம் ஊழல் பற்றி தெருத் தெருவாக பிரசாரம் செய்வோம்.

தேர்தல் களத்தை சந்திக்க வலுவான வஜ்ஜிராயுதமாக சீமான் இருப்பார்.
கலையுலகில் இருக்கும் தமிழ் இன உணவாளர்களும் இணைந்து வெற்றியை
ஈட்டுவார்கள்," என்றார் வைகோ.