அரசு போக்குவரத்து கழகங்கள் முடக்கம்: முதல்வருக்கு ஜெ., கண்டனம்

by **மாலதி** Wed Jan 05, 2011 5:52 pm

சென்னை: அரசு போக்குவரத்து கழகங்கள் டீசலுக்கு பணம் இல்லாமல்
திணறுகின்றன. நிதி நெருக்கடியை ஏற்படுத்தி போக்குவரத்து கழகங்களை முடங்கச்
செய்துவிட்டதாக முதல்வர் கருணாநிதிக்கு அ.தி.மு.க., பொதுச்செயலாளர்‌
ஜெயலலிதா கண்டணம் தெரிவித்துள்ளார்.
இது தொடர்பாக ஜெயலலிதா வெளியிட்டுள்ள அறிக்கை: தமிழ்நாட்டில்
செயல்பட்டு வரும் 8 போக்குவரத்துக் கழகங்கள் மூலம் 20 ஆயிரத்திற்கும்
மேற்பட்ட பேருந்துகள் இயங்கி வருகின்றன. இந்தப் பேருந்துகளுக்கான டீசல்
மற்றும் ஆயில், போக்குவரத்துக் கழக பணிமனைகளில் உள்ள பங்க்களில் இருந்து
நிரப்பப்படுகிறது. இவற்றை இந்தியன் ஆயில் கார்ப்பரேஷன் நிறுவனம்
விநியோகிக்கிறது. டீசலுக்கான பணத்தை மூன்று மாதத்திற்கு ஒரு முறை வங்கி
காசோலை மூலம் அரசுப் போக்குவரத்துக் கழகங்கள் இந்தியன் ஆயில் கார்ப்பரேஷன்
நிறுவனத்திற்கு செலுத்தும். இதுதான் இதுவரை கடைபிடிக்கப்பட்டு வந்த
நடைமுறை. இந்தச் சூழ்நிலையில், கடந்த சில மாதங்களாக அரசுப் போக்குவரத்துக்
கழகங்களில் இருந்து இந்தியன் ஆயில் கார்ப்பரேஷன் நிறுவனத்திற்கு முறையாக
பணம் சென்று சேராததன் காரணமாக, இந்தியன் ஆயில் கார்ப்பரேஷன் நிறுவனம்
நடைமுறையை சற்று மாற்றி அமைத்தது. அதாவது, பணம் கொடுத்தால் மட்டுமே டீசல்
வழங்கப்படும் என்று தெளிவாக அரசுப் போக்குவரத்துக் கழகங்களுக்கு தெரிவித்து
விட்டது.
இதன் காரணமாக, ஏற்கனவே நஷ்டத்தில் இயங்கி வரும் அரசுப் போக்குவரத்துக்
கழகங்கள், டீசலுக்கான பணத்தைக் கொடுக்க முடியாமல் திணறுகின்றன. இதன் விளைவு
தான் தற்போதைய டீசல் தட்டுப்பாடு. உதாரணமாக, கும்பகோணம் அரசுப்
போக்குவரத்துக் கழகம் இந்தியன் ஆயில் கார்ப்பரேஷன் நிறுவனத்திற்கு 23 கோடி
ரூபாய் டீசல் பாக்கி கொடுக்க வேண்டும் என்றும், இந்தப் போக்குவரத்துக்
கழகத்திற்குச் சொந்தமான தஞ்சாவூர் பணிமனை ஒரு தனியார் வங்கியில் 12 கோடி
ரூபாய்க்கு அடமானம் வைக்கப்பட்டு இருக்கிறது என்றும் கூறப்படுகிறது. இதே
நிலைமை தான் மற்ற போக்குவரத்துக் கழகங்களிலும் நிலவுகிறது. லாபத்தில்
இயங்குவதாகக் கூறப்படும் மாநகர போக்குவரத்துக் கழகமே 18 கோடி ரூபாய்
அளவுக்கு டீசல் பாக்கி வைத்துள்ளதாக செய்தி வந்துள்ளது. இதன் காரணமாக
நூற்றுக் கணக்கான பேருந்துகள் இயங்காமல் நிறுத்தி வைக்கப்பட்டு
இருக்கின்றன. இது தவிர, டயர்கள், உதிரி பாகங்கள் இல்லாத தன் காரணமாகவும்
நூற்றுக் கணக்கான பேருந்துகள் இயக்க முடியாமல் நிறுத்தி வைக்கப்பட்டுள்ளன.
இது மட்டுமல்லாமல், பெரும்பாலான அரசுப் போக்குவரத்துக் கழகங்களில் மாதச்
சம்பளம் தாமதமாக வழங்கப்படுவதாகவும், போக்குவரத்துத் தொழிலாளர்களுக்கான
ஓய்வூதியப் பயன்கள் ஓர் ஆண்டாக நிலுவையில் இருக்கின்றன என்றும்
பாதிக்கப்பட்ட தொழிலாளர்கள் தெரிவிக்கின்றனர். அரசுப் போக்குவரத்துக்
கழகங்களில் நிலவும் டீசல் தட்டுப்பாடு குறித்து தி.மு.க. அரசின்
போக்குவரத்துத் துறை அமைச்சரிடம் பத்திரிகையாளர்கள் கேட்ட போது, எந்த
வண்டியும் நிற்கவில்லை; நீ காட்டு, நான் பார்க்கிறேன் என்று நக்கலாக பதில்
அளிக்கிறார். பொங்கல் பண்டிகை நெருங்கி வருகின்ற இந்தச் சூழ்நிலையில் இது
போன்ற நிலை நீடித்தால், மக்கள் பெருத்த அவதிக்கு ஆளாவதுடன், விமானக்
கட்டணம் அளவுக்கு கட்டணத்தை வசூலிக்கும் ஆம்னி பேருந்துகளில் பயணிக்க
வேண்டிய கட்டாயத்திற்கு ஆளாக்கப்படுவார்கள். பேருந்துகளுக்கான டீசல் கூட
வாங்க முடியாத அளவுக்கு, தொழிலாளர்களின் ஓய்வூதியப் பயன்களை நிறுத்தி
வைக்கக் கூடிய அளவுக்கு நிதி நெருக்கடியை ஏற்படுத்தி, அரசுப்
போக்குவரத்துக் கழகங்களை முடங்கச் செய்துள்ள முதல்வர் கருணாநிதிக்கு எனது
கடும் கண்டனத்தைத் தெரிவித்துக் கொள்வதோடு, அரசுப் போக்குவரத்துக்
கழகங்களின் பேருந்துகளுக்குத் தேவையான டீசல் பணத்தையும், ஓய்வு பெற்ற
போக்குவரத்து ஊழியர்களின் ஓய்வூதியப் பயன்களுக்குத் தேவையான பணத்தையும்
உடனடியாக அரசு நிதியில் இருந்து வழங்குமாறு கேட்டுக் கொள்கிறேன். இவ்வாறு
ஜெயலலிதா கூறியுள்ளார்.